Paippalāda-Saṃhitā · Chapter 16.66

asya vāmasya palitasya hotus
tasya bhrātā madhyamo asty aśnaḥ |
tṛtīyo bhrātā ghṛtapṛṣṭho asya-
-atrāpaśyaṃ viśpatiṃ saptaputram ||

sapta yuñjanti ratham ekacakram
eko aśvo vahati saptanāmā |
trinābhi cakram ajaram anarvaṃ
yasminn imā viśvā bhuvanāni tasthuḥ ||

imā ratham adhi ye sapta tasthuḥ
saptacakraṃ sapta vahanty aśvāḥ |
sapta svāsaro abhi saṃ navanta
yatra gavāṃ nihitā sapta nāmā ||

ko dadarśa prathamaṃ jāyamānam
asthanvantaṃ yad anasthā bibharti |
bhūmyā asur asṛg ātmā kva svit
ko vidvāṃsam upa gāt praṣṭum etat ||

pākaḥ pṛcchāmi manasāvijānan
devānām enā nihitā padāni |
vatse baṣkaye 'dhi sapta tantūn
vi tatnire kavaya otavā u ||

acikitvāṃś cikituṣaś cid atra
kavīn pṛcchāmi vidmane na vidvān |
vi yas tastambha ṣaḍ imā rajāṃsy
ajasya rūpe kim api svid ekam ||

iha bravītu ya īm aṅga veda-
-asya vāmasya nihitaṃ padaṃ veḥ |
śīrṣṇaḥ kṣīraṃ duhrate gāvo asya
vavriṃ vasānā udakaṃ padāpuḥ ||

mātā pitaram ṛta ā babhāja
dhīty agre manasā saṃ hi jagme |
sā bībhatsur garbharasā nividdhā
namasvanta id upavākam īyuḥ ||

yuktā mātāsīd dhuri dakṣiṇāyā
atiṣṭhad garbho vṛjanīṣv antaḥ |
amīmed vatso anu gām apaśyad
viśvarūpyaṃ triṣu yojaneṣu ||

tisro mātṝs trīn pitṝn bibhrad eka
ūrdhvas tasthau nem ava glāpayanti |
mantrayante divo amuṣya pṛṣṭhe
viśvavidaṃ vācam aviśvaminvām ||