Scripture Library

Padma Purana · Chapter 6.52

6.52.1

yudhiṣṭhirauvāca-
āṣāḍhakṛṣṇapakṣe tu kiṃ vai ekādaśī bhavet /
kathayasva prasādena vāsudeva mamāgrataḥ

6.52.2

śrīkṛṣṇa uvāca-
vratānāmuttamaṃ rājankathayāmi tavāgrataḥ /
sarvapāpakṣayakaraṃ sarvamuktipradāyakam

6.52.3

āṣāḍhasyāsite pakṣe yoginī nāma nāmataḥ /
ekādaśī nṛpaśreṣṭha mahāpātakanāśinī

6.52.4

saṃsārārṇavamagnānāṃ potabhūtā sanātanī /
jagattraye sārabhūtā yoginī vratakāriṇām

6.52.5

kathayāmi tavāgre'haṃ kathāṃ paurāṇikīṃ śubhām /
alakāyāṃ rājarājaḥ śivabhaktiparāyaṇaḥ

6.52.6

tasyāsītpuṣpabaṭuko hemamālīti nāmataḥ /
tasya patnī surūpā ca viśālākṣīti nāmataḥ

6.52.7

sa tasyāṃ cāsaktamanā kāmapāśavaśaṃ gataḥ /
mānasātpuṣpanicayamānīya svagṛhe sthitaḥ

6.52.8

patnīpremarasāsakto na kuberālayaṃ gataḥ /
kubero devasadane karoti śivapūjanam

6.52.9

madhyāhnasamaye rājanpuṣpāgamasamīkṣakaḥ /
hemamālī svabhavane ramate kāṃtayā saha

6.52.10

yakṣarāṭpratyuvācātha kālātikramakopitaḥ /
kasmānnāyāti bho yakṣā hemamālī durātmavān /
niścayaḥ kriyatāmasya ityuvāca punaḥ punaḥ

6.52.11

yakṣā ūcuḥ -
vanitākāmuko gehe ramate svecchayā nṛpa /
teṣāṃ vākyaṃ samākarṇya kuberaḥ kopapūritaḥ

6.52.12

āhvayāmāsa taṃ tūrṇaṃ baṭukaṃ hemamālinam /
jñātvā kālātyayaṃ so'pi bhayavyākulalocanaḥ

6.52.13

asnāta eva āgatya kuberasyāgrataḥ sthitaḥ /
taṃ dṛṣṭvā dhanadaḥ kruddhaḥ krodhasaṃraktalocanaḥ

6.52.14

pratyuvāca ruṣāviṣṭaḥ kopaprasphuritādharaḥ /
dhanada uvāca-
āḥ pāpa duṣṭa durvṛtta kṛtavāndevahelanam

6.52.15

aṣṭādaśakuṣṭhavṛto viyuktaḥ kāṃtayā tayā /
asmātsthānādapadhvasto gaccha svapnamathādhama

6.52.16

ityukte vacane tasya tasmātsthānātpapāta saḥ /
mahāduḥkhābhibhūtaśca kuṣṭhaiḥ pīḍitavigrahaḥ

6.52.17

na sukhaṃ divase tasya na nidrāṃ labhate niśi /
chāyāyāṃ pīḍitatanurnidāghe'tyaṃtapīḍitaḥ

6.52.18

śivapūjāprabhāvena smṛtistasya na lupyate /
pātakenābhibhūto'pi pūrvaṃ karma smaratyasau

6.52.19

bhramamāṇastato gacchanhimādriṃ parvatottamam /
tatrāpaśyanmunivaraṃ mārkaṃḍeyaṃ taponidhim

6.52.20

yasyāyurvidyate rājanbrahmaṇo vayasā samam /
vavaṃde caraṇau tasya dūrataḥ pāpakarmakṛt

6.52.21

mārkaṃḍeyo munivaro dṛṣṭvā taṃ kaṃpitaṃ tathā /
paropakaraṇārthāya samāhūyedamabravīt

6.52.22

kasmātkuṣṭhābhibhūtastvaṃ kuto niṃdyataro hyasi /
ityuktaḥ sa pratyuvāca mārkaṃḍeyaṃ mahāmunim

6.52.23

hemamālyuvāca-
rājarājasyānucaro hemamālīti nāmataḥ /
mānasātpadmanicayamānīya pratyahaṃ mune

6.52.24

śivapūjanavelāyāṃ kuberāya samarpaye /
ekasmindivase caiva kālaścāvidito mayā

6.52.25

patnīsaukhyaprasaktena śokavyākulacetasā /
tataḥ kruddhena śapto'smi rājarājena vai mune

6.52.26

kuṣṭhābhibhūtaḥ saṃjāto viyuktaḥ kāṃtayā tayā /
adhunā tava sānnidhyaṃ prāpto'smi śubhakarmaṇā

6.52.27

satāṃ svabhāvataścittaṃ paropakaraṇe kṣamam /
iti jñātvā muniśreṣṭha māṃ praśādhi kṛtāgasam

6.52.28

mārkaṃḍeya uvāca-
tvayā satyamiha proktaṃ nāsatyaṃ bhāṣitaṃ yataḥ /
ato vratopadeśaṃ te kathayāmi śubhapradam

6.52.29

āṣāḍhe kṛṣṇapakṣe tu yoginīvratamācara /
asya vratasya puṇyena kuṣṭhaṃ yāsyati vai dhruvam

6.52.30

iti vākyamṛṣeḥ śrutvā daṃḍavatpatito bhuvi /
utthāpitaḥ sa muninā babhūvātīva harṣitaḥ

6.52.31

mārkaṃḍeyopadeśena vrataṃ tena kṛtaṃ yathā /
aṣṭādaśeva kuṣṭhāni gatāni tasya sarvaśaḥ

6.52.32

munervācā tataḥ samyagvrate cīrṇe'bhavatsukhī /
īdṛgvidhaṃ nṛpaśreṣṭha kathitaṃ yoginīvratam

6.52.33

aṣṭāśītisahasrāṇi dvijānbhojayate tu yaḥ /
tatsamaṃ phalamāpnoti yoginīvratakṛnnaraḥ

6.52.34

mahāpāpapraśamanaṃ mahāpuṇyaphalapradam /
paṭhanācchravaṇānmartyaḥ sarvapāpaiḥ pramucyate

6.52.52

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde āṣāḍhakṛṣṇayoginyekādaśīmāhātmyaṃnāma
dvipaṃcāśattamo'dhyāyaḥ

Original text: padmapurāṇam · Sanskrit Wikisource contributors · Sanskrit Wikisource · CC BY-SA 4.0