Padma Purana · Chapter 6.77

mahādeva uvāca-
papracchāhaṃ jagannāthaṃ vratānāmuttamaṃ vratam /
putrapautravivṛddhyarthaṃ sukhasaubhāgyadāyakam

tavāgre saṃpravakṣyāmi śṛṇu suṃdari sāṃpratam /
idaṃ kathānakaṃ divyamṛṣīṇāṃ vratamuttamam

rajasvalā tu yā nārī sahasā pāparūpiṇī /
kṛtena ca vratenaiva mahāpāpaiḥ pramucyate /
pitṝṇāmakṣayaṃ deyaṃ dharmakāmārthasādhanam

śrīviṣṇuruvāca-
pūrvamāsīnmahābāhurbrāhmaṇo vedapāragaḥ /
sadādhyayanaśīlastu devaśarmā iti dvijaḥ

agnihotrakriyāyuktaḥ ṣaṭkarmanirataḥ sadā /
sarvavarṇeṣu saṃpūjyaḥ saputrapaśubāṃdhavaḥ

tasya brāhmaṇamukhyasya bhagnā ca gṛhavāhinī /
prāpte bhādrapade māse śuklapakṣe tu paṃcamī

pituḥkṣayāhaṃ kurute yatātmā ca jiteṃdriyaḥ /
rātrau nimaṃtrayedviprānsukhasaubhāgyadāyakān

prabhāte vimale prāpte bhāṃḍānyanyāni kārayet /
pākaṃ sarveṣu pātreṣu sa kārayati jāyayā

aṣṭādaśarasopetaṃ pitṝṇāṃ prītidāyakam /
ākāraṇaṃ tato dattvā viprāṇāṃ ca pṛthakpṛthak

sarve viprāstu saṃprāptā madhyāhne vedapāṭhakāḥ /
arghapādyādi vidhivatkṛtavāndvijasattamaḥ

rajasā dūṣitaḥ śrāddhe prakṣālya vidhivattadā /
gṛhamadhye gatāḥ sarve āsane te nirūpitāḥ

pradattaṃ bhojanaṃ tena miṣṭānnena viśeṣataḥ /
vidhinā ca kṛtaṃ śrāddhaṃ piṃḍadānaprapūrvakam

tāṃbūlaṃ dakṣiṇāṃ caiva vastrāṇi vividhāni ca /
sarvaṃ dadau dvijebhyo vai pitṛdhyānaparāyaṇaḥ

viprā visarjitāḥ sarve āśīrvādaparāyaṇāḥ /
gotriṇāṃ bāṃdhavānāṃ ca anyeṣāṃ ca bubhukṣatām

dattamannaṃ tadā tena bhojane vidhipūrvakam /
niśāyāṃ tu kuṭīdvāre upaviṣṭo yadā tadā

brāhmaṇyā vāri saṃgṛhya pādaprakṣālanaṃ kṛtam /
tadā śunī balīvardau parasparamabhāṣatām

śṛṇu kāṃta vaco mahyaṃ yādṛkkṛtavatī vadhūḥ /
tādṛśaṃ saṃpravakṣyāmi nānyathā prabravīmyaham

kadāciddaivayogena gatāhaṃ putrasadmani /
tatrasthitaṃ payaḥ pātuṃ vadhvā dṛṣṭaṃ na tatpunaḥ

pītaṃ payastu sarpeṇa taddṛṣṭaṃ tu mayā punaḥ /
paścātpītaṃ mayā samyakdṛṣṭaṃ vadhvā tadā punaḥ

tena saṃparkadoṣeṇakaṭirbhagnā ca me sadā /
tena duḥkhena bho svāminjātāhaṃ duḥkhabhāginī /
bhagnā kaṭiśca saṃjātā hyāhāro naiva rocate

balīvardda uvāca-
śṛṇu tvaṃ śuni vakṣyāmi mama duḥkhasya kāraṇam /
asminvai divase prāpte brāhmaṇānāṃ tu bhojanam

kāritaṃ mama putreṇa mama ciṃtā tu no kṛtā /
nodakaṃ na tṛṇaṃ caiva na dattaṃ kenacitkvacit

anāhārohyahaṃ pāpī baddho'sminpāpabhāvitaḥ /
pūrvapāpaviśeṣeṇa jātaṃ śuni na saṃśayaḥ

tadvākyaṃ tu tadā devi śrutaṃ putreṇa dhīmatā /
mamāyaṃ tu pitā sākṣājjāto mama gṛhe paśuḥ

iyaṃ tu jananī sākṣānmama caiva na saṃśayaḥ /
daivayogācchunī jātā kiṃ karomi suniścayam

evaṃ vicāryāsau vipro naiva nidrāmavāpa saḥ /
rātrau ciṃtāparo bhūtvā smaranviśveśvaraṃ param

nānādharmaparo'haṃ ca mamaivaṃ ca kathaṃ śubham /
vicārayitvā ca tato rātrau suptastadā punaḥ

prabhāte vimale prāpte ṛṣīṇāṃ purato gataḥ /
teṣāṃ madhye vasiṣṭhena tasya susvāgataṃ kṛtam

brūhi tvaṃ brāhmaṇaśreṣṭha tavāgamanakāraṇam /
iti pṛṣṭastadā vipraḥ praṇāmamakarottadā

adya me saphalaṃ janma adya me saphalā kriyā /
adya me pitarastṛptā durlabhāttava darśanāt

yathoktaṃ ca kṛtaṃ śrāddhaṃ dvijāścaiva subhojitāḥ /
kuṭuṃbināṃ tu sarveṣāṃ bhojanaṃ kāritaṃ tathā

bhojanānaṃtaraṃ prāptā śunī tatra uvāca ha /
asmākaṃ tu gṛhe hyeko balīvardastu varttate

