Paippalāda-Saṃhitā · Chapter 16.1

antakāya mṛtyave nama iha-
-ayam astu puruṣaḥ sahāsunā |
sūryasya bhāge amṛtasya loke
prāṇā apānā iha te ramantām ||

ud enaṃ bhago agrabhīd
ud enaṃ somo aṃśumān |
ud enaṃ maruto devā
ud indrāgnī svastaye ||

iha te 'sur iha prāṇa
ihāyur iha te manaḥ |
ut tvā nirṛtyāḥ pāśebhyo
daivyā vācā bharāmasi ||

ut krāmāto māva patthā
mṛtyoḥ paḍvīśam avamuñcamānaḥ |
mā cchitthā asmāl lokād
agneḥ sūryasya saṃdṛśaḥ ||

tubhyaṃ vātaḥ pavatāṃ mātariśvā
tubhyaṃ varṣantv amṛtāny āpaḥ |
sūryas te tanve śaṃ tapāt
tvāṃ mṛtyur dayatāṃ mā pra meṣṭhāḥ ||

udyānaṃ te puruṣa nāvayānaṃ
jīvātaṃ te dakṣatātiṃ kṛṇotu |
ā hi rohemam amṛtaṃ sukhaṃ ratham
atha jirvir vidatham ā vadāsi ||

mā te manas tatra gān mā tiro bhūn
mā jīvebhyaḥ pra mado mānu gāḥ pitṝn |
viśve devā abhi rakṣantu tveha ||

mā gatānām ā dīdhīthā
ye nayanti parāvatam |
ud ā roha tamaso jyotir ehy
ā te hastaṃ rabhāmahe

śyāmaś ca tvā śabalaś ca preṣitau
yamasya yau pathirakṣī śvānau |
arvāṅ ehi mā vi dīdhyo
māti tiṣṭhaḥ parāṅmanāḥ ||

maitaṃ panthām anu gā bhīma eṣa
yena pūrvaṃ nayatha taṃ bravīmi |
tama etat puruṣa mā pra patthā
bhayaṃ parastād abhayaṃ te arvāk ||