Scripture Library

Paippalāda-Saṃhitā · Chapter 15.4

15.4.1

ṛṇād ṛṇam iva saṃ naya
kṛtyāṃ kṛtyākṛto gṛham |
cakṣurmantrasya durhārdaḥ
pṛṣṭīr api śṛṇāñjana ||

15.4.2

yad asmāsu duṣvapnyaṃ
yad goṣu yac ca no gṛhe |
amāmagatyasta durhārdaḥ
priya prati muñcatām ||

15.4.3

apām ūrja ojaso vāvṛdhānam
agner jātam adhi jātavedasaḥ |
caturvīraṃ parvatīyaṃ yad āñjanaṃ
diśaḥ pradiśaḥ karad ic chivās te ||

15.4.4

caturvīraṃ badhyata āñjanaṃ te
sarvā diśo abhayās te bhavantu |
dhruvas tiṣṭhādhi saviteva vārya
imā viśo abhi harantu te balim ||

15.4.5

āṅkṣvaikaṃ maṇim ekaṃ kṛṇuṣva
snāhy ekena pibaikam eṣām |
caturvīraṃ nairṛtebhyaś caturbhyo
grāhyā bandhebhyaḥ pari pātv asmān ||

15.4.6

agnir māghnyenāvatu
prāṇāyāpānāyāyuṣe |
varcasa ojase tejase
svastaye subhūtaye svāhā ||

15.4.7

indro mendryeṇāvatu
prāṇāyāpānāyāyuṣe |
varcasa ojase tejase
svastaye subhūtaye svāhā ||

15.4.8

somo mā somyenāvatu
prāṇāyāpānāyāyuṣe |
varcasa ojase tejase
svastaye subhūtaye svāhā ||

15.4.9

bhago mā bhagenāvatu
prāṇāyāpānāyāyuṣe |
varcasa ojase tejase
svastaye subhūtaye svāhā ||

15.4.10

maruto mā gaṇair avantu
prāṇāyāpānāyāyuṣe |
varcasa ojase tejase
svastaye subhūtaye svāhā ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0