Paippalāda-Saṃhitā · Chapter 16.113
tasmān na dviṣann adyān
na dviṣato 'nnam adyān
na mīmāṃsitasya na mīmāṃsyamānasya ||
sarvo vā eṣo jagdhapāpmā
yasyānnam aśnanti ||
sarva u eṣo 'jagdhapāpmā
yasyānnaṃ nāśnanti ||
prajāpater vā eṣa vikrāntam anuvikrame ya upaharanti ||
prajāpatyo vā etasyaiva yajño vitato ya upaharati ||
sarvadā vā eṣa sutasomo yuktagrāvārdrapavitra
āhṛtayajñakratur vitatādhavaro ya upaharati ||
yo 'tithīnāṃ sa āhavanīyo
yo 'nnakaraṇaḥ sa dakṣiṇāgnir
yo veśmani sa gārhapatyaḥ ||
iṣṭaṃ ca vā eṣa pūrtaṃ cāśnāti
yaḥ pūrvo 'tither aśnāti ||
prajāṃ ca vā eṣa paśūṃś cāśnāti
(…) ||
ūrjaṃ ca vā eṣa payaś ca gṛhāṇām aśnāti
yaḥ pūrvo 'tither aśnāti ||
eṣa vā atithir yac chrotriyaḥ ||
tasmāt pūrvo nāśnīyād aśitāvaty aśnīyāt tad vratam ||
yajñasyāvicchedāya yajñasya guptaye yajñasya sātmatvāya ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0