Padma Purana · Chapter 6.67

maheśvara uvāca-
iti śrutaṃ dharmamukhānmudgalo dvijasattamaḥ /
kathayitvā mamāgre vai gato yādṛcchiko mune

gopikācaṃdanaṃ yatra tiṣṭhate vai dvijottama /
tadgṛhaṃ tīrtharūpaṃ ca viṣṇunā bhāṣitaṃ kila

śokamohau na tatrāstāṃ na bhavatyaśubhaṃ kvacit /
gopikācaṃdanaṃ yasya tiṣṭhati dvijasadmani

sukhinaḥ pūrvajāsteṣāṃ saṃtatirvarddhate sadā /
gopikācaṃdanaṃ yasya varttate'harniśaṃ gṛhe

gopīpuṣkarajā mṛtsnā pavitrā kāyaśodhinī /
udvarttanādvinaśyaṃti vyādhayo hyādhayaśca ye

ato dehe dhṛtaṃ puṃbhirmuktidaṃ sarvakāmikam /
tāvadgarjaṃti tīrthāni tāvatkṣetrāṇi sarvadā

gopikācaṃdanaṃ yāvanna dṛṣṭaṃ na śrutaṃ dvija /
idaṃ dhyeyamidaṃ pūjyaṃ maladoṣavināśanam

yasya saṃsparśanādeva pūto bhavati mānavaḥ /
aṃtakāle tu martyānāṃ muktidaṃ pāvanaṃ param

kiṃ vadāmi dvijaśreṣṭha muktidaṃ gopicaṃdanam /
viṣṇostu tulasīkāṣṭhaṃ tathā vai mūlamṛttikā

gopikācaṃdanaṃ caiva tathā vai haricaṃdanam /
catvāri hyetāni saṃmīlya aṃgamudvartayetsudhīḥ

tena tīrthaṃ kṛtaṃ sarvaṃ jaṃbūdvīpeṣu sarvadā /
tilakaṃ kurute yastu gopikācaṃdanadravaiḥ

sarvapāpavinirmukto yāti viṣṇoḥ paraṃ padam /
pituḥ śrāddhādikaṃ tena gayāṃ gatvā tu vai kṛtam

yena vā puruṣeṇāpi vidhṛtaṃ gopicaṃdanam /
madyapo brahmahā caiva goghno vā bālahā tathā /
mucyate tatkṣaṇādeva gopīcaṃdanadhāraṇāt

iti śrīpādme mahāpurāṇe paṃcapaṃcāśatsāhasryāṃ saṃhitāyāmumāpatināradasaṃvāde gopīcaṃdanamāhātmye saptaṣaṣṭitamo'dhyāyaḥ