Paippalāda-Saṃhitā · Chapter 16.152

yasmin devāḥ pitaro manuṣyā
arā nābhāv iva śritāḥ |
apāṃ tvā puṣpaṃ pṛcchāmi
yatra tan māyayāhitam ||

yatrāpāṃ puṣpaṃ nihitaṃ
māyayātihitaṃ guhā |
yo vai tad vidyāt pratyakṣaṃ
sa vidyād brāhmaṇaṃ mahat ||

maṇis triṣūtro nihitaḥ svarvid
ūrdhvas tiryaṅ viśa etu prajānan |
sa pumān puṃso janayann ṛtena
sarvān antān gacchatu sadya eva ||

sarvāṃ rātrīṃ sam oṣatv
ādityo jātavedasā |
agner adhi divam ā rohann
āyuṣā sam anaktu mā
varcasā saṃ sṛjāti mā ||

gharmaḥ sāhasraḥ samidhā samiddho
'sapatnāḥ pradiśo me kṛṇotu |
sapatnān sarvān me sūryo
hantu vaiśvānaro hariḥ ||

gharmas taptaḥ pra dahatu
bhrātṛvyān dviṣato mama |
ā dattāṃ chatrūn āditya
udyan sūryaḥ pṛtanyataḥ ||

vaiśvānaraḥ pra dahatu
bhrātṛvyān dviṣato vṛṣā |
udyan me śukra ādityo
vi mṛdho hantu sūryaḥ ||

śukraṃ suparṇaṃ hari brahma
bhrājad ajasraṃ jyotir divam ā tatāna |
hariḥ suparṇaḥ pramathiṣṇur āśuḥ
sapatnān hantu mahātā vadhena ||

hariḥ suparṇaḥ sudino 'bhayaṃkaro
hiraṇyavarṇo durudāpa āśuḥ |
sapatnān sarvān me sūrya
ādityo hantu raśmibhiḥ ||

mahāntam arthaṃ pari sadya etv
ahorātre vidadhac chukra udyan |
sapatnān sarvān me sūrya
etu vaiśvānaro dahan ||

udyann adya mitramaha ity ekā ||

tejas tapāṃsi mukhato bibharṣy
ānandaṃ bhūtiṃ mahasaḥ pratiṣṭhām |
paryūhamāṇaḥ śriyam eṣi sarvato
amoghaṃ satyaṃ yaśa udyataṃ te ||