Paippalāda-Saṃhitā · Chapter 15.1

samyan digbhyaḥ pavate saṃ svarvin
madhor ato mādhavaḥ pātv asmān |
agnir devo duṣṭarītur adābhya
idaṃ kṣatraṃ rakṣatu pātv asmān ||

rathantaraṃ sāmabhiḥ pātv asmān
gāyatreṇa cchandasā viśvarūpam |
dvādaśā iṣṭayā stomo ahnāṃ
samudro vāca idam ojaḥ pipartu ||

ugrā diśām abhibhūtir vayodhāḥ
śuciḥ śukre ahany ojasye |
indrādhipatiḥ pipṛtād ato no
mayi kṣatraṃ viśvato dhārayedam ||

bṛhad rāṣṭraṃ kṣatrabhṛd vṛddhavṛṣṇyaṃ
triṣṭubhaujaḥ śubhitam ugravīram |
indra stomaiḥ pañcadaśena varca
idaṃ vātena sagareṇa rakṣatu ||

prācī diśāṃ sahayaśā yaśasvatī
viśve devāḥ prāvṛṣāhnāṃ svarvatī |
idaṃ kṣatraṃ duṣṭaram astv ojo
anādhṛṣṭaṃ sahasvaṃ sahasvat ||

vairūpe sāmany aha tac chakeyaṃ
jagatyainad vikṣv ā veśayāmi |
viśve devāḥ saptadaśena vadyam
idaṃ kṣatraṃ salilāvatam ugram ||

dhatrī diśāṃ kṣatram idaṃ dādhartu -
-upasthāśānāṃ mitravad astv ojaḥ |
mitrāvaruṇā śaradāhnā cikitnū
asmai kṣatrāya mahi śarma yacchatam ||

vairāje sāmany adhi me manīṣā-
-anuṣṭubhā saṃbhṛtaṃ vīryaṃ sahaḥ |
idaṃ kṣatraṃ mitravad ārdradānv ojā
mitrāvaruṇā rakṣatam ādhipatye ||

samrāḍ diśāṃ sahasāmnī sahasvaty
ṛtur hemanto viṣṭhayā naḥ pipartu |
oṣajātāṃ bṛhatī ca śakvarī-
-imaṃ yajñam avatāṃ no ghṛtācī ||

svarvatī sudughā naḥ payasvatī
diśāṃ devy avatu no ghṛtācī |
tvaṃ gopāḥ puraetota paścād
bṛhaspate yāmyāṃ yuṅdhi vācam ||