Padma Purana · Chapter 6.41

yudhiṣṭhira uvāca-
kathitā vai tvayā kṛṣṇa saphalaikādaśī śubhā /
kathayasva prasādena śuklapakṣasya yā bhavet

kinnāma ko vidhistasyāḥ ko devastatra pūjyate /
kasmai tuṣṭo hṛṣīkeśastvameva puruṣottamaḥ

śrīkṛṣṇa uvāca-/
śṛṇu rājanpravakṣyāmi śuklā pauṣasya yā bhavet /
kathayāmi mahārāja lokānāṃ hitakāmyayā

pūrveṇa vidhinā rājankarttavyaiṣā prayatnataḥ /
putradā nāma nāmnā sā sarvapāpaharā parā

nārāyaṇo'dhidevo'syā kāmadaḥ siddhidāyakaḥ /
nātaḥ paratarā kācittrailokye sacarācare

vidyāvaṃtaṃ yaśasvaṃtaṃ karoti ca naraṃ hariḥ /
śṛṇu rājanpravakṣyāmi kathāṃ pāpaharāṃ parām

bhadrāvatyāṃ purā hyāsītpuryāṃ rājā suketumān /
tasya rājñastathārājñī caṃpakā nāma varttate

putrahīnena rājñā ca kāle nīto manorathaiḥ /
naivātmajaṃ nṛpo lebhe vaṃśakarttārameva ca

tenaiva rājñā dharmeṇa ciṃtitaṃ bahukālataḥ /
kiṃ karomi kva gacchāmi sutaprāptiḥ kathaṃ bhavet

na rāṣṭre na pure saukhyaṃ lebhe rājā suketumān /
sādhvya svakāṃtayā sārddhaṃ pratyahaṃ duḥkhito'bhavat

tāvubhau daṃpatī nityaṃ ciṃtāśokaparāyaṇau /
pitaro'sya jalaṃ dattaṃ kavoṣṇamupabhuṃjate

rājñaḥ paścānna paśyāmo yo'smānsaṃtarpayiṣyati /
ityevaṃ saṃsmaraṃto'sya duḥkhitāḥ pitaro'bhavan

na bāṃdhavā na mitrāṇi nāmātyāḥ suhṛdastathā /
rocayaṃtyasya bhūpasya na gajāśvāḥ padātayaḥ

nairāśyaṃ bhūpatestasya nityaṃ manasi varttate /
narasya putrahīnasya nāsti vai janmanaḥ phalam

aputrasya gṛhaṃ śūnyaṃ hṛdayaṃ duḥkhitaṃ sadā /
pitṛdevamanuṣyāṇāṃ nānṛṇatvaṃ sutaṃ vinā

tasmātsarvaprayatnena sutamutpādayennaraḥ /
iha loke yaśasteṣāṃ paraloke śubhā gatiḥ

yeṣāṃ tu puṇyakartṝṇāṃ putrajanmagṛhe bhavet /
āyurārogyasaṃpattisteṣāṃ gehe pravartate

putrajanma gṛhe yeṣāṃ lokānāṃ puṇyakāriṇām /
puṇyaṃ vinā na ca prāptirviṣṇubhaktiṃ vinā nṛpa

putrāśca saṃpado vāpi niścayāditi me matiḥ /
evaṃ viciṃtyamāno'sau na śarma labhate nṛpaḥ

pratyūṣe ciṃtayadrājā niśīthe ciṃtayattataḥ /
svayamātmavināśaṃ ca ciṃtayāmāsa ketumān

ātmaghāte durgatiṃ ca ciṃtayitvā tadā nṛpaḥ /
dṛṣṭvātmadehaṃ patitamaputratvaṃ tathaiva ca

punarvicāryātmabuddhyā ātmano hitakāraṇam /
aśvārūḍhastato rājā jagāma gahanaṃ vanam

purohitādayaḥ sarve na jānaṃti gataṃ nṛpam /
gaṃbhīre vipine rājā mṛgapakṣiniṣevite

vicacāra tadā rājā vanavṛkṣānvilokayan /
vaṭānaśvatthabilvāṃśca kharjūrānpanasāṃstathā

bakulānsaptaparṇāṃśca tiṃdukāṃstilakānapi /
śālāṃstālāṃstamālāṃśca dadarśa saralānnṛpaḥ

iṃgudī kakubhāṃścaiva śleṣmātakanagāṃstathā /
śallakānkaramardāṃśca pāṭalānbadarānapi

aśokāṃśca palāśāṃśca śṛgālāñśaśakānapi /
vanamārjāramahiṣānśallakāṃścamarānapi

dadarśa bhujagānrājā valmīkādarddhaniḥsṛtān /
tathā vanagajān mattān kalabhaiḥ saha saṃgatān

