Paippalāda-Saṃhitā · Chapter 12.10

rūpam ekaḥ pary abhavad
rājā nāmaika ucyate |
patīrūpasyaiko rūpaṃ
rūpam ekaḥ sukṛtvanām ||

prajāpatiḥ parameṣṭhī
mṛtyur viśvānaraḥ svaḥ |
sarasvānasyā yajñasya
vaśāyā adhi jajñire ||

yasya gṛha ādāyeta
vaśā devakṛtaṃ haviḥ |
nidhānam asyā eṣyaṃ
duhitre patyām iva ||

nāsyāḥ sakṛd abhi tiṣṭhen
nāsya śloṇā gṛhe syāt |
vaśā kanyeva durmaṅkā-
-apacityā vijānatā ||

naināṃ rakṣed brāhmaṇebhyo
nāmā vi glāpayāti ca |
yatīṃ na pratyāvartayed
yasya goṣu vaśā syāt ||

nāsyā vaśām ā rundhed
devā manuṣyā uta |
vaśaṃ yad anvaid brahmaṇā
tasmād eṣābhavad vaśā ||

vaśaṃ kṛṇvānā vaśinīyam āgan
padaṃ kalyāṇy avapaśyamānā |
aniṣṭyeṣṭim abhijāyamānā
yajñasya mātrām abhikalpamānā ||

indravantas te marutas
turīyaṃ bhejire vaśe |
turīyam ādityā rudrās
turīyaṃ vasavo vaśe ||

turīya bhāja ādityān
vaśāyāḥ kavayo viduḥ |
athāsyāḥ pathyaikā tanuś
catasraś cakl̥pe diśaḥ ||

vaśā panthām anv apaśyan
nākapṛṣṭhaṃ svarvidām |
ādityā enām anv āyann
ṛṣayaś ca tapasvinaḥ ||