પદ્મ પુરાણ · અધ્યાય 6.251

શ્રીરુદ્ર ઉવાચ-
અથ પૌંડ્રક વાસુદેવઃ કાશિરાજો વારાણસ્યાં વિવિક્તે દ્વાદશવર્ષં મહેશમર્ચ્ચયન્નિરાહારઃ પંચાક્ષરં જજાપ

પૌરશ્ચરણકાલે શંકરં સ્વનેત્રકમલેન પૂજયામાસ

તતઃ શૂલપાણિરુમાપતિઃ પ્રસન્નો વરં વૃણીષ્વેતિ તમાહ

અસૌ પંચવક્ત્રંસર્વભૂતપતિં શિવં પ્રસન્નં વરદ મમ વાસુદેવસમાનરૂપં પ્રયચ્છેત્યુવાચ

શિવસ્તસ્મૈ શંખ ચક્ર ગદા પદ્મયુત ચતુર્ભુજં પુંડરીકદલનિભલોચનં વાસુદેવસમાનકિરીટ।
લલિત કુંતલં પીતવસ્ત્રકૌસ્તુભાભરણાદિ ચિહ્નાન્યપિ મહ્યં દેહીતિ યાચિતઃ શિવઃ સર્વમપિ તસ્મૈ પ્રદદૌ

સ તુ વાસુદેવોઽહમિતિ સર્વલોકાન્મોહયામાસ

કદાચિત્સ્વર્ગતઃ મદબલોત્કટં તં કાશિપતિં નારદોઽભ્યેત્ય વસુદેવસુતમજિત્વા વાસુદેવત્વં ન વિદ્યતે ઇત્યુવાચ

સ તુ તસ્મિન્નેવ ક્ષણે ગરુડપતાકાયુતરૂપં રથમારોપ્ય ચતુરંગાક્ષૌહિણીબલેન દ્વારકામવાપ

તત્ર પુરદ્વારિ સ્વર્ણયાને સંસ્થિતો વાસુદેવોઽહં યુદ્ધાર્થં સંપ્રાપ્તોસ્મિ મામજિત્વાત વવાસુદેવત્વં નાસ્તીતિ દૂતં પ્રેષયામાસ

વિષ્ણુરપિ તચ્છ્રુત્વા વૈનતેયમારુહ્ય પૌંડ્રકેણ યોદ્ધું પુરદ્વારિ વિનિષ્ક્રમ્યાક્ષૌહિણીબલેન સ્યંદને સમાસીનં શંખચક્રગદાપદ્મહસ્તં પૌંડ્રકં દદર્શ

કૃષ્ણોઽથ શાર્ઙ્ગમાદાય સંવર્તાગ્નિપ્રભૈર્બાણૈસ્તથાશ્વગજપદાતિયુક્તં મહદક્ષૌહિણીબલં મુહૂર્તમાત્રેણ નિઃશેષં દદાહ

શરેણૈકેન તસ્ય હસ્તાવસક્તશંખચક્રગદાદિહેતીરપિ લીલયૈવ ચિચ્છેદ

પવિત્રેણ સુદર્શનેન કિરીટકુંડલયુતં તસ્ય શિરઃ કમલં છિત્ત્વા વારાણસ્યામંતઃ પુરે નિપાતયામાસ

તદ્દૃષ્ટ્વા સર્વે કાશીનિવાસિનઃ કિમેતદિત્યાશંક્ય વિસ્મિતા બભૂવુઃ

તસ્ય પૌંડ્રકસ્ય સુતો દંડપાણિરિતિ વાસુદેવેન ભગવતા નિહતં સ્વપિતરં શ્રુત્વા માત્રા મૃત્યુના સમાદિષ્ટઃ સ્વપુરોહિતેનાભિયુક્તો માહેશ્વરેણ ક્રતુના શંકરમિયાજ

સ તુ પ્રસન્નઃ કૃષ્ણજિઘાંસયા સમર્થાં માહેશ્વરીં કૃત્યાં તસ્મૈ સંપ્રીત્યા ચ દત્તવાન્

