Padma Purana · Chapter 6.42

yudhiṣṭhira uvāca-
sādhu kṛṣṇa jagannātha ādideva jagatpate /
kathayasva prasādena kṛpāṃ kuru mamopari

māghasya kṛṣṇapakṣe tu kā vā caikādaśī bhavet /
kiṃ nāma ko vidhistasyā etadvistarato vada

śrībhagavānuvāca-
śṛṇu tvaṃ nṛpaśārdūla kṛṣṇamāghasya yā bhavet /
ṣaṭtilā nāma vikhyātā sarvapāpapraṇāśinī

ṣaṭtilāyāḥ śṛṇuṣva tvaṃ kathāṃ pāpaharāṃ śubhām /
yāṃ pulastyo muniśreṣṭho dālabhyaṃ prati coktavān

dālabhya uvāca-
martyalokamanuprāptāḥ pāpaṃ kurvaṃti jaṃtavaḥ /
brahmahatyādipāpaiśca yuktā ye vividhādibhiḥ

paradravyāpahārāśca paravyasanamohitāḥ /
kathaṃ na yāṃti narakaṃ brahmaṃstadbrūhi tattvataḥ

anāyāsena bhagavandānenālpena kenacit /
pāpaṃ praśamanaṃ yāti etanme vaktumarhasi

pulastya uvāca-
sādhusādhu mahābhāga guhyametatsudurllabham /
yanna kasyacidākhyātaṃ viṣṇubrahmeṃdradaivataiḥ

tadahaṃ kathayiṣyāmi tvayā pṛṣṭo dvijottama /
māghamāse tu saṃprāpte śucisnāto jiteṃdriyaḥ

kāmakrodhābhimānerṣyālobha paiśunya varjitaḥ /
devadevaṃ ca saṃsmṛtya pādau prakṣālya vāribhiḥ

bhūmāvapatitaṃ gṛhya gomayaṃ tatra mānavaḥ /
tilānprakṣipya kārpāṃsaṃ piṃḍikāścaiva kārayet

aṣṭottaraśataṃ caiva nātra kāryā vicāraṇā /
tato māghe ca saṃprāpte hyāṣāḍharkṣaṃ bhavedyadi

mūlaṃ vā kṛṣṇapakṣasyaikādaśī niyamāṃstataḥ /
gṛhṇīyātpuṇyakāle ca vidhānaṃ tatra me śṛṇu

devadevaṃ samabhyarcya susnātaḥ prayataḥ śuciḥ /
kṛṣṇanāmāni saṃkīrtya punaḥ praskhalitādiṣu

rātrau jāgaraṇaṃ kuryādādau homaṃ ca kārayet /
arcayeddevadeveśaṃ dvitīye'hni punarharim

caṃdanāgurukarpūrairnaivedyaṃ kṛsaraṃ tathā /
saṃsmṛtya nāmnā ca tataḥ kṛṣṇākhyena punaḥ punaḥ

kūṣmāṃḍairnārikeraiśca hyathavā bījapūrakaiḥ /
sarvābhāve'pi vipreṃdra śastapūgaphalairvṛtam /
arghaṃ dadyādvidhānena pūjayitvā janārdanam

kṛṣṇakṛṣṇa kṛpālustvamagatīnāṃ gatirbhava /
saṃsārārṇava magnānāṃ prasīda puruṣottama

namaste puṃḍarīkākṣa namaste viśvabhāvana /
subrahmaṇya namaste'stu mahāpuruṣapūrvaja /
gṛhāṇārghyaṃ mayā dattaṃ lakṣmyā saha jagatpate

ityarghamaṃtraḥ /
tatastu pūjayedvipramudakuṃbhaṃ pradāpayet /
chatropānahavastraiśca kṛṣṇo me prīyatāmiti

kṛṣṇā dhenuḥ pradātavyā yathāśakti dvijottame /
tilapātraṃ dvijaśreṣṭha dadyātpātravicakṣaṇaḥ

snāne prāśanake śastāstathā kṛṣṇatilā mune /
tānpradadyātprayatnena yathāśakti dvijottame /
tilaprarohajāḥ kṣatre yāvatsaṃkhyāstilā dvija

tāvadvarṣasahasrāṇi svargaloke mahīyate /
tilasnāyī tilodvartī tilahomī tilodakī

tiladātā ca bhoktā ca ṣaṭtilāḥ pāpanāśanāḥ /
nārada uvāca-
kṛṣṇakṛṣṇa mahābāho namaste viśvabhāvana

