Padma Purana · Chapter 7.10

jaiminiruvāca-
māhātmyametadgaṅgāyāstvatprasādācchrutaṃ mayā /
idānīṃ śrotumicchāmi viṣṇupūjāphalaṃ guro

vyāsa uvāca-
śṛṇu lakṣmīpatervatsa saparyā phalamuttamam /
yacchrutvā mānavāḥ sarve labhaṃte jñānamuttamam

vipra dvādaśamāseṣu māghādiṣu sanātanaḥ /
pūjitavyo vidhānairyaiḥ śṛṇu tāni vadāmyaham

māghemāsi samāyāte sarvamāsottame śubhe /
āmiṣaṃ maithunaṃ caiva tyājayedvaiṣṇavottamaḥ

prātaḥsnāyī bhavennityaṃ tailānyapi ca varjayet /
dvirbhojanaṃ parānnaṃ ca māghemāsi parityajet

prātaḥ śuklāṃbaradharaḥ kṛtapaṃca mahādhvaraḥ /
saparyāmārabhedviṣṇoḥ sthiracitto hi mānavaḥ

īṣaduṣṇajalaiḥ śuddhaiḥ snāpayedviṣṇumavyayam /
atiślathaiścaṃdanaiśca viṣṇoraṅgāni lepayet

pūjayejjagadīśasya devadevasya cakriṇaḥ /
prakṣālitāni pātrāṇi jalahīnāni kārayet

snāpayitvā jagannāthamīṣaduṣṇena vāriṇā /
prokṣitavyaṃ taccharīraṃ divyavastreṇa yatnataḥ

salilairīṣaduṣṇaiśca prasnāpayati keśavam /
māghemāsi dvijaśreṣṭha phalaṃ tasya mayocyate

vimuktaḥ pātakaiḥ sarvairjanmajanmāṃtarārjitaiḥ /
iha bhuṃkte sukhaṃ sarvaṃ śeṣe yāti harergṛham

yatnātprakṣālya pātrāṇi kṛtvāśuddhānivāribhiḥ /
yaḥ pūjayejjagannāthaṃ tasya puṇyaṃ niśāmaya

iha bhuktvākhilānkāmānsarvavyādhivivarjitaḥ /
aṃte yugasahasrāṇi tiṣṭhetkeśavamaṃdiram

prabhāte viśvasaṃdhyāyāṃ purataścakrapāṇinaḥ /
jvalaṃtaṃ sthāpayedvahniṃ nirddhūmaṃ vaiṣṇavo janaḥ

śītasya vāraṇārthāya sāyaṃprātaśca vaiṣṇavaḥ /
māghe viṣṇvagrato vahniṃ jvālayettatphalaṃśṛṇu

iha bhuktvākhilānkāmānputrapautrasamanvitaḥ /
aṃte viṣṇupuraṃ yāti daivatairapi durllabham

yathaivātmā tathā viṣṇuḥ saṃdehonātra vidyate /
svapaṃtaṃ devadeveśaṃ paryaṃkopari keśavam

ātmanaḥ kurute martyo yathā śītanivāraṇam /
kṣīreṇa snāpayedyastu māghe māsi janārdanam /
tasmai devottamo viṣṇuḥ saṃtuṣṭo na dadāti kim

tathā śītakṣayaṃ kuryāddivyavastreṇa cakriṇaḥ

yaḥ pūjayetsakṛnmāghe snāpayitvā caturbhujam /
nālikerodakairdugdhaiḥ phalaṃ tasya vadāmyaham

narakābdhau majjamānāndustare svena karmaṇā /
uddhṛtya koṭipuruṣānsa yāti cakriṇaḥ padam

māghe māse ca śuklāyāṃ paṃcamyāṃ dvijasattama /
ekādaśyāṃ ca paṃcamyāṃ haripūjā viśeṣataḥ

dātavyo devadevāya sapadmāya murāraye /
pāyaso dhūpasahito māghemāsi dine dine

sadhūpapāyasaṃ yastu māghe yacchati cakriṇe /
tasya puṇyaphalaṃ vacmi śṛṇu vaiṣṇava jaimine

aṃte viṣṇupuraṃ gatvā manvaṃtaracatuṣṭayam /
bhuṃkte manoramānbhogānprasādāccakrapāṇinaḥ

punarāgatya dharaṇīṃ cakravartī nṛpo bhavet /
bhuṃkte ca bhogaṃ suciraṃ mṛto yāti harergṛham

