પદ્મ પુરાણ · અધ્યાય 6.237

શ્રીરુદ્ર ઉવાચ-
હિરણ્યક હિરણ્યાક્ષૌ કાશ્યપેયૌ મહાબલૌ ।
દિતિપુત્રૌ મહાવીર્ય્યૌ સર્વ્વદૈત્યપતી ઉભૌ

નામ્ના તૌ જયવિજયૌ શ્વેતદ્વીપે હરિં ગતૌ ।
તસ્મિન્પ્રવિષ્ટયોગીન્દ્રાન્સનકાદીન્મહાબલૌ

વારયામાસતુર્દેવિ હરિસંદર્શનોત્સુકાન્ ।
તૈઃ પ્રશપ્તૌ મહાવીર્ય્યૌ દ્વારપાલૌ સુરોત્તમૌ

સનકાદય ઊચુઃ-
ઉત્સૃજ્ય તત્પૃથિવ્યાં ચ યાતૌ દેવસ્ય કિંકરૌ ।
રુદ્ર ઉવાચ-
ઇતિ શાપં તયોર્દત્ત્વા તત્ર તસ્થુર્મુનીશ્વરાઃ

દેવસ્તમર્થં જ્ઞાત્વા ચ તાનાહૂય ચ તાવપિ

તૌ ચોત્થાયાબ્રવીત્તત્ર ભગવાન્ભૂતભાવનઃ ।
ભગવાનુવાચ-
કૃતવંતૌ મહાવીર્ય્યાવપરાધં મહાત્મનામ્

નાતિક્રમણીયમિદં ભવદ્ભ્યાં દ્વારપાલકૌ ।
દાસત્વં સપ્તજન્માનિ યુવાં ભક્તૌ મમાનઘૌ

અમિત્રતસ્તથા ત્રીણિ જન્માનિ ભજતોઽપિ વા ।
રુદ્ર ઉવાચ-
ઇત્યુક્તૌ તૌ મહાવીર્ય્યાવબ્રૂતાં પરમેશ્વરમ્

જયવિજયાવૂચતુઃ ।
ચિરકાલં મહીં ગંતું ન સમર્થૌ સ્વ માનદ ।
તસ્માદ્વૈરાય જન્માનિ વિદ્ધિ વાં ચ વ્રજાવહે

દેવત્વ યૈવ નિહતો પ્રાપ્સ્યાવો ભવદંતિકમ્ ।
રુદ્ર ઉવાચ-
ઇત્યુક્ત્વા દ્વારપાલૌ તૌ પૂર્વં જાતૌ મહાબલૌ

કશ્યપસ્ય મહાવીર્ય્યૌ દિતિગર્ભે મહાસુરૌ ।
હિરણ્યકશિપુર્જ્યેષ્ઠો હિરણ્યાક્ષઃ કનિષ્ઠકઃ

ઉભૌ તૌ લોકવિખ્યાતૌ મહાવીર્ય્ય બલોદ્ધતૌ ।
અપ્રમાણશરીરઃ સ હિરણ્યાક્ષો મહોદ્ધતઃ

ઉત્પાટ્ય બાહુસાહસ્રૈઃ પૃથિવીં સમહીધરામ્ ।
સસાગરાં દ્વીપયુતાં સર્વ્વપ્રાણિસમન્વિતામ્

ઉત્પાટ્ય શિરસા કૃત્વા પ્રવિવેશ રસાતલમ્ ।
તતો દેવગણાઃ સર્વે ચુક્રુશુર્ભયપીડિતાઃ

શરણં પ્રયયુર્દેવં નારાયણમનામયમ્ ।
તતસ્તદદ્ભુતં જ્ઞાત્વા શંખચક્રગદાધરઃ

વારાહરૂપમાસ્થાય વિશ્વરૂપં જનાર્દનઃ ।
અનાદિમધ્યાંતવપુઃ સર્વદેવમયો વિભુઃ

વિશ્વતઃ પાણિપચ્ચક્ષુર્મહાદંષ્ટ્રો મહાભુજઃ ।
દંષ્ટ્રૈકયા તુ તં દૈત્યં જઘાન પરમેશ્વરઃ

સંચૂર્ણિતમહાગાત્રો મમાર દિતિજાધમઃ ।
પતિતાં ધરણીં દૃષ્ટ્વા દંષ્ટ્રયોદ્ધૃત્ય પૂર્વવત્

સંસ્થાપ્ય ધારયામાસ શેષે કૂર્મ્મવપુસ્તદા ।
તં દૃષ્ટ્વા દેવતાઃ સર્વ્વે ક્રોડરૂપં મહાહરિમ્ ।
તુષ્ટુવુર્મ્મુનયશ્ચૈવ ભક્તિનમ્રાત્મમૂર્ત્તયઃ

દેવા ઊચુઃ-
નમો યજ્ઞવરાહાય નમસ્તે શતબાહવે ।
નમસ્તે દેવદેવાય નમસ્તે વિશ્વરૂપિણે

નમઃ સ્થિતિસ્વરૂપાય સર્વયજ્ઞસ્વરૂપિણે ।
કલાકાષ્ઠાનિમેષાય નમસ્તે કાલરૂપિણે

ભૂતાત્મને નમસ્તુભ્યમૃગ્વેદવપુષે તથા ।
સુરાત્મને નમસ્તુભ્યં સામવેદાય તે નમઃ

ૐકારાય નમસ્તુભ્યં યજુર્વેદસ્વરૂપિણે ।
ઋચઃસ્વરૂપિણે ચૈવ ચતુર્વેદમયાય ચ

નમસ્તે વેદવેદાઙ્ગ સાંગોપાંગાય તે નમઃ ।
ગોવિંદાય નમસ્તુભ્યમનાદિનિધનાય ચ

નમસ્તે વેદવિદુષે વિશિષ્ટૈકસ્વરૂપિણે ।
શ્રીભૂલીલાધિપતયે જગત્પિત્રે નમોનમઃ

રુદ્ર ઉવાચ-
ઇત્યાદિ સ્તુતિભિઃ સ્તુત્વા દેવં વારાહરૂપિણમ્ ।
અર્ચ્ચયામાસુરાત્મેશં ગંધપુષ્પાદિભિર્હરિમ્

સમર્ચ્યમાનસ્તૈર્દેવૈસ્તેષામિષ્ટં વરં દદૌ ।
ગંધર્વૈરપ્સરોભિશ્ચ ગાયમાનો મુદા હરિઃ

મહર્ષિભિઃ સ્તૂયમાનસ્તત્રૈવાંતરધીયત ।
એભિઃ સ્તુત્વા નરો ભક્ત્યા પ્રાતરુત્થાય ભક્તિમાન્

ઈપ્સિતાંલ્લભતે ભૂમિં ચિરં સસ્યફલાન્વિતામ્ ।
એતત્તે સર્વમાખ્યાતં વારાહવૈભવં હરૈઃ ।
નારસિંહં તથા વક્ષ્યે શૃણુ દેવિ વરાનને

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે।
વરાહાવતારકથનંનામ સપ્તત્રિંશદધિકદ્વિશતતમોઽધ્યાયઃ