Padma Purana · Chapter 6.237

śrīrudra uvāca-
hiraṇyaka hiraṇyākṣau kāśyapeyau mahābalau /
ditiputrau mahāvīryyau sarvvadaityapatī ubhau

nāmnā tau jayavijayau śvetadvīpe hariṃ gatau /
tasminpraviṣṭayogīndrānsanakādīnmahābalau

vārayāmāsaturdevi harisaṃdarśanotsukān /
taiḥ praśaptau mahāvīryyau dvārapālau surottamau

sanakādaya ūcuḥ-
utsṛjya tatpṛthivyāṃ ca yātau devasya kiṃkarau /
rudra uvāca-
iti śāpaṃ tayordattvā tatra tasthurmunīśvarāḥ

devastamarthaṃ jñātvā ca tānāhūya ca tāvapi

tau cotthāyābravīttatra bhagavānbhūtabhāvanaḥ /
bhagavānuvāca-
kṛtavaṃtau mahāvīryyāvaparādhaṃ mahātmanām

nātikramaṇīyamidaṃ bhavadbhyāṃ dvārapālakau /
dāsatvaṃ saptajanmāni yuvāṃ bhaktau mamānaghau

amitratastathā trīṇi janmāni bhajato'pi vā /
rudra uvāca-
ityuktau tau mahāvīryyāvabrūtāṃ parameśvaram

jayavijayāvūcatuḥ /
cirakālaṃ mahīṃ gaṃtuṃ na samarthau sva mānada /
tasmādvairāya janmāni viddhi vāṃ ca vrajāvahe

devatva yaiva nihato prāpsyāvo bhavadaṃtikam /
rudra uvāca-
ityuktvā dvārapālau tau pūrvaṃ jātau mahābalau

kaśyapasya mahāvīryyau ditigarbhe mahāsurau /
hiraṇyakaśipurjyeṣṭho hiraṇyākṣaḥ kaniṣṭhakaḥ

ubhau tau lokavikhyātau mahāvīryya baloddhatau /
apramāṇaśarīraḥ sa hiraṇyākṣo mahoddhataḥ

utpāṭya bāhusāhasraiḥ pṛthivīṃ samahīdharām /
sasāgarāṃ dvīpayutāṃ sarvvaprāṇisamanvitām

utpāṭya śirasā kṛtvā praviveśa rasātalam /
tato devagaṇāḥ sarve cukruśurbhayapīḍitāḥ

śaraṇaṃ prayayurdevaṃ nārāyaṇamanāmayam /
tatastadadbhutaṃ jñātvā śaṃkhacakragadādharaḥ

vārāharūpamāsthāya viśvarūpaṃ janārdanaḥ /
anādimadhyāṃtavapuḥ sarvadevamayo vibhuḥ

viśvataḥ pāṇipaccakṣurmahādaṃṣṭro mahābhujaḥ /
daṃṣṭraikayā tu taṃ daityaṃ jaghāna parameśvaraḥ

saṃcūrṇitamahāgātro mamāra ditijādhamaḥ /
patitāṃ dharaṇīṃ dṛṣṭvā daṃṣṭrayoddhṛtya pūrvavat

saṃsthāpya dhārayāmāsa śeṣe kūrmmavapustadā /
taṃ dṛṣṭvā devatāḥ sarvve kroḍarūpaṃ mahāharim /
tuṣṭuvurmmunayaścaiva bhaktinamrātmamūrttayaḥ

devā ūcuḥ-
namo yajñavarāhāya namaste śatabāhave /
namaste devadevāya namaste viśvarūpiṇe

namaḥ sthitisvarūpāya sarvayajñasvarūpiṇe /
kalākāṣṭhānimeṣāya namaste kālarūpiṇe

bhūtātmane namastubhyamṛgvedavapuṣe tathā /
surātmane namastubhyaṃ sāmavedāya te namaḥ

ॐkārāya namastubhyaṃ yajurvedasvarūpiṇe /
ṛcaḥsvarūpiṇe caiva caturvedamayāya ca

namaste vedavedāṅga sāṃgopāṃgāya te namaḥ /
goviṃdāya namastubhyamanādinidhanāya ca

namaste vedaviduṣe viśiṣṭaikasvarūpiṇe /
śrībhūlīlādhipataye jagatpitre namonamaḥ

rudra uvāca-
ityādi stutibhiḥ stutvā devaṃ vārāharūpiṇam /
arccayāmāsurātmeśaṃ gaṃdhapuṣpādibhirharim

samarcyamānastairdevaisteṣāmiṣṭaṃ varaṃ dadau /
gaṃdharvairapsarobhiśca gāyamāno mudā hariḥ

maharṣibhiḥ stūyamānastatraivāṃtaradhīyata /
ebhiḥ stutvā naro bhaktyā prātarutthāya bhaktimān

īpsitāṃllabhate bhūmiṃ ciraṃ sasyaphalānvitām /
etatte sarvamākhyātaṃ vārāhavaibhavaṃ haraiḥ /
nārasiṃhaṃ tathā vakṣye śṛṇu devi varānane

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe/
varāhāvatārakathanaṃnāma saptatriṃśadadhikadviśatatamo'dhyāyaḥ