paṃcamyāṃ vāpi saptamyāmekādaśyāṃ ca jaimine /
aśakto vaiṣṇavo dadyātparamānnaṃ murāraye

kṛṣṇapakṣāddivajaśreṣṭha śuklapakṣe viśeṣataḥ /
śuklapakṣe tithiṣveṣu dadyādannaṃ murāraye

ekāhamapi yo māghe viṣṇave daityajiṣṇave /
sapūpaṃpāyasaṃ dadyānna tasya durllabho hariḥ

yatkicciddivajatuṣṭyarthaṃ māghemāsi pradīyate /
tadakṣayaṃ bhavetpuṃsaḥ ko'pi nāstyatra saṃśayaḥ

māghe māsi kṛtaṃ karma śubhaṃ vāśubhameva vā /
tasya nāsti kṣayaṃ vipra manvaṃtaraśatairapi

māghe caṃpakapuṣpeṇa yo'rcayetkamalāpatim /
sa gacchetparamaṃ dhāma vimuktaḥ sarvapātakaiḥ

yāvaṃti svarṇapuṣpāṇi dīyaṃte cakrapāṇaye /
tāvadyugasahasrāṇi sthīyate viṣṇumaṃdiram

merutulyasuvarṇāni datvā bhavati yatphalam /
ekena svarṇapuṣpeṇa hariṃ saṃpūjya tatphalam

suvarṇapuṣpaṃ viprendra sarvadā keśavapriyam /
māghemāsi viśeṣeṇa pavitraṃ keśavapriyam

suvarṇakusumairdivyairyena nārādhito hariḥ /
ratnairhīnaḥ suvarṇādyaiḥ sa bhavejjanmajanmani

phalaṃ caṃpakapuṣpasya bravīmyahaṃ viśeṣataḥ /
ākarṇaya dvijaśreṣṭha setihāsamanuttamam

suvarṇo nāma bhūpālo balavānsarvaśāstravit /
āryāvarteṣu sarveṣu babhūva vipravarcasā

rājaśriyā vidyayā ca vayasā ca sa bhūpatiḥ /
atipramatto viprarṣe sadā pāparato'bhavat

pākhaṃḍamaṃtriṇāṃ vākyairvinādoṣairapi dvija /
dhanalobhāttena rājñā daṃḍyaṃte sādhavo janāḥ

anyāyopārjitaṃ vittaṃ gītavādyādibhirvṛtaḥ /
samastaṃ nāśayāmāsa yajñadānavivarjitaḥ

na jñātipoṣaṇaṃ cakre na devadvijabhojanam /
na ca yācakasaṃtuṣṭiṃ sarvadā pāpamohitaḥ

na cakārātitheḥ pūjāṃ sadā pāpaparāyaṇaḥ /
yayau ca maṃdirānnityaṃ sa bhūpaḥ pāpamaṃdiraḥ

kṛtāni tena pāpāni yānyanyānyavivekinām /
api varṣaśataiḥ śaktaḥ saṃkhyātuṃ janitāni kim

ekadā sa mahīpālaḥ kāmena parimohitaḥ /
jagāma veśyānilayaṃ niśīthe duritāśayaḥ

tamāyāṃtaṃ tato dṛṣṭvā bhūpālamujjvalāhvayā /
sahasotthāya paryaṃke cakre tatpādavaṃdanam

prakṣālya tatpādayugaṃ bhṛṃgārasalilaiśca sā /
maṃce niveśayāmāsa dorbhyāmāliṅgya taṃ nṛpam

tatpremāmṛtadhārābhiḥ sikto'sau pṛthivīpatiḥ /
tasminnuvāsa paryaṃke tayā saha kutūhalī

tataḥ sā gaṇikā prītyā hasaṃtī navayauvanā /
dadau caṃpakapuṣpāṇāṃ tasmai bhūmibhuje svayam

puṣpamālā puṣpamekaṃ tasmādbhūpati hastataḥ /
papāta dharaṇīpṛṣṭhe gandhavyāptadigaṃtaram ५०

taccyutaṃ kusumaṃ dṛṣṭvā sa rājā'tyatasaṃbhramāt /
namonārāyaṇāyeti jagādoṅkārapūrvakam

nārāyaṇāyeti vākyātsarvāṇi pātakāni ca /
svarṇapuṣpapradānena tasya naṣṭāni bhūbhujaḥ

grāmīṇā atha sarve'pi samāgatyātidurjaye /
tasyāmeva niśāyāṃ taṃ jaghnurveśyāgṛhe sthitam

netuṃ tamatha bhūpālaṃ sarvapātakināṃ varam /
kiṃkarānpreṣayāmāsa kruddho vaivasvato bhṛśam

tenājñaptāstato dūtāḥ pāśamudgarapāṇayaḥ /
ativegātsamāyātāḥ krodhasaṃraktalocanāḥ

udyamaṃ cakrire netuṃ yamadūtāḥ svamālayam /
tato nārāyaṇapreṣyāḥ śaṅkhacakragadādharāḥ

