Paippalāda-Saṃhitā · Chapter 16.139

prajāpatiś ca parameṣṭhī ca śṛṅge indraḥ śiro
agnir lalāṭaṃ yamaḥ kṛkāṭaṃ somo rājā mastiṣkaḥ |
satyaṃ cakṣur ṛtaṃ śrotre prāṇāpānau nāsike
dyaur uttarā hanuḥ pṛthivy adharā ||

agnir āsyaṃ vidyuj jihvā
maruto dantāḥ pavamānaḥ prāṇaḥ |
viśvaṃ vāyuḥ kaṇṭhaḥ svargo lokaḥ
kṛṣṇadraṃ vidharaṇī vikeśyaḥ ||

revatī grīvāḥ kṛttikā skandhā
gharmo vahaḥ śyenaḥ kroḍo antarikṣaṃ pājasyam |
mitraś ca varuṇaś cāṃsau
tvaṣṭā cāryamā ca doṣaṇī ||

mahādevo bāhū bṛhaspatiḥ kakud bṛhatīḥ kīkasāḥ |
devānāṃ patnīḥ pṛṣṭaya upasadaḥ parśavaḥ ||

indrāṇī bhasad vātaḥ pucchaṃ pavamāno bālāḥ |
brahma ca kṣatraṃ ca śroṇī balam ūrū
dhātā ca savitā cāṣṭhīvantau ||

jaṅghā gandharvā apsarasaḥ
kuṣṭhikā aditiḥ śaphāḥ |
ceto hṛdayaṃ yakṛn medhā
harimā pittaṃ vrataṃ purītat ||

kṣut kukṣir irā vaniṣṭhuḥ
parvatāḥ plāśir devajanā gudā
manuṣyā āntrāṇy atrā udaram
itarajanā ūbadhyaṃ rakṣāṃsi lohitam |
krodho vṛkkau manyur āṇḍau prajā śepaḥ ||

samudro vastir nadī sūtrī
stanayitnur ūdho varṣasya pataya stanāḥ |
viśvavyacāś carmauṣadhayo lomāni nakṣatrāṇi rūpam ||

abhraṃ pīvo majjā nidhanam |
nidhanaṃ bhūtyāḥ prajāyāḥ paśūnāṃ bhavati ya evaṃ veda ||

indraḥ prāṅ tiṣṭhan dakṣiṇā tiṣṭhan yamaḥ
pratyaṅ tiṣṭhan dhātodaṅ tiṣṭhan savitā |
tṛṇāni prāptaḥ somo rājāvṛtta ānandaḥ |
īkṣamāno mitre yujyamāno vaiśvadevo yuktaḥ prajāpatir vimuktaḥ sarvam |
etad vai gorūpam |
upainaṃ rūpavantaḥ paśavas tiṣṭhanti ya evaṃ veda ||