Scripture Library

Paippalāda-Saṃhitā · Chapter 12.5

12.5.1

jāyasvāgne 'śvatthād
asmai kṣatrāyaujase |
ugra āpatikād adhi
yo vṛkṣām̐ adhirohati ||

12.5.2

vibādhaṃ cit sahamānaṃ
tvām agne janayāmasi |
jātāṃ janiṣyamāṇāṃ
sapatnān pra ṇudasva me ||

12.5.3

aśvatthasyārohasya
vṛkṣasyāraṇayaḥ kṛtāḥ |
tato jātāya te 'jani
vīḍujambhāgnir agnaye ||

12.5.4

taṃ jātaṃ jātavedasam
ā dadhāmy amartyam |
pāvakam agnim ūtaye
śucimantaṃ viṣāsahim ||

12.5.5

ut tanuṣva dhanuḥ prati muñcasva varma
jahi śatrūn vīryā te kṛṇomi |
atra radhyantu ya u te sapatnās
tvam ekavṛṣo bhava ||

12.5.6

vṛṣabhaṃ tvā sajātānāṃ
sapatnānāṃ viṣāsahim |
hantāraṃ śatrūṇāṃ kṛṇmo
virājaṃ gopatiṃ gavām ||

12.5.7

samudro 'sy apāṃ jyeṣṭha
indro deveṣu vṛtrahā |
vyāghraṃ siṃhaṃ tvā kṛṇmo
damitāraṃ pṛtanyatām ||

12.5.8

indra iva dasyūn adharān kṛṇuṣva-
-ugra iva vāto viśṛṇan sapatnān |
te śuṣyantv apa dāvād iva-
-agneḥ paryavīvarathā enān ||

12.5.9

saṃ vṛścaināṃs te śuṣyantu
vṛścainān mopajāṃ śiṣaḥ |
sapatnān sarvāṃs tṛḍhvā
tvam ekavṛṣo bhava ||

12.5.10

tvam ugras tvaṃ balī
tvam edhi vivācanam |
tvaṃ pṛtanyataḥ pūrvaḥ
sapatnām̐ ava dūnuṣva ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0