Padma Purana · Chapter 6.5

yudhiṣṭhira uvāca-
kaḥ pitṛvyaḥ siṃdhusūnoḥ kiṃ vṛttaṃ tasya vigrahe /
yuyudhe sa kathaṃ daityastanme kathaya nārada

nārada uvāca-/
śṛṇu tvaṃ nṛpaśārdūla pitṛvyaḥ kṣīrasāgaraḥ /
jālaṃdharasya taṃ devaiḥ pramathya dhanamāhṛtam

śrīcaṃdrāmṛtanāgāśvapūrvaṃ tasya surāsuraiḥ /
tacchrutvā vigrahaṃ cakre devairjālaṃdharo'suraḥ

kadācitpreṣayāmāsa dūtaṃ durvāraṇaṃ balī /
śikṣayitvā tu vaktavyaṃ deveṃdrabhavanaṃ prati

atha syaṃdanamāruhya yayau durvāraṇo divi /
praveṣṭukāmo bhavanaṃ dvārasthairdvāri nivāritaḥ

dūta uvāca-/
jālaṃdharasya dūto'haṃ āgataḥ śakrasaṃnidhau /
gatvā tatra bhavaṃto māṃ vijñāpayitumarhatha

iti tasya vacaḥ śrutvā tadaiva tu śacīpatim /
gatvā ca praṇipatyāha dūto devāgato bhuvaḥ

dauvāriko maheṃdreṇa pratyukto dūtamānaya /
haste gṛhītvā taṃ dūtaṃ vāsavāṃtikamānayat

durvāraṇo devasabhāṃ praviṣṭaḥ pravyalokayat /
hariṃ devaistu yastriṃśatkoṭibhiḥ pariveṣṭitam

svarṇasiṃhāsanaṃ divyaṃ cāmarānilasevitam /
śacīpremarasotphullanayanābjasahasrakam

durvāraṇo'tha deveśaṃ vilokya guruṇā saha /
praṇanāmātmagarveṇa prahasannayanaśriyam

nirdiṣṭamāsanaṃ bheje dūto jālaṃdharasya saḥ /
kasya tvaṃ kena kāryeṇa prāptaḥ prāheti taṃ hariḥ

dūto jālaṃdharasyāhaṃ sa jagāda puraṃdaram /
sa rājā sarvalokānāṃ tasyājñāṃ śṛṇu manmukhāt

pitṛvyo mama dugdhābdhistvayā kasmādviloḍitaḥ /
maṃdarādrividhānena hṛtaṃ kośaṃ mahādhanam

śrīcaṃdrāmṛtanāgāśvaṃ tanmaṇiṃ vidrumādikam /
dehi sarvaṃ tathā svargaṃ śīghraṃ tyaja puraṃdara

sa tvaṃ madvacanāttūrṇaṃ kuru sarvaṃ yathocitam /
taṃ kṣamāpaya bhūpāla yadi jīvitumicchasi

atha prahasya maghavā prāha durvāraṇaṃ prati /
śṛṇu dūta samāsena siṃdhormathanakāraṇam

purā himavataḥ sūnurmaināko nāma me ripuḥ /
sa kukṣau vidhṛtastena sāgareṇa jaḍena ca

dagdhaṃ carācaraṃ yena vahninā hayarūpiṇā /
sa cāpi vidhṛtastena sāgareṇa durātmanā

dharmadviṣāṃ dānavānāmasau vai āśrayaḥ prabhuḥ /
nityaṃ dadhi ghṛtaṃ kṣīraṃ dānavebhyaḥ prayacchati

ataevāyamasmābhiḥ durvāraṇa viloḍitaḥ /
daṃḍitaśca gataśrīko devairatha purātanaiḥ

