પૈપ્પલાદ-સંહિતા · અધ્યાય 16.59

કેન પાર્ષ્ણી આભૃતે પૂરુષસ્ય
કેન માંસં સંભૃતં કેન ગુલ્ફૌ ।
કેનાઙ્ગુલીઃ પેશિનીઃ કેન ખાનિ
કેનોચ્છૃઙ્ખૌ મધ્યતઃ કઃ પ્રતિષ્ઠાઃ ॥

કસ્માન્ નુ ગુલ્ફાવ્ અધરાવ્ અકૃણ્વન્ન્
અષ્ઠીવન્તા ઉત્તરૌ પૂરુષસ્ય ।
નિરૃત્ય જઙ્ઘે નિ દધુઃ ક્વ સ્વિજ્
જાનુનોઃ સન્ધી ક ઇમૌ જજાન ॥

ચતુષ્ટયં યુજ્યતે સંહિતાન્તં
જાનુભ્યામ્ ઊર્ધ્વં શિથિરં કબન્ધમ્ ।
શ્રોણી યદ્ ઊરુ ક ઉ તજ્ જજાન
યાભ્યાં કુસિન્ધં સુધૃતં બભૂવ ॥

કતિ દેવાઃ કતમે ત આસન્
ય ઉરશ્ ચિક્યુર્ અગ્રિયં પૂરુષસ્ય ।
કતિ સ્તનૌ નિ દધુઃ કઃ કફોડૌ
કતિ સ્કન્ધાન્ કતિ પૃષ્ટીર્ અચિન્વન્ ॥

કો અસ્ય બાહૂ સમ્ અભરદ્
વીર્યં કૃણવાદ્ ઇતિ ।
અંસૌ કો અસ્ય તદ્ દેવઃ
કુસિન્ધ આ દધાદ્ અધિ ॥

મસ્તિષ્કમ્ અસ્ય યતમો લલાટં
કૃકાટિકાં પ્રથમો યઃ કપાલમ્ ।
ચિત્વા ચિત્યં પુરુષસ્ય હન્વોર્
દિવં રુરોહ કતમઃ સ દેવઃ ॥

કઃ સપ્ત ખાનિ વિ તતર્દ શીર્ષ્ણિ
કર્ણાવ્ ઇમાવ્ અક્ષણી નાસિકે મુખમ્ ।
યેષાં પુરુત્રા વિજયસ્ય મહ્મનિ
ચતુષ્પાદો દ્વિપાદો યન્તિ યામમ્ ॥

હન્વોર્ હિ જિહ્વામ્ અદધાત્ પુરૂચીમ્
અધા મહીમ્ અધિ શિશ્રાય વાચમ્ ।
સ આ વરીવર્તિ મહિના વ્યોમન્ન્
અપો વસાનઃ ક ઉ ચિત્ પ્ર વેદ ॥

મૂર્ધાનમ્ અસ્ય સંસીવ્ય-
-અથર્વા હૃદયં ચ યત્ ।
મસ્તિષ્કાદ્ ઊર્ધ્વં પ્રૈરયત્
પવમાનો ઽધિ શીર્ષ્ણઃ ॥

તદ્ વા અથર્વણઃ શિરો
દેવકોશઃ સમુબ્જિતઃ ।
તત્ પ્રાણો અભિ રક્ષતુ
શ્રિયમ્ અન્નમ્ અથો મનઃ ॥