Padma Purana · Chapter 6.44

yudhiṣṭhira uvāca-
phālgunasyāsite pakṣe kiṃnāmaikādaśībhavet /
kathayasva prasādena vāsudeva mamāgrataḥ

śrīkṛṣṇa uvāca-
nāradaḥ paripapraccha brahmāṇaṃ kamalāsanam /
phālgunasyāsite pakṣe vijayānāma nāmataḥ /
tasyāḥ puṇyaṃ dvijaśreṣṭha kathayasva prasādataḥ

brahmovāca-
śṛṇu nārada vakṣyāmi kathāṃ pāpaharāmparām /
yanna kasyacidākhyātaṃ mayaitadvijayāvratam

purātanaṃ vrataṃ hyetatpavitraṃ pāpanāśanam /
jayaṃ dadāti vijayā nṛpāṇāṃ vai na saṃśayaḥ

purā rāmo vanaṃ yāto varṣāṇyeva caturdaśa /
nyavasatpaṃcavaṭyāṃ tu sahasītaḥ salakṣmaṇaḥ

tatraiva vasatastasya rāmasya vijayātmanaḥ /
rāvaṇena hṛtā laulyādbhāryā sītā yaśasvinī

tena duḥkhena rāmo'pi mohamabhyāgatastadā /
bhramanjaṭāyuṣamatho dadarśa vigatāyuṣam

kabaṃdho nihataḥ paścādbhramatāraṇyamadhyataḥ /
sugrīveṇa samaṃ tasya sakhitvaṃ samapadyata

vānarāṇāmanīkāni rāmārthaṃsaṃgatāni ca /
tato hanumatā dṛṣṭā laṃkodyāne tu jānakī

rāmasaṃjñāpanaṃ tasyai dattaṃ karma mahatkṛtam /
punaḥ sametya rāmeṇa sarvaṃ tatra niveditam

atha śrutvā rāmacaṃdro vākyaṃ caiva hanūmataḥ /
sugrīvānumatenaiva prasthānaṃ samarocayat

saumitrekena puṇyena tīryate varuṇālayaḥ /
agādho nitarāmeṣa yādobhiśca samākulaḥ /
upāyaṃ naiva paśyāmi yenāsau sutaro bhavet

lakṣmaṇa uvāca-
ādidevastvamevāsi purāṇapuruṣottamaḥ /
bakadālbhyo muniścātra vartate dvīpamadhyataḥ

asmātsthānādyojanārddhamāśramastasya rāghava /
anye ca brāhmaṇāstatra bahavo raghunaṃdana

taṃ pṛccha gatvā rājeṃdra purāṇamṛṣipuṃgavam /
iti vākyaṃ tataḥ śrutvā lakṣmaṇasyātiśobhanam

jagāma rāghavo draṣṭuṃ bakadālbhyaṃ mahāmunim /
praṇanāma muniṃ mūrdhnā rāmo viṣṇumivāmaraḥ

jñātvā munistato rāmaṃ purāṇaṃ puruṣottamam /
kenāpi kāraṇenaiva praviṣṭo mānuṣīṃ tanum

uvāca sa ṛṣistuṣṭaḥ kuto rāma tavāgamaḥ

rāma uvāca-
tvatprasādādahaṃ vipra tīraṃ nadanadīpateḥ /
āgato'smi sasainyo'tra laṃkāṃ jetuṃ sarākṣasām

bhavataścānukūlatvāttīryate'bdhiryathā mayā /
tamupāyaṃ vada mune prasādaṃ kuru sāṃpratam

etasmātkāraṇādeva draṣṭuṃ tvāhamihāgataḥ /
rāmasya vacanaṃ śrutvā bakadālbhyo mahāmuniḥ

uvāca suprasannātmā rāmaṃ rājīvalocanam /
kartavyamadya te rāma vratānāṃ vratamuttamam

kṛtena yena sahasā vijayaste bhaviṣyati /
laṃkāṃ jitvā rākṣasāṃśca svacchāṃ kīrtimavāpsyasi

ekāgramānaso bhūtvā vratametatsamācara /
phālgunasyāsite pakṣe vijayaikādaśī bhavet

tasyā vratena he rāma vijayaste bhaviṣyati /
niḥsaṃśayaṃ samudraṃ tvaṃ tariṣyasi savānaraḥ

vidhistu śrūyatāṃ rājanvratasyāsya phalapradaḥ /
daśamyāṃ divase prāpte kuṃbhamekaṃ tu kārayet

haimaṃ vā rājataṃ vāpi tāmraṃ vāpyatha mṛnmayam /
sthāpayecchobhitaṃ caiva jalapūrṇaṃ sapallavam

saptadhānyānyadhastasya yavānupari vinyaset /
tasyopari nyaseddevaṃ haimaṃ nārāyaṇaṃ prabhum

ekādaśīdine prāpte prātaḥ snānaṃ samācaret /
niścalaṃ sthāpayetkuṃbhaṃ kaṃṭhamālyānulepanaiḥ

pūgīphalairnālikeraiḥ pūjayecca viśeṣataḥ /
gaṃdhairdhūpaiścadīpaiśca naivedyairvividhairapi

kuṃbhāgre taddinaṃ rāma nīyate satkathādibhiḥ /
rātrau jāgaraṇaṃ caiva tasyāgre kārayedbudhaḥ

prakāśayedghṛtadīpamakhaṃḍavratahetave /
dvādaśīdivase prāpte mārtaṃḍasyodaye sati

nītvā kuṃbhaṃ jaloddeśe nadyāḥ prasravaṇe tathā /
taḍāge sthāpayitvā taṃ pūjayitvā yathāvidhi

dadyātsadevaṃ taṃ kuṃbhaṃ brāhmaṇe vedapārage /
kuṃbhena saha rājeṃdra mahādānāni dāpayet

anenavidhinā rāma yūthapaiḥ saha saṃgataḥ /
kuru vrataṃ prayatnena vijayaste bhaviṣyati

iti śrutvā tato rāmo yathoktamakarottadā /
kṛte vrate sa vijayī babhūva raghunaṃdanaḥ

prāptā sītā jitā laṃkā paulastyo nihato raṇe /
anenavidhinā putra ye kurvaṃti narā vratam

ihalokajayaprāptiḥ paralokastathākṣayaḥ /
etasmātkāraṇātputra kartavyaṃ vijayāvratam

vijayāyāśca māhātmyaṃ sarvakilbiṣanāśanam /
paṭhanācchravaṇāccaiva vājapeyaphalaṃ labhet

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe phālgunakṛṣṇāvijayāmāhātmyaṃnāma catuścatvāriṃśo'dhyāyaḥ