yūthapāṃśca caturdaṃtānkariṇīyūthamadhyagān /
tāndṛṣṭvā ciṃtayāmāsa ātmanaḥ sa gajānnṛpaḥ

teṣāṃ sa vicaranmadhye rājā śobhāmavāpa ha /
mahadāścaryasaṃyuktaṃ dadṛśe vipinaṃ nṛpaḥ

mārge śivārutānśṛṇvannulūkavirutaṃ tathā /
tāṃstānṛkṣamṛgānpaśyanbabhrāma vanamadhyataḥ

evaṃ dadarśa gahanaṃ nṛpo madhyagate ravau /
kṣuttṛḍbhyāṃ pīḍito rājā itaścetaśca dhāvati

nṛpatiściṃtayāmāsa saṃśuṣkagalakaṃdharaḥ /
mayā tu kiṃ kṛtaṃ karma prāptaṃ duḥkhaṃ yadīdṛśam

mayā vai toṣitā devā yajñaiḥ pūjābhireva ca /
tathaiva brāhmaṇā dānaistoṣitā miṣṭabhojanaiḥ

prajāścaiva sadā kālaṃ putravatpālitā bhṛśam /
kasmādduḥkhaṃ mayā prāptamīdṛśaṃ dāruṇaṃ mahat

iti ciṃtāparo rājā jagāmaivāgrato vanam /
sukṛtasya prabhāvena saro dṛṣṭamanuttamam

mīnasaṃsparśamānaṃ ca padmaiścāparaśobhitam /
kāraṃḍaiścakravākaiśca rājahaṃsaiśca śobhitam

makarairbahubhirmatsyairanyairjalacarairyutam /
samīpe sarasastasya munīnāmāśramānbahūn

dadarśa rājā lakṣmīvānśakunaiḥ śubhaśaṃsibhiḥ /
dakṣiṇaṃ prāsphurannetramatha savyetaraḥ karaḥ

prāsphurannṛpatestasya kathayañśobhanaṃ phalam /
tasya tīre munīndṛṣṭvā kurvāṇannaigamaṃ japam

harṣeṇa mahatāviṣṭo babhūva nṛpanaṃdanaḥ /
avatīrya hayāttasmānmunīnāmagrataḥ sthitaḥ

pṛthakpṛthagvavaṃde'sau munīṃstānśaṃsitavratān /
kṛtāṃjalipuṭo bhūtvā daṃḍavacca punaḥ punaḥ

pratyūcuste'pi munayaḥ prasannā nṛpate vayam /
rājovāca-
ke bhavaṃto'tra kathyaṃtāṃ kā cākhyā bhavatāmapi /
kimarthaṃ saṃgatā yūyaṃ satyaṃ vadata me'grataḥ

munaya ūcuḥ-
viśvedevā vayaṃ rājansnānārthamiha cāgatāḥ /
māgho nikaṭamāyāta etasmātpaṃcame'hani

adya caikādaśī rājanputradā nāma nāmataḥ /
putraṃ dadātyasau viṣṇuḥ putradā kāriṇāṃ nṛṇām

rājovāca-
eṣa vai saṃśayo mahyaṃ putrasyotpādane mahān /
yadi tuṣṭā bhavaṃto vai putraṃ me dīyatāṃ tadā

muniruvāca-
adyaiva divase rājanputradā nāma vartate /
ekādaśīti vikhyātaṃ kriyatāṃ vratamuttamam

abhiṣekāttato'smākaṃ keśavasya prasādataḥ /
avaśyaṃ tava rājeṃdra putraprāptirbhaviṣyati

ityevaṃ vacanātteṣāṃ kṛtaṃ rājñā vratottamam /
munīnāmupadeśena putradā yā vidhānataḥ

dvādaśyāṃ pāraṇaṃ kṛtvā munīnnatvā punaḥ punaḥ /
ājagāma gṛhaṃ rājā rājñī garbhamathādadhau

putro jātaḥ sūtikāle tejasvī puṇyakarmaṇā /
pitaraṃ toṣayāmāsa prajāpālo babhūva saḥ

tasmādrājanprakarttavyaṃ putradā vratamuttamam /
lokānāṃ tu hitārthāya tavāgre kathitaṃ mayā

ekacittāstu ye martyāḥ kurvaṃti putradā vratam /
putrānprāpyeha loke tu mṛtāste svargagāminaḥ /
paṭhanācchravaṇādrājannagniṣṭomaphalaṃ labhet

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde pauṣaśuklaputradaikādaśīnāma ekacatvāriṃśo'dhyāyaḥ