Padma Purana · Chapter 6.39

yudhiṣṭhira uvāca-
vaṃde viṣṇuṃ vibhuṃ sākṣāllokatrayasukhāvaham /
viśveśaṃ viśvakartāraṃ purāṇaṃ puruṣottamam

pṛcchāmi devadeveśa saṃśayo'sti mahānmama /
lokānāṃ ca hitārthāya pāpānāṃ kṣayahetave

mārgaśīrṣesite pakṣe bhavedekādaśī tu yā /
kiṃ nāma ko vidhistasyāḥ ko devastatra pūjyate /
etadācakṣva me svāminvistareṇa yathātatham

śrīkṛṣṇa uvāca-
sādhu pṛṣṭaṃ tvayā rājansādhu te vimalaṃ yaśaḥ /
kathayiṣyāmi rājeṃdra harivāsaramuttamam

utpannā cāsite pakṣe dvādaśī mama vallabhā /
mārgaśīrṣotpattiriti mama deha samudbhavā

surāsuravadhārthāya hyutpannā bharatarṣabha /
kathitā ca mayā sā vai tavāgre rājasattama

pūrvā caikādaśī rājaṃstrailokye sacarācare /
mārgaśīrṣe site pakṣe utpattiriti nāmataḥ

ataḥ paraṃ pravakṣyāmi mārgaśīrṣe sitā tu yā /
yasyāḥ śravaṇamātreṇa vājapeyaphalaṃ labhet

mokṣā nāmeti sā proktā sarvapāpaharā parā /
devaṃ dāmodaraṃ rājanpūjayecca prayatnataḥ

tulasyā maṃjarībhiśca dhūpairdīpaiḥ prayatnataḥ /
pūrveṇa vidhinā caiva daśamyekādaśī tathā

mokṣā caikādaśī nāmnā mahāpātakanāśinī /
rātrau jāgaraṇaṃ kāryaṃ nṛtyagītastavairmama

śṛṇu rājanpravakṣyāmi divyāṃ paurāṇikīkathām /
yasyāḥ śravaṇamātreṇa sarvapāpakṣayo bhavet

adhoyonigataścaiva pitaro yasya pāpataḥ /
asyāśca puṇyadānena mokṣaṃ yāṃti na saṃśayaḥ

caṃpake nagare ramye vaiṣṇavaiśca vibhūṣite /
vaikhānaso nāma nṛpaḥ putravatpālayetprajāḥ

vasaṃti bahavo viprā vedavedāṃgapāragāḥ /
ṛddhimatyaḥ prajāstasya rājño vaikhānasasya hi

evaṃ rājyaṃ prakurvāṇo rātrau svapnasya madhyataḥ /
svakīyapitaro dṛṣṭvā adhoyonigatā nṛpa

evaṃ dṛṣṭvā ca tānsarvānvismayāviṣṭamānasaḥ /
kathayāmāsa vṛttāṃtaṃ svapnajātaṃ dvijānprati

rājovāca-
mayā svapitaro dṛṣṭvā narakopagatā dvijāḥ /
tārayeti tanūjatvamasmānnirayasāgarāt

evaṃ bruvāṇāste nūnaṃ rodamānā muhurmuhuḥ /
mayā dṛṣṭā dvijaśreṣṭhā etasmācca na me sukham

etadrājyaṃ mama mahatsukhadāyi na vidyate /
aśvā gajāstathā sarve rocaṃte me na bho dvijāḥ

na dārā na sutā mahyaṃ rocaṃte dvijasattamāḥ /
kiṃ karomi kva gacchāmi hṛdayaṃ me'varudhyate

tadvrataṃ taṃ tapoyogaṃ yenaiva mama pūrvajāḥ /
mokṣaṃ prayāṃti sadyo vai kathyatāṃ ca dvijottamāḥ

putre tu jīvitaprāye balīyasi mahātmani /
pitāsti narake ghore tasya putrasya kiṃ phalam

brāhmaṇā ūcuḥ -
parvatasya mune rājannikaṭe cāśramo mahān /
gamyatāṃ rājaśārdūla bhūtaṃ bhavyaṃ vijānataḥ

