Paippalāda-Saṃhitā · Chapter 16.99

prācyāṃ diśi śiro ajasya dhehi
dakṣiṇāyāṃ diśi dakṣiṇaṃ dhehi pārśvam |
pratīcyāṃ diśi bhasadam asya
udīcyāṃ diśy uttaraṃ dhehi pārśvam ||

ajasyānūkam ūrdhvāyāṃ diśi dhehi
diśi dhehi pājasyaṃ dhruvāyām |
antarikṣe madhyato madhyam asya
padbhiś caturbhiḥ prati tiṣṭha dikṣu ||

śṛtam ajaṃ śṛtayā prorṇuhi tvacā
sarvair aṅgaiḥ saṃbhṛtaṃ viśvarūpam |
sa ut tiṣṭha prehi nākam uttamaṃ
padbhiś caturbhiḥ prati tiṣṭha dikṣu ||

sarvā diśaḥ saṃvidānāḥ sadhrīcīḥ
sāntardeśāḥ prati gṛhṇantu tejasam |
te rakṣantu tava tubhyam etaṃ
tābhyo juhomi haviṣā ghṛtena ||

yaṃ brāhmaṇe nidadhe yaṃ ca vikṣu
yā vipruṣa odanānām ajasya |
sarvaṃ tad agne sukṛtasya loke
jānītān naḥ saṃgamane pathīnām ||

ajaḥ pañcaudano vy akramata |
tasyora iyam abhavad
udaram antarikṣaṃ dyauḥ pṛṣṭhaṃ diśaḥ pārśve ||

ditiś cāditiś ca śṛṅge
satyaṃ ca rtaṃ ca cakṣuṣī |
viśvaṃ rūpaṃ śraddhā prāṇo virāṭ śiraḥ ||

eṣa vā aparimito yajño
yad ajaḥ pañcaudanaḥ |
aparimitaṃ lokaṃ jayaty
aparimitaṃ lokam ava rundhe
ya evaṃ viduṣe 'jaṃ pañcaudanaṃ dadāti ||

nāsyāsthīni bhindyān
na majjño nir dhayet |
sarvāṇi samādāya-
- idaṃidaṃ pra veśayet ||

idam idam asya rūpaṃ
tenainaṃ saṃ gamayati |
svadhām ūrjam akṣitiṃ maho asmai duhe
ya evaṃ viduṣe 'jaṃ pañcaudanaṃ dadāti ||