Paippalāda-Saṃhitā · Chapter 15.23

vṛṣākṣasyāsurasya menir asi
tāṃ tvayā tathā veda karṇasya
kauvidasyevamāśā |
tāṃ mābhy ava gā dvādaśāhnāni vi rakṣe ||

asir me tigmasyāyasa
indrāgnibhyāṃ susaṃśitaḥ |
tena sedhām id āduniṃ
kṛṣiṃ me māva gād iti
sasyaṃ me mā vadhīd iti ||

marutaḥ pari vṛṅdhi no
divaḥ kṣudrebhir aśmabhiḥ |
udumbarasya śākhayā vicakṣuṣā-
-aśaniṃ yāvayāmasi ||

maruto mṛḍayāta no
divaḥ śukrebhir aśmabhiḥ |
udumbarasya śākhayā vicakṣuṣā-
-aśaṇiṃ yāvayāmasi ||

vartād vartam ā krāma
parvatād adhi parvatam |
girau pratiśṛtā satī
vṛkṣān bhaṅdhi mā yavam ||

adāmnā tvā sandhyāmi
yāvaṇyā paribhūrṇyā |
sānau pratiśṛtā satī
tṛṇaṃ bhaṅdhi mā yavam ||

uśatī nāmāsi salindā nāma |
anyām āsāṃ gaccha yaṃ dviṣmas taṃ gaccha ||

parācīm anu saṃvataṃ
parācīm anu saṃvidaṃ
parācy anu ni drava |
itas tvā nāśayāmasi
brahmaṇā vīryāvatā ||

vār bhavodakaṃ bhava-
-udakasyodakaṃ bhava |
kṣudrāt kṣodīyasī bhūtvā-
-athehy adhamaṃ tamaḥ ||

syonā bhava śivā bhava
śivāc chivatarā bhava |
phenān mṛdīyasī bhūtvā-
-idaṃ śasyam upā cara ||

namas te astu vidyute stanayitnave |
namas te agne dūre hete kṛṇmo
mā no hiṃsīr dvipado mā catuṣpadaḥ ||

prati tvā sahasāsahaḥ
sahasā prati rudhmasi |
aindram idaṃ saho mahad
bhūmyās tavaṃ divi śritam |
aphālakṛṣṭam ā krama
mā na indra yavaṃ vadhīḥ ||

yāḥ samudrād uccaranty
utsebhyo yā nadībhyaḥ |
atyantaḥ sarpo vaidyuto
'śaniṃ yāvayād itaḥ || anuvāka 5 |