પૈપ્પલાદ-સંહિતા · અધ્યાય 16.152

યસ્મિન્ દેવાઃ પિતરો મનુષ્યા
અરા નાભાવ્ ઇવ શ્રિતાઃ ।
અપાં ત્વા પુષ્પં પૃચ્છામિ
યત્ર તન્ માયયાહિતમ્ ॥

યત્રાપાં પુષ્પં નિહિતં
માયયાતિહિતં ગુહા ।
યો વૈ તદ્ વિદ્યાત્ પ્રત્યક્ષં
સ વિદ્યાદ્ બ્રાહ્મણં મહત્ ॥

મણિસ્ ત્રિષૂત્રો નિહિતઃ સ્વર્વિદ્
ઊર્ધ્વસ્ તિર્યઙ્ વિશ એતુ પ્રજાનન્ ।
સ પુમાન્ પુંસો જનયન્ન્ ઋતેન
સર્વાન્ અન્તાન્ ગચ્છતુ સદ્ય એવ ॥

સર્વાં રાત્રીં સમ્ ઓષત્વ્
આદિત્યો જાતવેદસા ।
અગ્નેર્ અધિ દિવમ્ આ રોહન્ન્
આયુષા સમ્ અનક્તુ મા
વર્ચસા સં સૃજાતિ મા ॥

ઘર્મઃ સાહસ્રઃ સમિધા સમિદ્ધો
ઽસપત્નાઃ પ્રદિશો મે કૃણોતુ ।
સપત્નાન્ સર્વાન્ મે સૂર્યો
હન્તુ વૈશ્વાનરો હરિઃ ॥

ઘર્મસ્ તપ્તઃ પ્ર દહતુ
ભ્રાતૃવ્યાન્ દ્વિષતો મમ ।
આ દત્તાં છત્રૂન્ આદિત્ય
ઉદ્યન્ સૂર્યઃ પૃતન્યતઃ ॥

વૈશ્વાનરઃ પ્ર દહતુ
ભ્રાતૃવ્યાન્ દ્વિષતો વૃષા ।
ઉદ્યન્ મે શુક્ર આદિત્યો
વિ મૃધો હન્તુ સૂર્યઃ ॥

શુક્રં સુપર્ણં હરિ બ્રહ્મ
ભ્રાજદ્ અજસ્રં જ્યોતિર્ દિવમ્ આ તતાન ।
હરિઃ સુપર્ણઃ પ્રમથિષ્ણુર્ આશુઃ
સપત્નાન્ હન્તુ મહાતા વધેન ॥

હરિઃ સુપર્ણઃ સુદિનો ઽભયંકરો
હિરણ્યવર્ણો દુરુદાપ આશુઃ ।
સપત્નાન્ સર્વાન્ મે સૂર્ય
આદિત્યો હન્તુ રશ્મિભિઃ ॥

મહાન્તમ્ અર્થં પરિ સદ્ય એત્વ્
અહોરાત્રે વિદધચ્ છુક્ર ઉદ્યન્ ।
સપત્નાન્ સર્વાન્ મે સૂર્ય
એતુ વૈશ્વાનરો દહન્ ॥

ઉદ્યન્ન્ અદ્ય મિત્રમહ ઇત્ય્ એકા ॥

તેજસ્ તપાંસિ મુખતો બિભર્ષ્ય્
આનન્દં ભૂતિં મહસઃ પ્રતિષ્ઠામ્ ।
પર્યૂહમાણઃ શ્રિયમ્ એષિ સર્વતો
અમોઘં સત્યં યશ ઉદ્યતં તે ॥