Padma Purana · Chapter 6.45

śrīkṛṣṇa uvāca-
māhātmyaṃ vijayāyāśca śrutaṃ kṛṣṇa mahatphalam /
phālgunasyārjune pakṣe yannāmnī tāṃ vadādhunā

śrīkṛṣṇa uvāca-/
dharmaputra mahābhāga śṛṇu vakṣyāmite'dhunā /
yoktā pṛṣṭena māṃdhātrā vasiṣṭhena mahātmanā

phālgunasya viśeṣeṇa viśeṣaḥ kathito nṛpa /
āmalakīvrataṃ puṇyaṃ viṣṇulokaphalapradam

āmalakyāstale gatvā jāgaraṃ tatra kārayet /
kṛtvā jāgaraṇaṃ rātrau gosahasraphalaṃ labhet

māṃdhātovāca -
āmalakī kadā hyeṣā utpannā dvijasattama /
etatsarvaṃ mamācakṣva paraṃ kautūhalaṃ hi me

kasmādiyaṃ pavitrā ca kasmātpāpapraṇāśinī /
kasmājjāgaraṇaṃ kṛtvā gosahasraphalaṃ labhet

vasiṣṭha uvāca-
kathayāmi mahābhāga yatheyamabhavatkṣitau /
āmalakī mahāvṛkṣaḥ sarvapāpapraṇāśanaḥ

ekārṇave purā jāte naṣṭe sthāvarajaṃgame /
naṣṭe devāsuragaṇe praṇaṣṭoragarākṣase

tatra devādideveśaḥ paramātmā sanātanaḥ /
jagāma brahmaparamamātmanaḥ padamavyayam

tato'sya jāgrato brahmamukhācchaśisamaprabhaḥ /
ṣṭhīvanādbiṃdurutpannaḥ sa bhūmau nipapāta ha

tasmādbiṃdoḥ samutpannaḥ svayaṃ dhātrī nago mahān /
śākhāpraśākhābahulaḥ phalabhāreṇa nāmitaḥ

sarveṣāṃ caiva vṛkṣāṇāmādirohaḥ prakīrtitaḥ /
brahmaṇātha tataḥ paścātsaṃsṛṣṭāśca imāḥ prajāḥ

devadānavagaṃdharvayakṣarākṣasapannagān /
asṛjadbhagavāndevo maharṣīṃśca tathāmalān

ājagmustatra devāste yatra dhātrī haripriyā /
tāṃ dṛṣṭvā te mahābhāga paraṃ vismayamāgatāḥ

na jānīma imaṃ vṛkṣaṃ ciṃtayaṃto'bhisaṃsthitāḥ /
evaṃ ciṃtayatāṃ teṣāṃ vāguvācāśarīriṇī

āmalakī nago hyeṣa pravaro vaiṣṇavo mataḥ /
asya saṃsmaraṇādeva labhedgodānajaṃ phalam

sparśanāddviguṇaṃ puṇyaṃ triguṇaṃ dhāraṇāttathā /
tasmātsarvaprayatnena sevyā āmalakī sadā

sarvapāpaharā proktā vaiṣṇavī pāpanāśinī /
tasyā mūle sthito viṣṇustadūrdhve ca pitāmahaḥ

skaṃdhe ca bhagavānrudraḥ saṃsthitaḥ parameśvaraḥ /
śākhāsu munayaḥ sarve praśākhāsu ca devatāḥ

parṇeṣu cāsate devāḥ puṣpeṣu marutastathā /
prajānāṃ patayaḥ sarve phaleṣveva vyavasthitāḥ

sarvadevamayī hyeṣā dhātrī ca kathitā mayā /
tasmātpūjyatamā hyeṣā viṣṇubhaktiparāyaṇaiḥ

ṛṣaya ūcuḥ -
ko bhavānna hi jānīmaḥ kasmātkāraṇatāṃ gataḥ /
devo vā yadi vā cānyaḥ kathayasva yathātatham

vāguvāca -
yaḥ kartā sarvabhūtānāṃ bhuvanānāṃ ca sarvaśaḥ /
vismitānviduṣaḥ prekṣya so'haṃ viṣṇuḥ sanātanaḥ

tacchrutvā devadevasya bhāṣitaṃ brahmaṇaḥ sutāḥ /
anādinidhanaṃ devaṃ stotuṃ tatra pracakramuḥ

namo bhūtātmabhūtāya ātmane paramātmane /
acyutāya namo nityamanaṃtāya namo namaḥ

dāmodarāya kavaye yajñeśāya namo namaḥ /
evaṃ stutastu ṛṣibhistutoṣa bhagavānhariḥ

pratyuvāca maharṣīṃstānabhīṣṭaṃ kiṃ dadāmi vaḥ /
ṛṣaya ūcuḥ
yadi tuṣṭo'si bhagavannasmākaṃ hitakāmyayā

vrataṃ kiṃcitsamākhyāhi svargamokṣaphalapradam /
dhanadhānyapradaṃ puṇyamātmanastuṣṭikārakam

alpāyāsaṃ bahuphalaṃ vratānāmuttamaṃ vratam /
kṛtena yena deveśa viṣṇuloke mahīyate

viṣṇuruvāca-
phālgune śuklapakṣe tu puṣyeṇa dvādaśī yadi /
bhavetsā ca mahāpuṇyā mahāpātakanāśinī

viśeṣastatra karttavyaḥ śṛṇudhvaṃ dvijasattamāḥ /
āmalakīṃ ca saṃprāpya jāgaraṃ tatra kārayet

sarvapāpavinirmukto gosahasraphalaṃ labhet /
etadvaḥ kathitaṃ viprā vratānāṃ vratamuttamam /
arcayitvācyutaṃ tasyāṃ viṣṇulokānna mucyate

