Scripture Library

Padma Purana · Chapter 6.89

6.89.1

śrīkṛṣṇa uvāca-
tato guṇavatī śrutvā rakṣasā nihatāvubhau /
pitṛbhartajaduḥkhārttā karuṇaṃ paryadevayat

6.89.2

guṇavatyuvāca-
hā nātha hā pitastyaktvā gacchataṃ kva mayā vinā /
bālāhaṃ kiṃ karomyadya hyanāthā bhavatā vinā

6.89.3

ko nu māmāsthitāṃ gehe bhojanācchādanādibhiḥ /
akiṃcitkuśalāṃ snehātpālayiṣyati duḥkhitām

6.89.4

hatabhāgyā gatasukhā hateśā hatajīvitā /
śaraṇaṃ kaṃ vrajāmyadya tvannāthā batabāliśā

6.89.5

śrīkṛṣṇa uvāca-
evaṃ bahuvilapyātha kurarīva bhṛśāturā /
papāta bhūmau vikalā raṃbhā vātahatā yathā

6.89.6

cirādāśvasya sā bhūmau vilapya karuṇaṃ bahu /
nimagnā duḥkhajaladhau śokārttā samavarttata

6.89.7

sāgrahopaskarānsarvānvikrīya śubhakarmakṛt /
tayoścakre yathāśakti pāralaukika satkriyām

6.89.8

tasminneva pure vāsaṃ cakre prabhṛtijīvitam /
viṣṇubhaktiparā śāṃtā satyaśaucā jiteṃdriyā

6.89.9

vratadvayaṃ tayā samyagājanma maraṇātkṛtam /
ekādaśīvrataṃ samyaksevanaṃ kārttikasya ca

6.89.10

etadvratadvayaṃ kāṃte mamātīva priyaṃkaram /
bhuktimuktikaraṃ samyakputrasaṃpattikārakam

6.89.11

kārtike māsi ye nityaṃ tulāsaṃsthe divākare /
prātaḥ snāsyaṃti te muktā mahāpātakino'pi ca

6.89.12

saṃmārjanaṃ gṛhe viṣṇoḥ svastikādi nivedanam /
viṣṇupūjāṃ prakurvaṃti jīvanmuktāśca te narāḥ

6.89.13

snānaṃ jāgaraṇaṃ dīpaṃ tulasīvanasevanam /
kārttike ye prakurvaṃti te narā viṣṇumūrttayaḥ

6.89.14

itthaṃ dinatrayamapi kārtike ye prakurvate /
devānāmapi te vaṃdyāḥ kiṃ yairājanmataḥ kṛtam

6.89.15

itthaṃ guṇavatī samyakpratyabdaṃ pratinīyate /
nityaṃ viṣṇoḥ parikare bhaktā tatparamānasā

6.89.16

kadācijjarasā sātha kṛśāṃgī jvarapīḍitā /
snātuṃ gaṃgāṃ gatā kāṃte kathaṃcicchanakaistathā

6.89.17

yāvajjalāṃtaragatā kaṃpitā śītapīḍitā /
tāvatsā vihvalā paśyadvimānaṃ prāptamaṃbarāt

6.89.18

śaṃkhacakragadāpadmahastairāsannamaṃbarāt /
viṣṇurūpadharaiḥ samyagvainateyadhvajāṃkitaiḥ

6.89.19

ārohayanvimānaṃ tamapsarogaṇasevitam /
cāmarairvījyamānāṃ tāṃ vaikuṃṭhamanayangaṇāḥ

6.89.20

atha sā tadvimānasthā jvaladagniśikhopamā /
kārttikavratapuṇyena matsānnidhyagatābhavat

6.89.21

atha brahmādidevānāṃ yathā prārthanayā bhuvam /
āgacchatā gaṇāḥ sarve yātāste'pi mayā saha

6.89.22

etepi yādavāḥ sarve madgaṇā eva bhāmini /
pitā te devaśarmābhūtsatrājidadhipo hyayam

6.89.23

yaścaṃdraśarmā so'krūrastvaṃ sā guṇavatī śubhe /
kārttikavratapuṇyena bahumatprītivarddhanī

6.89.24

mama dvāre tvayā pūrvaṃ tulasīvāṭikā kṛtā /
tasmādayaṃ kalpavṛkṣastavāṃgaṇataḥ śubhe

6.89.25

kārtike dīpamānaṃ ca yattvayā tu kṛtaṃ purā /
tvaddehagehasaṃstheyaṃ tasmāllakṣmī sthirābhavat

6.89.26

yacca vratādikaṃ sarvaṃ viṣṇave bhartṛrūpiṇe /
niveditavatī tasmānmama bhāryātvamāgatā

6.89.27

ājanmamaraṇātpūrvaṃ kārttike yadvrataṃ kṛtam /
kadācidapi tenaiva madviyogaṃ na paśyasi

6.89.28

evaṃ ye kārttike māsi narā vrataparāyaṇāḥ /
matsānnidhyaṃ gatāste'pi prītidā tvaṃ yathā mama

6.89.29

yajñadānavratatapaḥ kāriṇo mānavāḥ khalu /
kārttikavratapuṇyasya nāpnuvaṃti kalāmapi

6.89.30

itthaṃ niśamya bhuvanādhipatestadānīṃ prākpuṇyajanmabhava vaibhava jātaharṣā /
viśveśvaraṃ tribhuvanaikanidānabhūtaṃ kṛṣṇaṃpraṇamya vacanaṃ nijagāda satyā

6.89.89

iti śrīpādmemahāpurāṇe paṃcapaṃcāśatsahasrasaṃhitāyāṃ kārttikamāhātmye śrīkṛṣṇasatyabhāmāsaṃvāde satyāpūrvajanmavarṇanaṃnāmaikonanavatitamo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0