Paippalāda-Saṃhitā · Chapter 12.16

śaṃ na indrāgnī bhavatām avobhiḥ
śaṃ na indrāvaruṇā rātahavyā |
śam indrāsomā sa vitāya śaṃ yoḥ
śaṃ na indrāpūṣaṇā vājasātau ||

śaṃ no bhagaḥ śam u naḥ śaṃso astu
śaṃ naḥ purundhiḥ śam u santu rāyaḥ |
śaṃ naḥ satyasya sūyamasya śaṃsaḥ
śaṃ no aryamā purujāto astu ||

śaṃ no dhātā śam u dhartā no astu
śaṃ na urūcī bhavatu svadhābhiḥ |
śaṃ rodasī bṛhatī śaṃ no adriḥ
śaṃ no devānāṃ suhavāni santu ||

śaṃ no agnir jyotiranīko astu
śaṃ mitrāvaruṇāv aśvinā śam |
śaṃ naḥ sukṛtāṃ sukṛtāni santu
śaṃ na iṣiro abhi vātu vātaḥ ||

śaṃ no dyāvāpṛthivī pūrvahūtau
śam antarikṣaṃ dṛśaye no astu |
śaṃ na oṣadhīr vanino bhavantu
śaṃ no rajasaḥ patir astu jiṣṇuḥ ||

śaṃ na indro vasubhir devo astu
śam ādityebhir varuṇaḥ suśaṃsaḥ |
śaṃ no rudro rudrebhir jalāṣaḥ
śaṃ nas tvaṣṭā gnābhir iha śṛṇotu ||

śaṃ naḥ somo bhavatu brahma śaṃ naḥ
śaṃ no grāvāṇaḥ śam u santu yajñāḥ |
śaṃ naḥ svarūṇāṃ mitayo bhavantu
śaṃ naḥ prasvaḥ śam v astu vediḥ ||

śaṃ naḥ sūrya urucakṣā ud etu
śaṃ no bhavantu pradiśaś catasraḥ |
śaṃ naḥ parvatā dhruvayo bhavantu
śaṃ naḥ sindhavaḥ śam u santv āpaḥ ||

śaṃ no aditir bhavatu vratebhiḥ
śaṃ no bhavantu marutaḥ svarkāḥ |
śaṃ no viṣṇuḥ śam u pūṣā no astu
śaṃ no bhavitraṃ śam v astu vāyuḥ ||

śaṃ no devaḥ savitā trāyamānaḥ
śaṃ no bhavantūṣaso vibhātīḥ |
śaṃ naḥ parjanyo bhavatu prajābhyaḥ
śaṃ naḥ kṣetrasya patir astu śambhuḥ ||