Padma Purana · Chapter 6.70

nārada uvāca-
devadeva jagannātha bhuktimuktipradāyaka /
kathayasva suraśreṣṭha yena duḥkhaṃ na paśyati

maheśa uvāca-
śṛṇu vāḍava vakṣyāmi trirātraṃ saritaḥ śubham /
yena cīrṇena narako mānavānāṃ na jāyate

āyurārogyamatulaṃ saubhāgyaṃ sukhasaṃpadam /
saṃtānaṃ cākṣayaṃ prāpya svargaloke mahīyate

āṣāḍhamāsi saṃprāpte nadīpūreṇa saṃyutā /
satataṃ toyasaṃsthāne purāṇe sā ca viśrutā

varṣartau ghanasaṃpūrṇe kartavyā sā vratena vā /
toyoghaiḥ paripūrṇā sā sakalaiḥ syānnadī yadā

vrataṃ trirātramuddiśya tadā kāryaṃ prayatnataḥ /
kṛtaṃ pratipadā chaṃdaḥ darśanaṃ tu dinatrayam

yathāprāptaṃ nadīpūraṃ strībhistīrajalasya tu /
athavā tajjalaṃ kuṃbhe kṛṣṇe kṛtvā gṛhaṃ nayet

prātaḥsnāyī tathā nadyāṃ gatvā abhyarcayetsudhīḥ /
trirātrasyopavāsasya yathāśakto bhaveddivaja

aśaktaścaikabhaktena kuryāccaivāpyupoṣaṇam /
dīpaṃ dadyādavichinnaṃ prātaḥsāyaṃ ca pūjanam

mahānadīṃ samuccārya nāmnā ca varuṇaṃ tathā /
jalamūle tu saṃsthāpya keśavaṃ jalaśāyinam

namo devyai ca gaṃgeti gautamīti nadīti ca /
siṃdho caiva ca kāveri sarasvati namo'stu te

tāpī payoṣṇī pūrṇeti maheṃdrasukhadeti ca /
kāśyapī gaṃḍakī caiva siṃdhunadyai namonamaḥ

varuṇāya namaste'stu jalavāsaharipriya /
yādonātha raseśāna kalyāṇaṃ dehi me sadā

gṛhāṇārghaṃ mayā dattaṃ dehi me vāṃchitaṃ phalam /
kūṣmāṃḍairnālikeraiśca phalaiḥ kālodbhavaiḥ śubhaiḥ

naivedyaṃ ghṛtapakvaṃ tu saritaḥ saṃprakalpayet /
namaste keśavānaṃta jalaśāyinnamo'stu te

paripālaya māmīśa goviṃdavarado bhava /
evaṃ pūjā prakartavyā yathākālaṃ krameṇa tu

prārthanā copacāraistu trirātraniyamaḥ śuciḥ /
pāraṇena tu saṃpūjya jalapātraṃ samācaret

phalapuṣpaistathā vidvanstrībhirbālairnarairapi /
gītavāditrasahitairnadī kuṃbha pariplutaiḥ

jalejale samāsthāpya phalapuṣpaiḥ prapūjayet /
dhānyairnānāvidhaiścaiva jalaprakṣepaṇairapi

hāsyairgītaiśca nṛtyaiśca gṛhamāgatya yatnataḥ /
saptadhānyaiḥ pūritāni vaṃśapātrāṇi pūjayet

sapta vā paṃca vā trīṇi yathāśaktyā prapūrayet /
trirātraṃ ca nadītoyaṃ na pibeddhitamullasan

pāraṇe tu haviṣyānnaṃ hṛtaṃ vā hyanyathā bhavet /
kṛte snānārcane caiva nopayojyaṃ nadījalam

śucyannāni ca bhojyāni dāpayattritayaṃ tathā /
saptaiva vaṃśapātrāṇi sapta vai maṇikāstathā

haviṣyānnaṃ ca bhuṃjīta kaṭvamlamadhuvarjitam /
māṣānnaṃ ca śilāpiṣṭaṃ yatnena parivarjayet

evaṃ varṣatrayaṃ kuryādvratametaddivajottama /
varṣatraye samāpyaivaṃ tasyodyāpanamācaret

kṛṣṇāṃ gāṃ kṛṣṇavastrāṃ ca tilāndadyācca nārada /
daṃpatī paridāpyaivaṃ suvarṇaṃ cāpi śaktitaḥ

haimaṃ ca varuṇaṃ kuryānnadīrūpeṇa nārada /
maṃḍalaṃ vāruṇaṃ caiva sarvatobhadrameva ca

kuṃbhaṃ tatra pratiṣṭhāpya sopahāraṃ pratiṣṭhitam /
saṃpūjya vidhivadbhaktyā tato viprāya dāpayet

brāhmaṇānbhojayecchaktyā yathāvittānusārataḥ /
guravercitaśīlāya sarvaśāstraratāya ca

evaṃ kṛte tadā vidvanparipūrṇaṃ vrataṃ bhavet /
saubhāgyasukhasaṃpattiḥ saṃtatiścākṣayā bhavet

na durgatimavāpnoti ciraṃ svarge mahīyate /
devapatnībhirācīrṇamṛṣipatnībhireva ca

nāgasiddhāṃganābhiśca vratametatpurā kṛtam /
nadītrirātramatulaṃ kimanyacchrotumicchasi /
saubhāgyaṃ saṃtatiṃ caiva niścayaṃ prāpnute sadā

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde nadītrirātravrataṃ nāma saptatitamo'dhyāyaḥ