Paippalāda-Saṃhitā · Chapter 10.5

audumbareṇa maṇinā
puṣṭikāmāya vedhasā |
paśūnāṃ sarveṣāṃ sphātiṃ
goṣṭhe me savitā karat ||

yo no agnir gārhapatyaḥ
paśūnām adhipā asat |
audumbaro vṛṣā maṇiḥ
saṃ mā sṛjatu puṣṭyā ||

karīṣiṇīṃ phalavatīṃ
svadhām irāṃ ca no gṛhe |
audumbarasya tejasā
dhātā puṣṭiṃ dadhātu me ||

yad dvipāc ca catuṣpāc ca
yāny annāni ye rasāḥ |
gṛhṇe 'haṃ teṣāṃ bhūmānaṃ
bibhrad audumbaraṃ maṇim ||

puṣṭiṃ paśūnāṃ pari jagrabhāhaṃ
catuṣpadāṃ dvipadāṃ yac ca dhānyam |
payaḥ paśūnāṃ rasam oṣadhīnāṃ
bṛhaspatiḥ savitā me ni yacchāt ||

ahaṃ paśūnām adhipā asāni
mayi puṣṭaṃ puṣṭapatir dadhātu |
mahyam audumbaro maṇir
draviṇāni ni yacchatu ||

upa maudumbaro maṇiḥ
prajayā ca dhanena ca |
indreṇa jinvato maṇir
ā māgan saha varcasā ||

devo maṇiḥ sapatnahā
dhanasā dhanasātaye |
paśor annasya bhūmānāṃ
gavāṃ sphātiṃ ni yacchatu ||

yathāgre tvaṃ vanaspate
puṣṭyā saha jajñiṣe |
evā dhanasya me sphātim
ā dadhātu sarasvatī ||

ā me dhanaṃ sarasvatī
payasphātiṃ ca dhānyam |
sinīvāly utā vahād
ayaṃ caudumbaro maṇiḥ ||

tvaṃ maṇīnām adhipā vṛṣāsi
tvayi puṣṭaṃ puṣṭapatir jajāna |
tvayīme vājā draviṇāni sarvā-
-udumbara sa tvam asmat sahasva-
-ārād arātim amatiṃ kṣudhaṃ ca ||

grāmaṇīr asi grāmaṇīthyāyā
abhiṣikto abhi mā siñca varcasā |
tejo 'si tejo mayi dhārayādhi
rayir asi rayiṃ mayi dhehi ||

puṣṭir asi puṣṭyā mā sam aṅdhi
gṛhamedhī gṛhapatiṃ mā kṛṇu |
audumbara sa tvam asmāsu rayiṃ
sarvavīraṃ ni yaccha rāyaspoṣāya
prati muñce ahaṃ tvām ||

ayam audumbaro maṇir
vīro vīrāya badhyate |
sa naḥ sanīṃ madhumatīṃ kṛṇotu
rayiṃ ca naḥ sarvavīraṃ ni yacchāt ||