પૈપ્પલાદ-સંહિતા · અધ્યાય 16.7

ત્રિર્ યાતુધાનઃ પ્રસિતિં ત એત્વ્
ઋતં યો અગ્ને અનૃતેન હન્તિ ।
તમ્ અર્ચિષા સ્ફૂર્જયઞ્ જાતવેદઃ
સમક્ષમ્ એનં ગૃણતે નિ વૃઙ્ધિ ॥

યદ્ અગ્ને અદ્ય મિથુના શપાતો
યદ્ વાચસ્ તૃષ્ટં જનયન્ત રેભાઃ ।
મન્યોર્ મનસઃ શરવ્યા જાયતે
યા તયા વિધ્ય હૃદયે યાતુધાનાન્ ॥

પરા શૃણીહિ તપસા યાતુધાનાન્
પરાગ્ને રક્ષો હરસા શૃણીહિ ।
પરાર્ચિષા મૂરદેવાઞ્ છૃણીહિ
પરાસુતૃપઃ શોશુચતઃ શૃણીહિ ॥

પરાદ્ય દેવા વૃજિનં શૃણન્તુ
પ્રત્યગ્ એનં શપથા યન્તુ સૃષ્ટાઃ ।
વાચાસ્તેનં શરવ ઋચ્છન્તુ મર્મન્
વિશ્વયૈતુ પ્રસિતિં યાતુધાનઃ ॥

સનાદ્ અગ્ને મૃણસિ યાતુધાનાન્
ન ત્વા રક્ષાંસિ પૃતનાસુ જિગ્યુઃ ।
અનુ દહ સહમૂરાન્ ક્રવ્યાદો
મા તે હેત્યા મુક્ષત દૈવ્યાયાઃ ॥

યઃ પૌરુષેયેણ ક્રવિષા સમઙ્ક્તે
યો અશ્વ્યેન પશુના યાતુધાનઃ ।
યો અઘ્ન્યાયા ભરતિ ક્ષીરમ્ અગ્ને
તેષાં શીર્ષાણિ હરસાપિ વૃશ્ચ ॥

સંવત્સરીણં પય ઉસ્રિયાયાસ્
તસ્ય માસીદ્ યાતુધાનો નૃચક્ષઃ ।
પીયૂષમ્ અગ્ને યતમસ્ તિતૃપ્સાત્
તં પ્રત્યઞ્ચમ્ અર્ચિષા વિધ્ય મર્મન્ ॥

વિષં ગવાં યાતુધાનાઃ પિબન્ત્વ્
આ વૃશ્ચન્તામ્ અદિતયે દુરેવાઃ ।
પરૈણાન્ દેવઃ સવિતા દદાતુ
પરા ભાગમ્ ઓષધીનાં જયન્તામ્ ॥

ત્વં નો અગ્ને અધરાદ્ ઉદક્તસ્
ત્વં પશ્ચાદ્ ઉત રક્ષા પુરસ્તાત્ ।
પ્રતિ ત્યે તે અજરાસસ્ તપિષ્ઠા
અઘશંસં શોશુચતો દહન્તુ ॥

પશ્ચાત્ પુરસ્તાદ્ અધરાદ્ ઉદક્તઃ
કવિઃ કાવ્યેન પરિ પાહ્ય્ અગ્ને ।
સખા સખાયમ્ અજરો જરિમ્ણે
અગ્ને મર્ત્યાઁ અમર્ત્યસ્ ત્વં નઃ ॥