śṛṇu dūta sabaṃdhena mama vipreṇa śoṣitaḥ /
kuṃbhodbhavena kiṃcaiṣa duḥsaṃge naiva bādhyate

so'pi yuddhārthamasmābhiḥ sarvasainyena saṃvṛtaḥ /
āgamiṣyati vai nāśaṃ gamiṣyati tadaiva hi

itīrayitvā virarāma vṛtrahā saritpaterātmajadūtamuccakaiḥ /
śaśaṃsa cāgatya samudrasūnordeveśvareṇoktamaśeṣamāditaḥ

nārada uvāca-/
maheṃdra vacanaṃ śrutvā nijadūtamukhena ca /
samudrasūnuḥ saṃkruddhaḥ sarvaṃ sainyaṃ samāhvayat

rasātalasthitā daityāḥ ye ca bhūtalavāsinaḥ /
āyayuḥ sabalāstatra jālaṃdharamathājñayā

prayāṇaprakrame siṃdhusūnoḥ sainyasya garjitaiḥ /
sphuṭaṃti nabhaso rājanpātālamakhilā diśaḥ

hayanāgoṣṭravadanā biḍālamukhabhīṣaṇāḥ /
vyāghrasiṃhākhuvadanā vidyutsadṛśalocanāḥ

sarpakeśā mahādehāḥ kecitkhaṅgatanūruhāḥ /
anye ca paridhāvaṃti garjaṃti jaladasvanaiḥ

rathagajahayapattisaṃkulaṃ samaravinodakadaṃba bhāsuram /
abjaśatasahasrakoṭināyakaṃ balamakhilaṃ ca tadā rarāja rājan

śatayojanavistīrṇaṃ vimānaṃ haṃsakoṭibhiḥ /
yuktaṃ bhūtisahasraughaṃ sarvavastuprapūritam

tadvimānaṃ samāruhya sadyo jālaṃdharo yayau /
madhyāhne maṃdaraṃ prāptaḥ prathame'hni balaiḥ saha

khaṃḍitaṃ śibikāvāhairdalitaṃ bhūrikuṃjaraiḥ /
dvitīye divase meruṃ saṃprāpto balasaṃyutaḥ

ilāvṛtte tu śikhare tasthau tatkaṭakaṃ mahat /
atha daityādhipairbhagnaṃ khāṃḍavaṃ naṃdanaṃ vanam

śikharāṇi viśīrṇāni merordānavapuṃgavaiḥ /
saṃtānakeṣu vṛkṣeṣu baddhā hiṃdolamaṃcakān

siddhāṃganābhiḥ sahitā remire daityapuṃgavāḥ /
kucakuṃkumatāṃbūla caṃdanāgarubhūṣaṇaiḥ

keśapāśacyutaiḥ puṣpaiḥ meroḥ saṃpūritā nadī /
sumeroḥ pūrvadigbhāgo gajaistasya vighaṭṭitaḥ

dakṣiṇaṃ ca rathaiśceruruttaraṃ paścimaṃ bhaṭaiḥ /
atha prasthāpayāmāsa daityāñjāladharo'suraḥ

maheṃdraśikharaṃ cānye yayurduṃdubhiniḥsvanaiḥ /
rājarājapurīṃ bhaṃktvā yamasya varuṇasya ca

anyeṣāṃ lokapālānāmāyayuste'marāvatīm /
athotpātābhavannāke divyabhaumāṃtarikṣagāḥ

rajaḥ papāta bahulaṃ tamastomo vijṛṃbhate /
tadā papāta kuliśaṃ karādiṃdrasya niṣprabham

dṛṣṭvā nimittāni bhayāvahāni nāke maheṃdro gurumityuvāca /
kiṃ kurmahe kaṃ śaraṇaṃ ca yāmastaṃ paśya yuddhaṃ samupasthitaṃ ca

tato vācaspatirvākyamuvāca tridaśādhipam /
caraṇau pāhi śaraṇaṃ viṣṇorvaikuṃṭhavāsinaḥ

ityukto guruṇā devaiḥ sākaṃ vaikuṃṭhamaṃdiram /
jagāmākhaṃḍalaḥ śīghraṃ śaraṇaṃ kaiṭabhadviṣaḥ

śaśaṃsa vāsudevāya vijayo dvārapālakaḥ /
jālaṃdharabhayatrastāḥ sarve devāḥ samāgatāḥ

