Padma Purana · Chapter 6.28

mahādeva uvāca-
atrāpyudāharaṃtīmamitihāsaṃ purātanam /
purāṇaṃ paramaṃ puṇyaṃ sarvapāpaharaṃ śubham

kumāreṇa ca lokānāṃ namaskṛtya pitāmaham /
proktaṃ cedaṃ mamākhyānaṃ devarṣe brahmasūnunā

sanatkumāra uvāca-
gato'haṃ dharmarājānaṃ draṣṭuṃ saṃpūjito mudā /
śrutibhiḥ parayā bhaktyā tenokto'smi sukhāsane

mayā tatropaviṣṭena dṛṣṭaṃ kiṃcinmahādbhutam /
kāṃcanena vimānena vaiḍūryakṛtavedinā

maṇimuktavicitreṇa kiṃkiṇījālaśobhinā /
āgataṃ puruṣaṃ tatra āsanāddevasattama

sasaṃbhramaṃ samutthāya dṛṣṭvā dharmaḥ svayaṃ vibhuḥ /
gṛhītvā dakṣiṇe pāṇau pūjito'rgheṇa vai tataḥ

śirasyāghrāya deveśaḥ puraḥ sthāpya tataḥ param /
pūjayitvā tu taṃ dharma idaṃ vākyamuvāca ha

susvāgataṃ dharmadarśinprīto'smi darśanāttava /
samīpe mama tiṣṭhasva kiṃcijjñānaṃ vadasva me

punaryāsyasi tatsthānaṃ yatra brahmā vyavasthitaḥ /
ityukte ca tataścānyo vimānavaramāsthitaḥ

āgataḥ puruṣo devo yatra tiṣṭhati dharmarāṭ /
sa pūjito vimānasthaḥ praśrayāvanatena ca

sāmapūrvaṃ tathoktvā tu yathāpūrvaṃ naraḥ svayam /
kimanena kṛtaṃ karma yasya tuṣṭo bhavānbhṛśam

atra me kautukaṃ jātaṃ kṛtā hi svayameva tu /
yadasya bhavatā pūjā savismayamanaṃtaram

tathaivāsya kṛtā pūjā dvitīyasya narasya tu /
mene'haṃ śubhakarmāṇau vimānaṃ varasattamau

yastvamābhyāṃ svayaṃ pūjāṃ kuruṣe dharmakāraṇāt /
brahmāviṣṇuśivādyaistu pūjyase tvaṃ sadāniśam

yasyedṛkparamaṃ puṇyaṃ kimetau karma cakratuḥ /
kathyatāṃ mama sarvajña phalaṃ divyamavāpatuḥ

tacchrutvā sa tu māṃ prāha śṛṇu karmānayoḥ kṛtam /
yatkṛtvārhamihāyātau tacchṛṇuṣva mahāmate

dharma uvāca-
vaidiśaṃ nāma nagaraṃ pṛthivyāmasti viśrutam /
tatrābhūtpṛthivīpālo dharāpāla iti śrutaḥ

kasminkāle purā devī śaśāpa svagaṇaṃ krudhā /
madṛtena parā nārī bhartturyanme niveśitā

tasmāddvādaśavarṣāṇi jaṃbukastvaṃ bhaviṣyasi /
ityuktaḥ sa ca babhrāma jaṃbuko medinītalam

vetasī vetravatyostu saṃgame lokaviśrute /
śāpāṃto bhavitā putra ityuktaṃ girikanyayā

tatra cānaśanaṃ kṛtvā kṣetre prāṇāṃstato'tyajat /
divyarūpavapurbhūtvā jagāma viṣṇusannidhau

tatrāścaryaṃ mahaddṛṣṭvā dharāpālo mahīpatiḥ /
viṣṇorāyatanaṃ kṛtvā kṣetre prāṇaṃstato'tyajat

divyarūpavapurbhūtvā sthāpayāmāsa taṃ prabhum /
tasminpure narānsarvā sanniyojyāsya vīkṣaṇe

śubhamāyatanaṃ viṣṇostasmingrāme sadā janaiḥ /
pūrṇaṃ tu brāhmaṇādīnāṃ pūjayitvā kadaṃbakam

itihāsapurāṇajñaṃ vācakaṃ tu viśeṣataḥ /
pūjayitvā dvijaśreṣṭhaṃ vidyāśreṣṭhaṃ mahāmatiḥ

pustakaṃ cāpi saṃpūjya gaṃdhapuṣpādibhiḥ kramāt /
tatastamāha rājāsau vācakaṃ vinayānvitaḥ

etadāyatanaṃ viṣṇoḥ kāritaṃ ca tavāgrataḥ /
cāturvarṇyamidaṃ cāpi śrotukāmaṃ kadaṃbakam

tiṣṭhatīha dvijaśreṣṭha kuru pustakavācanam /
yāvatsaṃvatsaraṃ vipra gṛhya vṛttiṃ tvanuttamām

svarṇaniṣkaśataṃ cātra tato dāsye tathāparam /
pūrṇe varṣe dvijaśreṣṭha śreyo'tha mahamātmanaḥ

evaṃ pravartitaṃ tatra puṇyaṃ pustakavācanam /
varṣasaṃgatamātre tu tathā ca munisattama

athāyuṣaḥ kṣayāccāyaṃ kāladharmamupeyivān /
mayā cāsya vimānaṃ hi viṣṇunā preritaṃ divaḥ

ityeṣā karmaṇāṃ vyuṣṭiḥ puṇyamākhyānasaṃjñakam /
śrutaṃ pādmaṃ mahatpuṇyaṃ pavitraṃ pāpanāśanam

gaṃdhapuṣpopahāraistu na tuṣṭirjāyate tathā /
devānāmiha sarveṣāṃ purāṇaśravaṇādyathā

svarṇaratnādivastūnāṃ vastrāṇāṃ cāpi kṛtsnaśaḥ /
grāmāṇāṃ nagarāṇāṃ ca dānāttuṣṭirbhavennahi

yathā syāddharmaśravaṇātprītiḥ sarvadivaukasām /
itihāsapurāṇānāṃ śravaṇe munisattama

tathā syānme mahāprītiḥ sādhye sarvārthakāmike /
kanyādāne mahāprītirmama syānmunisattama

na tathā rocate sā ca yathā pustakavācanāt /
atha kiṃ bahunoktena nānyatprītikaraṃ mama

puṇyākhyānamṛte vipra guhyametatprakīrtitam /
yaścāyamaparo vipra ihāyāto narottamaḥ

saṃgatyānugataścāyaṃ dharmaśravaṇamuttamam /
śrutvā bhaktirabhūdasya śraddhayā paramātmanaḥ

kṛtvā pradakṣiṇaṃ tasya vācakasya mahātmanaḥ /
eṣa vipro muniśreṣṭha dadau svarṇasya māṣakam

nānyaddānaṃ kadā cakre lobhāviṣṭena cetasā /
pātradānātphalaprāptistvasya jātā na saṃśayaḥ

ityetatkathitaṃ karma ābhyāṃ caiva mahāmune

mahādeva uvāca-
etatpuṇyasya māhātmyaṃ ye śṛṇvaṃti manīṣiṇaḥ /
na teṣāṃ durgatiḥ kaccijjanmajanmani jāyate

iti śrīpādme mahāpurāṇe paṃcapaṃcāśatsahasrasaṃhitāyāṃ uttarakhaṇḍe umāpatināradasaṃvāde śāstravyākhyāmahimānāmāṣṭāviṃśo'dhyāyaḥ