Scripture Library

Paippalāda-Saṃhitā · Chapter 12.11

12.11.1

padepade kalpayanta
ādityāṅgiraso yajuḥ |
īḍānā anv āyan vaśān
tadaiḍaṃ sāmocyate ||

12.11.2

vaśeḍā vaśānumatir
vaśām āhuḥ sarasvatīm |
virājaṃ manyante vaśāṃ
vāg vaśā pṛthivī vaśā ||

12.11.3

vaśā deṣṭrī sinīvālī
vaśoṣā nirṛtir vaśā |
vaśāyāṃ mṛtyum aviśad
ā mṛtyum aviśad vaśā ||

12.11.4

agnir vāg udakaṃ cakṣur
mano vāto vaśī vaśā |
tanvaṃ ko asyās taṃ veda
yayodakrāmad ekayā ||

12.11.5

yāṃ cakṣuṣā manasā saṃvidānā
hṛdā paśyanti kavayo manīṣinaḥ |
tasyāḥ prajādhipatiḥ paśūnāṃ
vaśā rājñā nāṃtaveṣā sṛṣṭiḥ ||

12.11.6

ko vaśāyā ūdho veda
ka ulbaṃ ca jarāyu ca |
stanān asyāḥ ko veda
ka i tad veda yad duhe ||

12.11.7

aham asyā ūdho veda-
-aham ulbaṃ ca jarāyu ca |
stanān asyā ahaṃ veda-
-atho tad veda yad duhe ||

12.11.8

nainām̐ ahaṃ rakṣeyaṃ
dadyām eva syāc ca me |
stanā hy asyā ahaṃ veda
kṣīram ulbaṃ ca jarāyu ca ||

12.11.9

kṛttir yonir adhivāso jarāyu
pāṇḍam ulbaṃ nābhir uṣṇīṣam asyāḥ |
ā jarasaṃ dhayatu mātaraṃ vaśī
brahmabhiḥ kl̥ptaḥ sa hy asya bandhuḥ ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0