śrīruvāca-/
na vadhyo'sau mama bhrātā devārthe yudhyatā tvayā /
śāpito deva matprītyā vadhārho na bhaviṣyati

iti śrīvacanaṃ śrutvā viṣṇustrailokyapālakaḥ /
athāruroha garuḍaṃ pakṣakṣepāvṛtāṃbaram

vaikuṃṭhabhavanāttūrṇaṃ nirgatastridaśānhariḥ /
jālaṃdharabhayatrastāngatakāṃtīnathaikṣata

dadṛśuste surāḥ sarve hariṃ sāṃdraghanopamam /
śārṅgaśaṃkhagadāpadmavibhūṣitacaturbhujam

stotraṃ paṭhitvā purataḥ prāheṃdraḥ saritāṃpateḥ /
jālaṃdhareṇātmajena bhagnaṃ deva triviṣṭapam

tadiṃdravacanaṃ śrutvā'bhayaṃ datvā divaukasām /
vijetumasuraṃ devaiḥ saha reje surāṃtakṛt

athānītaṃ mātalinā rathamāruhya vāsavaḥ /
vāsudevasya purataḥ prayayau vidhṛtāśaniḥ

vāmatastridaśāḥ sarve savyataśca samāyayau /
svāhāpriyo dakṣiṇataḥ sa ca meṣaṃ samāsthitaḥ

āruhyairāvataṃ nāgaṃ jayaṃtaḥ śakranaṃdanaḥ /
uccaiḥśravasamiṃdraśca ubhau bhagavataḥ puraḥ

dhātāryamā ca mitraśca varuṇoṃśo bhagastathā /
iṃdro vivasvānpūṣā ca parjanyo daśamaḥ smṛtaḥ

tatastvaṣṭā tato viṣṇū reje dhanyo jaghanyajaḥ /
ityete dvādaśādityā iṃdrasya purataḥ sthitāḥ

vīrabhadraśca śaṃbhuśca giriśaśca mahāyaśāḥ /
ajaikapādahirbudhnyaḥ pinākī cāparājitaḥ

bhuvanādhīśvaraścaiva kapālī ca viśāṃpate /
sthāṇurbhagaśca bhagavānrudrā ekādaśa smṛtāḥ

śvasanaḥ sparśano vāyuranilo mārutastathā /
prāṇāpānau sajīvau ca maruto'ṣṭau tadagrataḥ

vivasvānapi tanmadhye yayau dvādaśamūrtibhiḥ /
dhanadaḥ śibikārūḍhaḥ kiṃnareśo yayau tadā

rudrāśca vṛṣabhārūḍhā māruto mṛgavāhanaḥ /
yayuḥ sainyasya purataḥ triśūlaparighāyudhāḥ

gaṃdharvāścāraṇā yakṣāḥ piśācoraga guhyakāḥ /
sarvasainyasya purataḥ sarvaśastrabhṛto yayuḥ

pūrvāparau toyarāśī samākrāṃtau ca sainikaiḥ /
tasminsasāra bhūmirāṭvarāhavapuṣā hariḥ

svargādāgatya vegena daityasainyajighāṃsayā /
sumeroruttaro bhāgaḥ surasainyena saṃvṛtaḥ

senābhārodbhutakarastasthau jālaṃdharasya ca /
āśritya dakṣiṇaṃ bhāgaṃ tūrṇaṃ kanakaśṛṃgataḥ

ahorātreṇa vihitā varṣe tasminnilāvṛte /
merumaṃdarayormadhye yuddhabhūmiḥ pratiṣṭhitā

tatrātmajayadāṃ bhūmiṃ kaviproktāṃ mudāyutāḥ /
jagmuste dānavāstūrṇaṃ guruproktāṃ yayuḥ surāḥ

rathapravīraiḥ paritaśca saṃplavairgajairghanākāramadapravāhibhiḥ /
aśvairanaṃtairgaruḍāgragāmibhiḥ padātibhiḥ sāraṇabhūrbhṛtā babhau

tato vāditranirghoṣaḥ senayorubhayorabhūt /
kolāhalaśca vīrāṇāmanyonyamabhigarjatām

atha dānavadevānāṃ saṃgrāmo'bhūdbhayāvahaḥ /
sarvasainyasya saṃmardo yathā tribhuvanakṣayaḥ