teṣāṃ śrutvā tato vākyaṃ rājā vaikhānaso mahān /
jagāma cāśu tatraiva cāśramaṃ parvatasya ca

brāhmaṇairveṣṭito rājā rājabhiśca samanvitaḥ /
āśramaṃ vipulaṃ tasya saṃprāpto rājasattamaḥ

tatrargveda yajurveda sāmādhyayanakovidaiḥ /
veṣṭitaṃ munibhiścaiva dvitīyaṃ brahmaṇo yathā

dṛṣṭvā taṃ muniśārdūlaṃ rājā vaikhānasastathā /
daṃḍavatpraṇatiṃ kṛtvā pasparśa caraṇau muneḥ

papraccha kuśalaṃ tasya saptasvaṃgeṣvasau muniḥ /
rājye niṣkaṃṭakatvaṃ ca rājñaḥ saukhyasamanvitam

rājovāca -
tava prasādādbho svāminkuśalaṃ me'ṅgasaptasu /
bhaktā ye viṣṇuvipreṣu kathaṃ teṣāṃ ca vighnatā

mayā svapitaro dṛṣṭāḥ svapne ca narake sthitāḥ /
kasya puṇyasya sāmarthyānmokṣaṃ yāṃti dvijottama

ayaṃ me saṃśayaḥ svāminpraṣṭuṃ taṃ tvāmupāgataḥ /
upāyaḥ kaścidevātra kartavyo munisattama

etadvākyaṃ tataḥ śrutvā parvato munisattamaḥ /
dhyānastimitanetro'bhūttapasvī brahmasaṃnibhaḥ

muhūrtamekaṃ dhyānastho bhūpatiṃ pratyuvāca ha /
jñātaṃ hi tava rājeṃdra pitṝṇāṃ pūrvaceṣṭitam

pūrvajanmani tātaste kṣatriyo rājyagarvitaḥ /
sapatnyā ṛtukāle tu rājadharmapravartitaḥ

gato grāme tu tāṃ tyaktvā kāryārthī nijayoṣitam /
tava pitrā tu tasyāśca na dattamṛtudānakam

tena pāpaprabhāvena narake pitṛbhiḥ saha /
patito rājaśārdūla tava tātaḥ sudāruṇe

tataḥ punaruvācedaṃ rājā vaikhānaso munim /
kena vrataprabhāvena mokṣasteṣāṃ bhavenmune

muniruvāca-
mārgaśīrṣe site pakṣe mokṣā nāmeti nāmataḥ /
sarvaiścetadvrataṃ kāryaṃ pitre puṇyaṃ pradīyatām

tena puṇyaprabhāvena mokṣasteṣāṃ bhaviṣyati /
satyametanmahābhāga brahmaṇo vacanaṃ yathā

munervākyaṃ tataḥ śrutvā svagṛhaṃ punarāgataḥ /
mārgaśīrṣastathā māsaḥ prāptaḥ kaṣṭena tena vai

munervākyena tatkṛtvā vrataṃ vaikhānaso nṛpaḥ /
adadatpuṇyamakhilaiḥ sārddhaṃ pitre sa bhūmipaḥ

datte puṇyakṣaṇenaiva puṣpavṛṣṭirabhūddivi /
vaikhānasasya tāto vai pitṛbhirmokṣamāviśat

rājānaṃ cāṃtarikṣe sa giraṃ puṇyāmuvāca ha /
svastisvastīti te putra procya caivaṃ divaṃ gataḥ

evaṃ yaḥ kurute rājanmokṣāmekādaśīṃ śubhām /
tasya pāpāni naśyaṃti mṛto mokṣamavāpnuyāt

nātaḥ paratarā kācitmokṣadaikādaśī bhavet /
puṇyasaṃkhyāṃ na jānāmi rājanme priyakṛdvratam

ciṃtāmaṇisamā hyeṣā nṛṇāṃ mokṣapradāyinī /
paṭhanācchravaṇādasyā vājapeyaphalaṃ labhet

iti śrīpādme mahāpurāṇe paṃcapaṃcāśatsāhasryāṃ saṃhitāyāṃ uttarakhaṃḍe umāpatināradasaṃvāde mārgaśīrṣaśukla mokṣadā
ekādaśīnāmaikonacatvāriṃśo'dhyāyaḥ