ṛṣaya ūcuḥ -
vratasyāsya vidhiṃ brūhi paripūrṇaṃ kathaṃ bhavet /
ke maṃtrāḥ ke namaskārāḥ devatā kā prakīrtitā

kathaṃ dānaṃ kathaṃ snānaṃ kaśca pūjāvidhiḥ smṛtaḥ /
arghārcanasya maṃtraṃ tu kathayasva yathātatham

viṣṇuruvāca-
śrūyatāṃ yo vidhiḥ samyagvratasyāsya dvijarṣabhāḥ /
ekādaśyāṃ nirāhāraḥ sthitvā caiva pare'hani

bhokṣye'haṃ puṃḍarīkākṣa śaraṇaṃ me bhavācyuta /
iti kṛtvā tu niyamaṃ daṃtadhāvanapūrvakam

nālapetpatitāṃścaurāṃstathā pāṣaṃḍino narān /
durvṛttānbhinnamaryādāngurudārapradharṣakān

aparāhṇe tataḥ snānaṃ vidhinā kārayedbudhaḥ /
nadyāṃ taḍāge kūpe vā gṛhe vā niyatātmavān

mṛttikālaṃbhanaṃ pūrvaṃ tataḥ snānaṃ ca kārayet /
aśvakrāṃte rathakrāṃte viṣṇukrāṃte vasuṃdhare

mṛttike hara me pāpaṃ yanmayā duṣkṛtaṃ kṛtam ४०/ iti mṛttikāmaṃtraḥ /
tvamaṃbu sarvabhūtānāṃ jīvanaṃ tanurakṣakam /
svedajodbhijjajātīnāṃ rasānāṃ pataye namaḥ

snāto'haṃ sarvatīrtheṣu hradaprasravaṇeṣu ca /
nadīṣu devakhāteṣu idaṃ snānaṃ tu me bhavet ४२/ iti snānamaṃtraḥ /
jāmadagnyaṃ muniṃ caiva kārayitvā hiraṇmayam /
māṣakasya suvarṇasya tadarddhārddhena vā punaḥ

gṛhamāgatya pūjāyāḥ pūjāhomaṃ tu kārayet /
tataścāmalakīṃ gacchetsarvopaskarasaṃyutaḥ

āmalakīṃ tato gatvā pariśodhya samaṃtataḥ /
sthāpayetsatataṃ kuṃbhamavraṇaṃ maṃtrapūrvakam

paṃcaratnasamopetaṃ divyagaṃdhādhivāsitam /
chatropānadyugopetaṃ sitacaṃdanacarcitam

sragdāmalaṃbitagrīvaṃ sarvadhūpavidhūpitam /
dīpamālākulaṃ kuryātsarvataḥ sumanoharam

tasyopari nyasetpātraṃ divyalājaiḥ prapūritam /
pātropari nyaseddevaṃ jāmadagnyaṃ mahāprabham

viśokāya namaḥ pādau jānunī viśvarūpiṇe /
ugrāya ca tato'pyūrū kaṭī dāmodarāya ca

udaraṃ padmanābhāya uraḥ śrīvatsadhāriṇe /
cakriṇe vāmabāhuṃ ca dakṣiṇaṃ gadine namaḥ

vaikuṃṭhāya namaḥ kaṃṭhamāsyaṃ yajñamukhāya vai /
nāsāṃ viśokanidhaye vāsudevāya cākṣiṇī

lalāṭaṃ vāmanāyeti rāmāyeti bhruvau namaḥ /
sarvātmane tu tacchīrṣaṃ nama ityabhipūjayet ५२/ iti pūjāmaṃtraḥ /
tato devādhidevāya arghaṃ caiva pradāpayet /
phalena caiva śubhreṇa bhaktiyuktena cetasā

tato jāgaraṇaṃ kuryādbhaktiyuktena cetasā /
nṛtyairgītaiśca vāditrairddharmākhyānaiḥ stavairapi

vaiṣṇavaiśca tathākhyānaiḥ kṣapayetsarvaśarvarīm /
pradakṣiṇāṃ tataḥ kuryāddhātryā vai viṣṇunāmabhiḥ

aṣṭādhikaṃ śataṃ caiva aṣṭāviṃśatireva vā /
tataḥ prabhāte samaye kṛtvā nīrājanaṃ hareḥ

brāhmaṇaṃ pūjayitvā tu sarvaṃ tasmai nivedayet /
jāmadagnya ghaṭe tatra vastrayugmamupānahau

jāmadagnyasvarūpeṇa prīyatāṃ mama keśavaḥ /
tataścāmalakīṃ spṛṣṭvā kṛtvā caiva pradakṣiṇām

snānaṃ kṛtvā vidhānena brāhmaṇānbhojayettataḥ /
tataśca svayamaśnīyātkuṭuṃbena samāvṛtaḥ

evaṃ kṛtena yatpuṇyaṃ tatsarvaṃ kathayāmi te /
sarvatīrtheṣu yatpuṇyaṃ sarvadāneṣu yatphalam

sarvayajñādhikaṃ caiva labhate nātra saṃśayaḥ /
etadvaḥ sarvamākhyātaṃ vratānāmuttamaṃ vratam

etāvaduktvā deveśastatraivāṃtaradhīyata /
te cāpi ṛṣayaḥ sarve cakruḥ sarvamaśeṣataḥ

tathā tvamapi rājendra kartumarhasi sattama /
vratametaddurādharṣaṃ sarvapāpapramocanam

iti śrīpādmemahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde phālgunaśuklāmalakyekādaśīnāma paṃcacatvāriṃśo'dhyāyaḥ