Paippalāda-Saṃhitā · Chapter 17.55
eṣā tvacāṃ puruṣe saṃ babhūva-
-anagnāḥ sarve paśavo ye anye |
kṣatrenātmānaṃ pari dhāpayetām
amotaṃ vāso mukham odanasya ||
yad akṣeṣu vadasi yat samityāṃ
yad vā dhane anṛtaṃ vittakāmyā |
samānaṃ tantuṃ saha saṃvasānau
tasmin sarvaṃ śamalaṃ sādayāthaḥ ||
varṣaṃ vanuṣvāpi gaccha devāṃs
tvaco dhūmaṃ pary ut pātayāsi |
viśvavyacā viśvakarmā svargaḥ
sayonir lokam upa yāhy etam ||
tanvaḥ svargo bahudhā vi cakre
yathā vida ātmany anyavarṇāḥ |
apājait kṛṣṇāṃ ruśatīṃ punāno
yā lohinī tāṃ te agnau juhomi ||
prācyai diśe agnaye 'dhipataye 'sitāya rakṣitra
ādityāyeṣumata etaṃ pari dadhmaḥ |
taṃ no gopāyantv āsmākam aitor
diṣṭaṃ no atra jarase ni neṣat |
jarā mṛtyave pari ṇo dadhātv
adhā pakvena saha saṃ bhavema ||
dakṣiṇāyai diśa indrāyādhipataye tiraścirāje rakṣitre
vasubhya iṣumadbhya etam (…) ||
pratīcyai diśe varuṇāyādhipataye pṛdākave rakṣitre
mitrāyeṣumata etam (…) ||
udīcyai diśe somāyādhipataye svajāya rakṣitre
vātāyeṣumata etam (…) ||
dhruvāyai diśe viṣṇave 'dhipataye kalmāṣagrīvāya rakṣitre
vīrudbhya iṣumatībhya etam (…) ||
ūrdhvāyai diśe bṛhaspataye 'dhipataye śvitrāya rakṣitre
aśanībhya iṣumatībhya etaṃ pari dadhmaḥ |
taṃ no gopāyantv āsmākam aitor
diṣṭaṃ no atra jarase ni neṣat |
jarā mṛtyave pari ṇo dadhātv
athā pakvena saha saṃ bhavema ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0