bhayakrāṃtā mahāśrāṃtā śrutirvilapatī muhuḥ /
svarathākārarahitaṃ śaraiḥ saṃpūritaṃ tadā

romāṃcitā babhau dyauśca rajovastraṃ vidhunvatī /
raudrairvihaṃgamārāvaistrāsādākraṃdatīva hi

deveṃdreṇa tadājñaptā meghāḥ saṃvartakādayaḥ /
gajānuccaiḥ samāruhya te'surānyuyudhurmṛdhe

devānāmaśvārohāśca jātā gaṃdharvakinnarāḥ /
rathinaḥ sādhyasiddhāśca gajino yakṣacāraṇāḥ

padātinaḥ kiṃpuruṣāḥ pannagāḥ pavanāśanāḥ /
rogāṇāmadhipo rājanyakṣmā ca yamanāyakaḥ

tatra dānavarogāṇāṃ saṃgrāmo'bhūtsudāruṇaḥ /
patitā luluṭhurbhūmau daityāḥ śūlajvarāmayaiḥ

dānavairnihatā rogāḥ petuḥ samaramūrddhani /
palāyāṃcakrire kecitvyādhayo bhūdharānprati

auṣadhyastatra sahajā vaiśalyakaraṇīmukhāḥ /
tābhirviśalyāḥ sainyeṣu yuyudhuryamakiṃkarāḥ

dānavairnihatāḥ sarve śaramudgarapaṭṭiśaiḥ /
padātayaḥ pattigaṇaiḥ khaṅgaistīkṣṇaiḥ paraśvadhaiḥ

koṭiśo jaghnuranyonyaṃ rudhirāruṇavigrahāḥ /
aśvacārā hayaistūrṇaiścikṣipurgagane tadā

saṃśliṣya jaghnuranyonyaṃ rudhirāruṇavigrahāḥ /
samūho rathināṃ bhīmo rathaughaiśchādya medinīm

vivyadhurniśitairbāṇairdhanurmuktairmahārathān /
madakṣīṇakapolāṃgāḥ karairbaddhā karāndṛḍham

gajānpratigajāḥ kruddhāḥ pātayaṃti mahītale /
kopi daityo rathaṃ dorbhyāmutkṣipyotthāya khaṃ yayau

aśvacārānhayānnāgānpātayāmāsa bhūtale /
skaṃdhe gṛhītvā tarasā yayau jālaṃdharaṃ prati

kakṣayorvai gajau gṛhya tṛtīyaṃ jaṭharopari /
caturthaṃ mastake gṛhya raṇe dhāvati kaścana

utpāṭya kośataḥ khaṅgaṃ vidhūya vimalāṃbaram /
yayau sahasraśo devānpātayitvā raṇe'suraḥ

kācitpīnastanī tanvī khecarīrati laṃpaṭā /
āgatya gaganāttūrṇaṃ ninye daityaṃ raṇāṃgaṇāt

cucuṃba sā tadvadanaṃ tīkṣṇanārācakīlitam /
devasainyaṃ tato baddhvā kālanemirnanartta ha

tato janārdanaḥ kruddho niryayau kālaneminam /
yamo durvāraṇaṃ vīraṃ svarbhānuścaṃdrabhāskarau

ketuṃ vaiśvānaro devo yayau śukraṃ bṛhaspatiḥ /
āśvinau saṃyatau tatra daityamaṃgāraparṇakam

saṃhrādaṃ śakraputraśca nirhrādaṃ dhanado yayau /
niśuṃbhaścāvṛto rudraiḥ śuṃbho vasubhirāhave

meghākāraṃ sthitaṃ jaṃbhaṃ viśvedevāḥ samāyayau /
vāyavo vajraromāṇamatha mṛtyurmayaṃ yayau

namuciṃ vāsavo vyagraṃ śaktihasto'bhyadhāvata /
anyairapi surairdaityāḥ svasvavīryasamairvṛtāḥ

iti śrīpadmapurāṇe paṃcapaṃcāśatsahasrasaṃhitāyāmuttarakhaṃḍe yudhiṣṭhiranāradasaṃvāde devadānavayuddhaṃnāma paṃcamodhyāyaḥ