પૈપ્પલાદ-સંહિતા · અધ્યાય 15.23

વૃષાક્ષસ્યાસુરસ્ય મેનિર્ અસિ
તાં ત્વયા તથા વેદ કર્ણસ્ય
કૌવિદસ્યેવમાશા ।
તાં માભ્ય્ અવ ગા દ્વાદશાહ્નાનિ વિ રક્ષે ॥

અસિર્ મે તિગ્મસ્યાયસ
ઇન્દ્રાગ્નિભ્યાં સુસંશિતઃ ।
તેન સેધામ્ ઇદ્ આદુનિં
કૃષિં મે માવ ગાદ્ ઇતિ
સસ્યં મે મા વધીદ્ ઇતિ ॥

મરુતઃ પરિ વૃઙ્ધિ નો
દિવઃ ક્ષુદ્રેભિર્ અશ્મભિઃ ।
ઉદુમ્બરસ્ય શાખયા વિચક્ષુષા-
-અશનિં યાવયામસિ ॥

મરુતો મૃડયાત નો
દિવઃ શુક્રેભિર્ અશ્મભિઃ ।
ઉદુમ્બરસ્ય શાખયા વિચક્ષુષા-
-અશણિં યાવયામસિ ॥

વર્તાદ્ વર્તમ્ આ ક્રામ
પર્વતાદ્ અધિ પર્વતમ્ ।
ગિરૌ પ્રતિશૃતા સતી
વૃક્ષાન્ ભઙ્ધિ મા યવમ્ ॥

અદામ્ના ત્વા સન્ધ્યામિ
યાવણ્યા પરિભૂર્ણ્યા ।
સાનૌ પ્રતિશૃતા સતી
તૃણં ભઙ્ધિ મા યવમ્ ॥

ઉશતી નામાસિ સલિન્દા નામ ।
અન્યામ્ આસાં ગચ્છ યં દ્વિષ્મસ્ તં ગચ્છ ॥

પરાચીમ્ અનુ સંવતં
પરાચીમ્ અનુ સંવિદં
પરાચ્ય્ અનુ નિ દ્રવ ।
ઇતસ્ ત્વા નાશયામસિ
બ્રહ્મણા વીર્યાવતા ॥

વાર્ ભવોદકં ભવ-
-ઉદકસ્યોદકં ભવ ।
ક્ષુદ્રાત્ ક્ષોદીયસી ભૂત્વા-
-અથેહ્ય્ અધમં તમઃ ॥

સ્યોના ભવ શિવા ભવ
શિવાચ્ છિવતરા ભવ ।
ફેનાન્ મૃદીયસી ભૂત્વા-
-ઇદં શસ્યમ્ ઉપા ચર ॥

નમસ્ તે અસ્તુ વિદ્યુતે સ્તનયિત્નવે ।
નમસ્ તે અગ્ને દૂરે હેતે કૃણ્મો
મા નો હિંસીર્ દ્વિપદો મા ચતુષ્પદઃ ॥

પ્રતિ ત્વા સહસાસહઃ
સહસા પ્રતિ રુધ્મસિ ।
ઐન્દ્રમ્ ઇદં સહો મહદ્
ભૂમ્યાસ્ તવં દિવિ શ્રિતમ્ ।
અફાલકૃષ્ટમ્ આ ક્રમ
મા ન ઇન્દ્ર યવં વધીઃ ॥

યાઃ સમુદ્રાદ્ ઉચ્ચરન્ત્ય્
ઉત્સેભ્યો યા નદીભ્યઃ ।
અત્યન્તઃ સર્પો વૈદ્યુતો
ઽશનિં યાવયાદ્ ઇતઃ ॥ અનુવાક 5 ।