पैप्पलाद-संहिता · अध्याय 16.113
तस्मान् न द्विषन्न् अद्यान्
न द्विषतो ऽन्नम् अद्यान्
न मीमांसितस्य न मीमांस्यमानस्य ॥
सर्वो वा एषो जग्धपाप्मा
यस्यान्नम् अश्नन्ति ॥
सर्व उ एषो ऽजग्धपाप्मा
यस्यान्नं नाश्नन्ति ॥
प्रजापतेर् वा एष विक्रान्तम् अनुविक्रमे य उपहरन्ति ॥
प्रजापत्यो वा एतस्यैव यज्ञो विततो य उपहरति ॥
सर्वदा वा एष सुतसोमो युक्तग्रावार्द्रपवित्र
आहृतयज्ञक्रतुर् वितताधवरो य उपहरति ॥
यो ऽतिथीनां स आहवनीयो
यो ऽन्नकरणः स दक्षिणाग्निर्
यो वेश्मनि स गार्हपत्यः ॥
इष्टं च वा एष पूर्तं चाश्नाति
यः पूर्वो ऽतिथेर् अश्नाति ॥
प्रजां च वा एष पशूंश् चाश्नाति
(…) ॥
ऊर्जं च वा एष पयश् च गृहाणाम् अश्नाति
यः पूर्वो ऽतिथेर् अश्नाति ॥
एष वा अतिथिर् यच् छ्रोत्रियः ॥
तस्मात् पूर्वो नाश्नीयाद् अशितावत्य् अश्नीयात् तद् व्रतम् ॥
यज्ञस्याविच्छेदाय यज्ञस्य गुप्तये यज्ञस्य सात्मत्वाय ॥
मूल पाठ: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0