સ કાશિરાજસ્તાં મહોશ્વરીં જ્વાલાકુલોપચિતવિગ્રહાં સંદીપ્તસટાકલાપાં પિંગલનેત્રાં જ્વલત્કરાલવદનાં ત્રિશૂલહસ્તાં ભસ્માંગરાગલિપ્તાં નરમુંડમાલાવિભૂષિતાં સર્વદેવભયંકરીં રુદ્રદત્તાં સમીક્ષ્ય સપુત્રદારબાંધવસહિતં કૃષ્ણં જહીતિ પ્રેરયામાસ

સા તુ સર્વલોકભયાવહા સર્વાં પૃથ્વીં સ્વતેજસા નિર્દહંતી પ્રલયાશનિનિર્ભરસ્વનં નદંતી દ્વારકામવાપ

તત્રત્યાઃ સર્વેજનાસ્તાં દૃષ્ટ્વા મહાપ્રલયમિતિ મત્વા હાહાકારં કુર્વંતઃ કૃષ્ણં નિવેદયામાસુઃ

કૃષ્ણોઽપિ તાન્સર્વાન્ન ભેતવ્યમિત્યુક્ત્વા પ્રાકારતોરણે સ્થિતાં મહારૌદ્રાં કૃત્યાં તથાવિધાં દૃષ્ટ્વા સકલશસ્ત્રાસ્ત્રાનિવારણસમર્થં સહસ્રારં સુદર્શનં તસ્યા કૃત્યાયાં સહસા મુમોચ

સા તુ કલ્પાન્તાર્કકોટિસમવર્ચસા શતયોજનોદ્ગતં સકલદીપ્તાસ્ત્રયુતં હિરણ્મયં પ્રભાપૂર્ણં સકલજગત્પ્રલયસ્થિતિસમર્થં સહસ્રારં સર્વદેવનમસ્કૃતં જગચ્છરણભૂતં મહાસુદર્શનં વિલોક્ય વિનષ્ટતેજા ભયાર્તા ક્રોશંતી વારાણસીં પ્રતિદુદ્રાવ

સુદર્શનમપિ તાં કૃત્યાં ભૃશમન્વગાત્

સાપિ ભયાર્તા ક્રોશંતી કાશિપતેસ્તસ્યાંતઃપુરં પ્રવિવેશ

સુદર્શનોઽપિ તાં વારાણસીં પુરીં પ્રાપ્ય સભૃત્યબલવાહનં પૌંડ્રકસુતં દંડપાણિં નામકાશિરાજં બહુપ્રાસાદહર્મ્યમાલિનીં પુરીં માહેશ્વરીમપિ ભસ્માવશેષાં કૃત્વા સકલદેવમહર્ષિભિઃ પૂજ્યમાનઃ પુનરેવ દ્વારવત્યાં કૃષ્ણહસ્તં સુસૌમ્યં કલ્પમિવ આવિવેશ

અત્ર ચ શ્લોકા ગીયંતે ।
શસ્ત્રાસ્ત્રમોક્ષમજરં દગ્ધ્વા તદ્બલમોજસા ।
કૃત્યાં ભસ્માવશેષં તાં તતો વારાણસીં પુરીમ્

પ્રભૂતરથમાતંગાં સાશ્વાં પુંસ્ત્રીસમન્વિતામ્ ।
સાશેષકોષકોષ્ઠાં તાં દુર્નિરીક્ષ્યાં સુરૈરપિ

દ્વારોપલક્ષિતાશેષ ગૃહપ્રાકારચત્વરામ્ ।
પ્રદદાહ હરેશ્ચક્રં સકલામેવ તાં પુરીમ્

અક્ષીણગતિસામર્થ્યમસાધ્યકૃતસાધનમ્ ।
તચ્ચક્રં પ્રજ્વલદ્ભાસં વિષ્ણોરભ્યાયયૌ કરમ્

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે ઉમામહેશ્વરસંવાદે શ્રીકૃષ્ણચરિતે પૌંડ્રકપુત્રકૃત્યાવિધ્વંસનં નામૈકપંચાશદધિક દ્વિશતતમોઽધ્યાયઃ