પદ્મ પુરાણ · અધ્યાય 6.67

મહેશ્વર ઉવાચ-
ઇતિ શ્રુતં ધર્મમુખાન્મુદ્ગલો દ્વિજસત્તમઃ ।
કથયિત્વા મમાગ્રે વૈ ગતો યાદૃચ્છિકો મુને

ગોપિકાચંદનં યત્ર તિષ્ઠતે વૈ દ્વિજોત્તમ ।
તદ્ગૃહં તીર્થરૂપં ચ વિષ્ણુના ભાષિતં કિલ

શોકમોહૌ ન તત્રાસ્તાં ન ભવત્યશુભં ક્વચિત્ ।
ગોપિકાચંદનં યસ્ય તિષ્ઠતિ દ્વિજસદ્મનિ

સુખિનઃ પૂર્વજાસ્તેષાં સંતતિર્વર્દ્ધતે સદા ।
ગોપિકાચંદનં યસ્ય વર્ત્તતેઽહર્નિશં ગૃહે

ગોપીપુષ્કરજા મૃત્સ્ના પવિત્રા કાયશોધિની ।
ઉદ્વર્ત્તનાદ્વિનશ્યંતિ વ્યાધયો હ્યાધયશ્ચ યે

અતો દેહે ધૃતં પુંભિર્મુક્તિદં સર્વકામિકમ્ ।
તાવદ્ગર્જંતિ તીર્થાનિ તાવત્ક્ષેત્રાણિ સર્વદા

ગોપિકાચંદનં યાવન્ન દૃષ્ટં ન શ્રુતં દ્વિજ ।
ઇદં ધ્યેયમિદં પૂજ્યં મલદોષવિનાશનમ્

યસ્ય સંસ્પર્શનાદેવ પૂતો ભવતિ માનવઃ ।
અંતકાલે તુ મર્ત્યાનાં મુક્તિદં પાવનં પરમ્

કિં વદામિ દ્વિજશ્રેષ્ઠ મુક્તિદં ગોપિચંદનમ્ ।
વિષ્ણોસ્તુ તુલસીકાષ્ઠં તથા વૈ મૂલમૃત્તિકા

ગોપિકાચંદનં ચૈવ તથા વૈ હરિચંદનમ્ ।
ચત્વારિ હ્યેતાનિ સંમીલ્ય અંગમુદ્વર્તયેત્સુધીઃ

તેન તીર્થં કૃતં સર્વં જંબૂદ્વીપેષુ સર્વદા ।
તિલકં કુરુતે યસ્તુ ગોપિકાચંદનદ્રવૈઃ

સર્વપાપવિનિર્મુક્તો યાતિ વિષ્ણોઃ પરં પદમ્ ।
પિતુઃ શ્રાદ્ધાદિકં તેન ગયાં ગત્વા તુ વૈ કૃતમ્

યેન વા પુરુષેણાપિ વિધૃતં ગોપિચંદનમ્ ।
મદ્યપો બ્રહ્મહા ચૈવ ગોઘ્નો વા બાલહા તથા ।
મુચ્યતે તત્ક્ષણાદેવ ગોપીચંદનધારણાત્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુમાપતિનારદસંવાદે ગોપીચંદનમાહાત્મ્યે સપ્તષષ્ટિતમોઽધ્યાયઃ