પૈપ્પલાદ-સંહિતા · અધ્યાય 17.7

કસ્મિન્ન્ અઙ્ગે તપો અસ્યાધિ તિષ્ઠતિ
કસ્મિન્ન્ અઙ્ગ ઋતમ્ અસ્યાધ્યાહિતમ્ ।
ક્વ વ્રતં ક્વ શ્રદ્ધાસ્ય તિષ્ઠતિ
કસ્મિન્ન્ અઙ્ગે સત્યમ્ અસ્ય પ્રતિષ્ઠિતમ્ ॥

ક્વ બ્રહ્મ ક્વ તિષ્ઠન્ત્ય્ આપઃ
કસ્મિન્ન્ અઙ્ગે દિશો અસ્ય પ્રતિષ્ઠિતાઃ ।
કતમદ્ અઙ્ગમ્ અનુ સં ચરેતે
અહોરાત્રે સંવિદાને સમાનમ્ ॥

કસ્મિન્ન્ અઙ્ગે તિષ્ઠતિ ભૂમિર્ અસ્ય
કસ્મિન્ન્ અઙ્ગે તિષ્ઠત્ય્ અન્તરિક્ષમ્ ।
કસ્મિન્ન્ અઙ્ગે તિષ્ઠત્ય્ આહિતા દ્યૌઃ
કસ્મિન્ન્ અઙ્ગે તિષ્ઠત્ય્ ઉત્તરં દિવઃ ॥

કસ્માદ્ અઙ્ગાદ્ દીપ્યતે અગ્નિર્ અસ્ય
કસ્માદ્ અઙ્ગાત્ પવતે માતરિશ્વા ।
કસ્માદ્ અઙ્ગાદ્ વિ મિમીતે ઽધિ ચન્દ્રમાઃ
સ્કમ્ભસ્ય મહદ્ વિમિમાનો અઙ્ગમ્ ॥

ક્વ પ્રેપ્સન્ દીપ્યત ઊર્ધ્વો અગ્નિઃ
ક્વ પ્રેપ્સન્ પવતે માતરિશ્વા ।
યત્ર પ્રેપ્સન્તીર્ અભિયન્ત્ય્ આવૃતઃ
સ્કમ્ભં તં બ્રૂહિ કતમઃ સ્વિદ્ એવ સઃ ॥

ક્વ પ્રેપ્સન્તી યુવતી વિરૂપે
અહોરાત્રે દ્રવતઃ સંવિદાને ।
યત્ર પ્રેપ્સન્તીર્ અભિયન્ત્ય્ આપઃ
સ્કમ્ભં (…) ॥

ક્વાર્ધમાસાઃ ક્વ યન્તિ માસાઃ
સંવત્સરેણ સહ સંવિદાનાઃ ।
યત્ર યન્ત્ય્ ઋતવો યત્રાર્તવાઃ
સ્કમ્ભં (…) ॥

યસ્મિન્ સ્કન્ધા પ્રજાપતિર્
લોકાન્ સર્વાઁ અધારયત્ ।
સ્કમ્ભં તં બ્રૂહિ કતમઃ સ્વિદ્ એવ સઃ ॥

યત્ પરમમ્ અવમં યચ્ ચ મધ્યમં
પ્રજાપતિઃ સસૃજે વિશ્વરૂપમ્ ।
કિયતા સ્કમ્ભઃ પ્ર વિવેશ તત્ર
યન્ ન પાર્વિશત્ ક્વ તદ્ બભૂવ ॥

કિયતા સ્કમ્ભઃ પ્ર વિવેશ ભૂતં
કિયદ્ ભવિષ્યદ્ અન્વાશયે ઽસ્ય ।
એકં યદ્ અઙ્ગમ્ અકૃણોત્ સહસ્રધા
કિયતા સ્કમ્ભઃ પ્ર વિવેશ તત્ર ॥