Scripture Library

Paippalāda-Saṃhitā · Chapter 14.4

14.4.1

namo 'stu nīlaśikhaṇḍāya
sahasrākṣāya vājine |
atho ye asya satvānas
tebhyo 'ham akaraṃ namaḥ ||

14.4.2

namāṃsi ta āyudhāya-
-anātatāya dhṛṣṇave |
ubhābhyām akaraṃ namo
bāhubhyāṃ tava dhanvane ||

14.4.3

pra muñca dhanvanas pary
ubhayor ātnyor jyām |
yāś ca te hasta iṣavaḥ
parā tā bhagavo vapa ||

14.4.4

avatatya dhanus tvaṃ
sahasrākṣa śateṣudhe |
niśīrya śalyānāṃ mukhā
śivo naḥ śambhur ā cara ||

14.4.5

vijyaṃ dhanuḥ śikhaṇḍino
viśalyo bāṇavām̐ uta |
aneśann asyeṣavaḥ
śivo asya niṣaṅgatiḥ ||

14.4.6

pari te dhanvano hetir
asmān vṛṇaktu viśvataḥ |
atho ya iṣudhis tava-
-āre asmin ni dhehi tam ||

14.4.7

yā te hetir mīḍhuṣṭama
haste babhūva te dhanuḥ |
tayā tvaṃ viśvato asmān
ayakṣmayā pari bhuja ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0