taṃ patiṃ prativākyaṃ yaddivaja mattaḥ śṛṇuṣva tat /
gṛhesthitaṃ dugdhabhāṃḍamahinā dūṣitaṃ mayā

dṛṣṭaṃ me mahatī ciṃtā tadā jātā na saṃśayaḥ /
anena payasā caiva pakvamannaṃ yadā bhavet

tadātra sarve viprāśca mriyaṃte bhojanāttataḥ /
evaṃ vicārya tatsvāmindugdhaṃ pītaṃ tadā mayā

tadā dṛṣṭaṃ tu vadhvā vai tayā me tāḍanaṃ kṛtam /
carāmi tena saṃbhagnā kiṃ karomi suduḥkhitā

tasyā duḥkhaṃ tu saṃsmṛtya vṛṣaḥ prāha śunīṃ prati /
śṛṇu śuni pravakṣyāmi mama duḥkhasya kāraṇam

asyāhaṃ tu pitā sākṣātpūrvajanmani vai śuni /
adya vai bhojitā viprā dattamannaṃ tu bhūriśaḥ

na tṛṇaṃ nodakaṃ caiva mamāgre saṃniveditam /
tena duḥkhena me duḥkhaṃ jātaṃ bahutaraṃ tadā

etatkathānakaṃ śrutvā rātrau nidrāmavāpa na /
mama ciṃtā tu tatraiva jātā vai ṛṣisattama

vedādhyayanaśīlo'haṃ kuśalo vedakarmaṇi /
anayośca mahadduḥkhaṃ kiṃ karomīti ciṃtayan /
āgatastvatsamīpe tu mamakaṣṭaṃ nivāraya

ṛṣiruvāca-
ugrajanmanśṛṇuṣva tvaṃ pūrvajanmani yatkṛtam /
ayaṃ vai tu dvijaśreṣṭho kuṃḍane nagare śubhe

māse bhādrapade caiva paṃcamī yā samāgatā /
tadvrataṃ tena nājñātaṃ pituḥ śrāddhādikāraṇāt

strīdharmeṇa tu saṃprāptā kṣayahetu tadānagha /
tayā caiva kṛtaṃ sarvaṃ brāhmaṇānāṃ ca bhojanam

na jñātaṃ ca kṛtaṃ tena pāpiṣṭhena durātmanā /
prathame'hani cāṃḍālī dvitīye brahmaghātinī

tṛtīye rajakī proktā caturthe'hani śudhyati /
tena pāpena sā jātā śunī svagṛhacāriṇī /
balīvardastvayaṃ jātaḥ karmaṇānena suvrata

ugrajanmovāca-
vrataṃ dānaṃ tathā yajñaṃ tīrthaṃ vāmamasuvrata /
brūhi yena viśeṣeṇa muktiḥ pitrorbhavenmama

ṛṣiruvāca-
māse bhādrapade śukle jāyate ṛṣipaṃcamī /
rajasā vikṛtaṃ pāpaṃ naśyate karaṇādyataḥ

putrapautrapradātrī ca pitṝṇāṃ muktidāyinī /
nadyā kūpe taḍāge vā brāhmaṇasya gṛhe tathā

gomayaṃ maṃḍalaṃ kuryātkuṃbhaṃ tatraiva vinyaset /
tasyopari nyasetpātramṛṣidhānyena pūritam

yajñopavītasūtraṃ ca sahiraṇyaṃ phalaṃ tathā /
sthāpyāśca ṛṣayaḥ sapta sukhasaubhāgyadāyakāḥ

āvāhayitvā te sarve pūjanīyā vratasthitaiḥ /
naivedyamṛṣidhānyaṃ ca ṛṣidhānyaṃ tu bhojanam

ekabhaktena kartavyamṛṣīṇāmarcanaṃ tadā /
pūjayetparayā bhaktyā maṃtreṇa vidhipūrvakam

nirvāpaṃ saghṛtaṃ deyaṃ dakṣiṇāsaṃyutaṃ tadā /
deyaṃ viprāya vidhivadṛṣīṇāṃ prīyatāṃ prati

kathāṃ śrutvā vidhānena kṛtvā caiva pradakṣiṇām /
dhūpaṃ dīpaṃ ca naivedyamarghyaṃ dadyātpṛthakpṛthak

ṛṣayaḥ saṃtu me nityaṃ vratasaṃpūrṇakāriṇaḥ /
pūjāṃ gṛhṇaṃtu maddattāṃ ṛṣibhyo'stu namonamaḥ

pulastyaḥ pulahaścaiva kratuḥ prācetasastathā /
vasiṣṭhamaricātreyā arghaṃ gṛhṇaṃtu vo namaḥ

evaṃ pūjā prakarttavyā dhūpairdīpairmanoramaiḥ /
pitṝṇāṃ jāyate muktiḥ kṛtasyāsya prabhāvataḥ

pūrvakarmavipākena rajasā doṣabhāvataḥ /
kṛtaṃ hyevaṃ tu bho vatsa muktistasya na saṃśayaḥ

tadvrataṃ ca kṛtaṃ tena muktyarthaṃ pitṛhetave /
te gatā muktimārgeṇa āśīrvādaparāyaṇāḥ

ṛṣipaṃcamīvrataṃ puṇyaṃ viprāya parikīrtitam /
ye kurvaṃti naraśreṣṭhāste jñeyāḥ puṇyabhāginaḥ

ye kurvaṃti naraśreṣṭha ṛṣivratamanuttamam /
bhuktvātra bhogānvipulānyāṃti viṣṇoḥ padaṃ tu te

itiśrīpādmemahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatinārada/
saṃvāde ṛṣipaṃcamīvrataṃnāma saptasaptatitamo'dhyāyaḥ