Paippalāda-Saṃhitā · Chapter 16.83

catūrātraḥ pañcarātraḥ
ṣaḍrātraś cobhayaḥ saha |
ṣoḍaśī saptarātraś ca-
- ucchiṣṭāj jajñire sarve
ye yajñā amṛte hitāḥ ||

pratihāro nidhanaṃ
viśvajic cābhijic ca yaḥ |
sāhnātirātrā ucchiṣṭe
dvādaśāho 'pi tan mayi ||

sūnṛtā saṃnatiḥ kṣemaḥ
svadhorjāmṛtaṃ sahaḥ |
ucchiṣṭe sarve pratyañcaḥ
kāmāḥ kāmena tṛpyantu ||

nava bhūmīḥ samudrāś ca-
-ucchiṣṭe 'dhi śritā divaḥ |
ā sūryo bhāty ucchiṣṭe
ahorātre ca tan mayi ||

upahavyaṃ viṣūvantaṃ
ye ca yajñā guhā hitāḥ |
bibharti bhartā viśvasya-
-ucchiṣṭo janituḥ pitā ||

pitā janitur ucchiṣṭo
asoḥ pautraḥ pitāmahaḥ |
sa khyeti viśvasyeśāno
vṛṣā bhūmyām atighnyaḥ ||

ṛtaṃ satyaṃ tapo dīkṣā
śramo dharmaś ca karma ca |
bhūtaṃ bhaviṣyad ucchiṣṭe
vīryaṃ lakṣmīr balaṃ bale ||

samṛddhir oja ākutiḥ
kṣatraṃ rāṣṭraṃ ṣaḍ urvyaḥ |
saṃvatsaro 'dhy ucchiṣṭa
iḍā praiṣā grahā haviḥ ||

caturhotāra āpriyaś
caturmāsyāni nividaḥ |
ucchiṣṭe yajñā hotrāś ca
paśubandhās tad iṣṭayaḥ ||

ardhamāsāś ca māsāś ca-
-ārtava ṛtubhiḥ saha |
ucchiṣṭe ghoṣiṇīr āpaḥ
stanayitnuḥ śrutir mahī ||