ṣaṭtilaikādaśībhūtaṃ kīdṛśaṃ phalamasti vai /
sopākhyānaṃ mama brūhi yadi tuṣṭo'si yādava /
śrīkṛṣṇa uvāca
śṛṇu rājanyathāvṛttaṃ dṛṣṭaṃ tatkathayāmi te /
martyaloke purā hyāsīdbrāhmaṇyekā ca nārada /
vratacaryāratā nityaṃ devapūjāratā sadā

māsopavāsaniratā mama bhaktā ca sarvadā /
kṛṣṇopavāsasaṃyuktā mama pūjāparāyaṇā

śarīraṃ kleśitaṃ caiva upavāsairdvijottama /
devānāṃ brāhmaṇānāṃ ca kumārīṇāṃ ca bhaktitaḥ

gṛhādikaṃ prayacchaṃtī sarvakālaṃ mahāsatī /
atikṛcchraratā sā tu sarvakālaṃ tu vai dvija

na dattā bhikṣuke bhikṣā brāhmaṇā na ca tarpitāḥ

tataḥ kālena mahatā mayā vai ciṃtitaṃ dvija /
śuddhamasyāḥ śarīraṃ hi vrataiḥ kṛcchrairna saṃśayaḥ

arcito vaiṣṇavo lokaḥ kāyakleśena vai tayā /
na dattamannadānaṃ hi yena tṛptiḥ parā bhavet

evaṃ jñātvā ahaṃ brahmanmartyalokamupāgataḥ /
kāpālaṃ rūpamāsthāya bhikṣāpātre ca yācitā

kasmāttvamāgato brahmankva yāsi vada me'grataḥ /
punareva mayā proktaṃ dehi bhikṣāṃ ca suṃdari

tayā kopena mahatā mṛtpiṃḍastāmrabhājane /
kṣipto yāvadahaṃ brahmanpunaḥ svargaṃ gato dvija

tataḥ kālena mahatā tāpasī sumahāvratā /
sadehā svargamāyātā vratacaryā prabhāvataḥ

mṛtpiṃḍikāpradānena gṛhaṃ prāptaṃ manoramam /
saṃjātaṃ caiva viprarṣe dhānyarāśi vivarjitam

gṛhaṃ yāvannirīkṣeta na kiṃcittatra paśyati /
tāvadgṛhādviniṣkrāṃtā mamāṃte cāgatā dvija

krodhena mahatāviṣṭamidaṃ vacanamabravīt /
mayā vrataiśca kṛcchraiśca upavāsairanekaśaḥ

pūjayārādhito devaḥ sarvalokasya pālakaḥ /
na tatra dṛśyate kiṃcidgṛhe mama janārdana

tataścoktaṃ mayā tasyai gṛhaṃ gaccha mahāvrate /
āgamiṣyaṃti sutarāṃ kautūhala samanvitāḥ

devapatnyo hi draṣṭuṃ tvāṃ vismayābhisamanvitāḥ /
dvāraṃ nodghāṭaya vinā ṣaṭtilāpuṇyavācanāt

evamuktā mayā sā tu gatā vai mānuṣī tadā /
atrāṃtare samāyātā devapatnyaśca vāḍava

tābhiśca kathitaṃ tatra tvāṃ draṣṭuṃ hi samāgatāḥ /
dvāramudghāṭayasvādya tvāṃ prapaśyāma śobhane

mānuṣyuvāca-
yadi maddarśanaṃ kāryaṃ satyaṃ vācyaṃ viśeṣataḥ /
ṣaṭtilāyā vrataṃ puṇyaṃ dvārodghāṭanakāraṇāt

śrīkṛṣṇa uvāca-/
ekāpināvadattatra ṣaṭtilaikādaśīvratam /
anyayā kathitaṃ tatra draṣṭavyā mānuṣī mayā

tato dvāraṃ samudghāṭya dṛṣṭā tābhiśca mānuṣī /
na devī na ca gaṃdharvī nāsurī na ca pannagī

dṛṣṭā pūrvaṃ tathā nārī yādṛśīyaṃ dvijarṣabha /
devīnāmupadeśena ṣaṭtilāyā vrataṃ kṛtam

mānuṣyā satyavratayā bhuktimuktiphalapradam /
rūpakāṃtisamāyuktā kṣaṇena samavāpa sā

dhanaṃ dhānyaṃ ca vastrādi suvarṇaṃ raupyameva ca /
bhavanaṃ sarvasaṃpannaṃ ṣaṭtilāyāḥ prabhāvataḥ

rūpakāṃtisamāyuktā kṣaṇena samapadyata

atitṛṣṇā na karttavyā vittaśāṭhyaṃ vivarjayet /
ātmavittānusāreṇa tilānvastrāṇi dāpayet

labhate caivamārogyaṃ naro janmani janmani /
na dāridryaṃ na kaṣṭatvaṃ na ca daurbhāgyameva ca

saṃbhavedvai dvijaśreṣṭha ṣaṭtilāsamupoṣaṇāt /
anena vidhinā bhūpa tiladātā na saṃśayaḥ

mucyate pātakaiḥ sarvairanāyāsena mānavaḥ /
dānaṃ ca vidhivatpātre sarvapātakanāśanam /
nānarthaḥ kaścinnāyāsaḥ śarīre nṛpasattama

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde māghakṛṣṇāṣaṭtilaikādaśī nāma dvicatvāriṃśo'dhyāyaḥ