āyātā garuḍārūḍhāstaṃ netuṃ pṛthivīpatim /
pāśe niyaṃtritaṃ dṛṣṭvā taṃ bhūpaṃ viṣṇukiṃkarāḥ

jaghnuścakrairgadābhiśca yamadūtānmahābalāḥ /
samāropya rathe divye śaṃkhāndadhmuranuttamān

tathā rājā rathārūḍhastulasīmālyabhūṣitaḥ /
pītakauśeyavāsāśca svarṇālaṃkārabhūṣitaḥ

stūyamāno munigarṇairvedavedāṅgapāragaiḥ /
viṣṇudūtaiḥ parivṛto hareḥ sālokyamāyayau

athotthāya svayaṃ viṣṇuścaturbhirdīrghabāhubhiḥ /
tamāliṃgitavānbhūpaṃ proktavāṃśca dvijottama

śrībhagavānuvāca-
nṛpate kuśalaṃ brūhi sarvapuṇyātmanāṃ vara /
kimasti sādhyaṃ bhavatastadājñāpaya saṃprati

namonārāyaṇāyeti vāraikamapi yo vadet /
nityaṃ tasyānupālyo'haṃ sa me bhrātā sa me pitā

nārāyaṇeti mannāma kadācidyaḥ smerannaraḥ /
sādhayāmyakhilaṃ tasya pituḥ putra ivepsitam

bhakto'si nṛpatiśreṣṭha tasmānnijamanoratham /
prakāśayādbhutaṃ tāta kiṃ te dāsyāmi cādhunā

rājovāca-
sarvameva dayāsindho tvayā dattaṃ na saṃśayaḥ /
pāpināpi mayā prāptaṃ tava sthānaṃ sudurllabham

tasyānena tu vākyena prasannaḥ kamalāpatiḥ /
snehānniveśayāmāsa bhūpālaṃ tanniśāmaya

tataḥ suvarṇālaṃkārairviśvakarmavinirmitaiḥ /
cakāra maṇḍalaṃ tasya svayameva dayāmayā

atha nānāvidhairbhakṣyairdivyairapi sudurllabhaiḥ /
toṣitaḥ sa mahīpālo viṣṇunāti sahiṣṇunā

evaṃ pratidinaṃ tasthau sa rājā viṣṇumaṃdiram /
manvantarasahasrāṇi nava varṣa śatāni ca

prajānāṃ pālanaṃ cakre sa rājā dharmatatparaḥ /
pūjayāmāsa satataṃ bhaktyā paramayā hariḥ

cāru caṃpakapuṣpaiśca naivedyairvividhaiśca saḥ /
āyuḥśeṣe sa bhūpālo maraṇaṃ jāhnavī jale

samāsādya yayau mokṣaṃ prasādāccakrapāṇinaḥ /
vyāsa uvāca-
vipra caṃpakapuṣpasya prabhāvo'yaṃ prakīrtitaḥ

capaṃkairharimabhyarcya muktāḥ syuḥ pāpino janāḥ /
sphuṭacaṃpakapuṣpeṇa pūjito bhagavānhariḥ

acireṇaiva viprarṣe dadāti paramaṃ padam /
ye yajaṃti parātmānamicchayā vāpyanicchayā

te'pi yāṃti paraṃ dhāma vimuktāḥ sarvapātakaiḥ

harau prasanne duritāniko'pi yataḥ sa rājā kṛtapātako'pi /
jagāma mokṣaṃ kṛpayāmurārerviśvārṇavaṃ nimnamimaṃ vitīrya

divyaiḥ sugandhaiḥ kanakaprasūnairnārāyaṇaṃ padmadalāyatākṣam /
bhaktyā yajedyaḥ paramādareṇa martyo vrajettattu vihāya pāpam

iti śrīpadmapurāṇe kriyāyogasāre caṃpakapuṣpamahimānāma daśamo'dhyāyaḥ