Padma Purana · Chapter 6.24

mahādevauvāca-
prayāgatīrthamāhātmyaṃ pravakṣyāmi yathā śrutam /
mahādānaparāḥ puṇyakarmāṇo yatra saṃti hi

yatra gaṃgā ca yamunā yatra caiva sarasvatī /
taṃ devatīrthapravaraṃ devānāmapi durlabham

īdṛśaṃ triṣu lokeṣu bhūtaṃ na ca bhaviṣyati /
grahāṇāṃ ca yathā sūryo nakṣatrāṇāṃ yathā śaśī

tīrthānāmuttamaṃ tīrthaṃ prayāgākhyamanuttamam /
prātaḥkāle tu bho vidvanprayāge snānamācaret

mahāpāpādvinirmuktaḥ sa yāti paramaṃ padam /
deyaṃ kiṃcidyathāśakti dāridryābhāvamicchatā

yo narastatra gatvā vai prayāge snānamācaret /
dhaniko dīrghajīvī ca jāyate nātra saṃśayaḥ

yatra vaṭasyākṣayasya darśanaṃ kurute naraḥ /
tena darśanamātreṇa brahmahatyā vinaśyati

sa cākṣayavaṭaḥ khyātaḥ kalpāṃtepi ca dṛśyate /
śete viṣṇuryasya patre atoyamavyayaḥ smṛtaḥ

tatra pūjāṃ prakurvaṃti mānavā viṣṇuvallabhāḥ /
sūtreṇācchāditaṃ kṛtvā pūjāṃ caiva tu kārayet

mādhavākhyastatra devaḥ sukhaṃ tiṣṭhati nityaśaḥ /
tasya vai darśanaṃ kāryaṃ mahāpāpaiḥ pramucyate

yatra devāśca ṛṣayo manuṣyāścāpi sarvaśaḥ /
svasvasthānaṃ samāśritya tatra tiṣṭhaṃti nityaśaḥ

goghno vāpi ca cāṃḍālo duṣṭo vā duṣṭacetanaḥ /
bālaghātī tathā'vidvānmriyate tatra vai tadā

sa vai caturbhujo bhūtvā vaikuṃṭhe vasate ciram /
prayāge tu naro yastu māghasnānaṃ karoti ca

na tasya phalasaṃkhyāsti śṛṇu devarṣisattama /
āpo nārā iti proktā sarvalokeṣu śuśruma

tena nārāyaṇaḥ proktaḥ snātānāṃ bhuktimuktidaḥ /
grahāṇāṃ ca yathā sūryo nakṣatrāṇāṃ yathā śaśī

māsānāṃ hi tathā māghaḥ śreṣṭhaḥ sarveṣu karmasu /
makarasthe ravau māghe prātaḥkāle tathāmale

goḥpade'pi jale snānaṃ svargadaṃ pāpināmapi /
yogo'yaṃ durlabho vidvantrailokye sacarācare

asminyo yatnamāpannaḥ snāyādapi dinatrayam /
paṃca vā sapta vāpyatra snānaṃ kurvanprayāgajam

caṃdravadvarddhate so'pi kule vāḍavasattama /
carācarāśca ye jīvāstathaiva manujādayaḥ

prayāgaṃ tīrthamāśritya vaikuṃṭhaṃ yāṃti te'cirāt /
ye vasiṣṭhādayastatra ṛṣayaḥ sanakādayaḥ

te'pi prayāgajaṃ tīrthaṃ sevaṃte ca punaḥpunaḥ /
yatra viṣṇuśca rudraśca yatreṃdraśca tathā punaḥ

te'pi sarve vasaṃtīha prayāge tīrthasattame /
dānaṃ tatra praśaṃsaṃti niyamāṃśca tathaiva ca

tatra snātvā ca pītvā ca punarjanma na vidyate

iti śrīpādme mahāpurāṇe paṃcapaṃcāśatsahasrasaṃhitāyāṃ uttarakhaṇḍe umāpatināradasaṃvāde prayāgamāhātmye caturviṃśo'dhyāyaḥ