Padma Purana · Chapter 6.236

pārvatyuvāca-
tāmasāni ca śāstrāṇi samācakṣva mamānagha /
saṃproktānica tairvviprairbhagavadbhaktivarjitaiḥ /
teṣāṃ nāmāni kramaśaḥ samācakṣva sureśvara

rudra uvāca-
śṛṇu devi pravakṣyāmi tāmasāni yathākramam

teṣāṃ smaraṇamātreṇa mohaḥ syājjñānināmapi /
prathamaṃ hi mayaivoktaṃ śaivaṃ pāśupatādikam

macchaktyāveśitairvvipraiḥ proktāni ca tataḥ śṛṇu /
kaṇādena tu saṃproktaṃ śāstraṃ vaiśeṣikaṃ mahat

gautamena tathā nyāyaṃ sāṃkhyaṃ tu kapilena vai /
dhiṣaṇena tathā proktaṃ cārvvākamatigarhitam

daityānāṃ nāśanārthāya viṣṇunā buddharūpiṇā /
bauddhaśāstramasatproktaṃ nagnanīlapaṭādikam

māyāvādamasacchāstraṃ pracchannaṃ bauddha ucyate /
mayaiva kathitaṃ devi kalau brāhmaṇarūpiṇā

apārthaṃ śrutivākyānāṃ darśayanlokagarhitam /
svakarmmarūpaṃ tyājyatvamatraiva pratipādyate

sarvakarmmaparibhraṣṭairvaidharmmatvaṃ taducyate /
pareśajīvapāraikyaṃ mayā tu pratipādyate

brahmaṇosya svayaṃ rūpaṃ nirguṇaṃ vakṣyate mayā /
sarvasya jagato'pyatra mohanārthaṃ kalau yuge

vedārthavanmahāśāstraṃ māyayā yadavaidikam /
mayaiva kalpitaṃ devi jagatāṃ nāśakāraṇāt

madājñayā jaimininā pūrvaṃ vedamapārthakam /
nirīśvareṇa vādena kṛtaṃ śāstraṃ mahattaram

śāstrāṇi caiva girije tāmasāni nibodha me /
purāṇāni ca vakṣyāmi tāmasāni yathākramāt

brāhmaṃ pādmaṃ vaiṣṇavaṃ ca śaivaṃ bhāgavataṃ tathā /
tathaiva nāradīyaṃ tu mārkaṇḍeyantu saptamam

āgneyamaṣṭamaṃ proktaṃ bhaviṣyaṃ navamaṃ tathā /
daśamaṃ brahmavaivartaṃ liṅgamekādaśaṃ smṛtam

dvādaśaṃ ca varāhaṃ ca vāmanaṃ ca trayodaśam /
kaurmmaṃ caturdaśaṃ proktaṃ mātsyaṃ paṃcadaśaṃ smṛtam

ṣoḍaśaṃ gāruḍaṃ proktaṃ skaṃdaṃ saptadaśaṃ smṛtam /
aṣṭādaśaṃ tu brahmāṃḍaṃ purāṇāni yathākramam

mātsyaṃ kaurmaṃ tathā laiḍgaṃ śaivaṃ skāṃdaṃ tathaiva ca /
āgneyaṃ ca ṣaḍetāni tāmasāni nibodha me

vaiṣṇavaṃ nāradīyaṃ ca tathā bhāgavataṃ śubham /
gāruḍaṃ ca tathā pādmaṃ vārāhaṃ śubhadarśane

sātvikāni purāṇāni vijñeyāni śubhāni vai /
brahmāṃḍa brahmavaivarttaṃ mārkaṃḍeyaṃ tathaiva ca

bhaviṣyaṃ vāmanaṃ brāhmaṃ rājasāni nibodha me /
sātvikā mokṣadāḥ proktā rājasāḥ sarvadā śubhāḥ

tathaiva tāmasā devi nirayaprāptihetavaḥ /
tathaiva smṛtayaḥ proktā ṛṣibhistriguṇānvitāḥ

sātvikā rājasāścaiva tāmasā śubhadarśane /
vāsiṣṭhaṃ caiva hārītaṃ vyāsaṃ pārāśaraṃ tathā

bhāradvājaṃ kāśyapaṃ ca sātvikā muktidāḥ śubhāḥ /
yājñavalkyaṃ tathātreyaṃ taittiraṃ dākṣameva ca

kātyāyanaṃ vaiṣṇavaṃ ca rājasāṃ svargadāḥ śubhāḥ /
gautamaṃ bārhaspatyaṃ ca sāṃvarttaṃ ca yamaṃ smṛtam

sākhyaṃ cauśanasaṃ ceti tāmasā nirayapradāḥ /
kimatra bahunoktena purāṇeṣu smṛtiṣvapi

tāmasā narakāyaiva varjayettānvicakṣaṇaḥ /
etatte sarvamākhyātaṃ prasaṃgācchubhadarśanam /
śeṣāṃ ca prabhavāvasthāṃ harervakṣyāmi te śṛṇu

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe tāmasaśāstrakathanaṃnāma ṣaṭtriṃśadadhikadviśatatamo'dhyāyaḥ