Padma Purana · Chapter 6.212

nārada uvāca-
ityuktvā tasya viprasya pitarau divyarūpiṇau /
vimānavaramāruhya gatau haripuraṃ prati

tayoḥ putrastu tatraiva kośalāyāṃ dinatrayam /
uṣitvā svagṛhaṃ prāyātciṃtayaṃstīrthavaibhavam

iyameva tu kathyaṃte vibudhaiḥ kośalā nṛpa /
kathayiṣyāmi tatte'haṃ śravaṇotsukacetase

te dākṣiṇātyā baṭavastasyāmūṣu mumūrṣavaḥ /
samarthārthapradāyinyāṃ kośalāyāṃ vipadyatām

kaścidekastadā teṣu tāmanādṛtya kośalām /
gacchannārāyaṇasthānaṃ viṣṇunā vāritaḥ pathi

vṛddhabrāhmaṇarūpeṇa proktaṃ ceti dvijaṃ prati /
vṛddhabrāhmaṇa uvāca-
kva yāsi brāhmaṇaśreṣṭha tyaktvemāṃ kośalāṃ śubhām

iṃdraprasthamidaṃ tīrthaṃ sarvatīrthottamaṃ dvija /
kośalā hyatra putreyaṃ muktidā viṣṇuvallabhā

yatra yāsi vihāyaināṃ niṣkāmapadadāyinīm /
na siddhirbhavitā tatra viṣṇuste ca parāṅmukhaḥ

muktiṃ cedicchase vipra tīrthenyā saṃpragṛhya ca /
yasya yasyecchayā snāsi taṃ taṃ vargaṃ pradāsyati

tava dṛṣṭipathe vipra sarpo'pi suratāmiyāt /
asyāḥ prasādato muktau svargasthau vipradaṃpatī

saṃjātapratyayo'pi tvametanmāhātmyadarśanāt /
labdhvā bhāgyodayenāpi kathamenāṃ vimuṃcasi

yathā kaścittṛṣārto'pi labdhvāpyamṛtavāridhim /
taṃ tyaktvā yāti paṃkāṃbhastadvattvaṃ mūḍha dṛśyase

yathā ciṃtāmaṇiṃ kaścitkūpe kṣipati mohitaḥ /
hastasthaṃ yā gatistasya dṛśyate sā gatistava

ārādhya viṣṇuṃ viśveśaṃ yathā kaścitpumānkudhīḥ /
sukhamaiṃdriyakaṃ tucchaṃ yācate sā gatistava

na yāti kośalāmenāṃ tyaktvā sarvārthadāyinīm /
snātasyātra diva prāptirmṛtasyāmṛtasaṃsthitiḥ

nārada uvāca-
rājannākarṇya vipro'sau dvijaśreyabhṛto hareḥ /
vākyaṃ provāca viprāya śreṣṭhaṃ badarikāśramam

vipra uvāca-
bho bho vipravara śraddhā tava vākyena jāyate /
mama śrutavataḥ pūrvamalpagrāmasya vaibhavam

iṃdraprasthamidaṃ tīrthaṃ na kadācinmayā śrutam /
kutastu kośalāvṛddha etadaṃtaravartinī

yatra nārāyaṇaḥ sākṣānmuktā yatra ca yoginaḥ /
muktvā tamāśramaṃ puṇyaṃ tiṣṭhāmyatra kathaṃ dvija

yathāgatya svayaṃ viṣṇurityuktvā māṃ nivārayet /
badaryāścādhikaṃ kṣetramiṃdraprasthamidaṃ dvija

tadāhaṃ na pratiṣṭhāmi cālito'pi tamāśramam /
muktikāmaḥ svasadanānnānyathā sthitiratra me

nārada uvāca-
ityukte tena vipreṇa prādurāsīccaturbhujaḥ /
vihāya prākṛtaṃ rūpaṃ divyarūpadharo hariḥ

uvāca ca mahābhāgaṃ taṃ dvijaṃ mokṣakāmukam /
viṣṇuruvāca-
iṃdraprasthamidaṃ vipra sarvatīrthottamottamam /
brahmajñeṣviva sarveṣu śaṃbhurgaṃgānadīṣviva

himavāniva śaileṣu pakṣirāḍiva pakṣiṣu /
tridaśeṣu yathā śakro vaiṣṇaveṣviva nāradaḥ

tejasviṣu yathā sūryaḥ kṣīrābdhiriva cābdhiṣu /
yathā varṇeṣu bhūdevaḥ sṛṣṭiṣviva pitāmahaḥ

viṣṇoryathāvatāreṣu kauśalyā janito varaḥ /
tathā samastatīrtheṣu śakraprasthamidaṃ varam

niṣkāmo vā sakāmo vā yāti tīrthe kvacinnaraḥ /
tatra tatra samastātmā phaladātāhameva vai

iṃdraprasthāṃtaragatāṃ tyaktvā yo yāti kośalām /
sa no phalamavāpnoti bhakto varadavṛṃdapāt

nārada uvāca-
evaṃ niśamya tadvākyaṃ dṛṣṭvā tadrūpamuttamam /
praṇipatya ramākāṃtaṃ tasyāmevāgamaddvijaḥ

bhagavānapi viśvātmā sapadyaṃtardadhe vibhuḥ /
tattvamuddiśya taṃ vipraṃ tena bhāvena pūjitaḥ

tatrāgatya sa vipro'sau kośalāyāṃ narādhipa /
kathayāmāsa tadvṛttaṃ sarvaṃ sarvānsvasaṃginaḥ

tepi śrutvā mahābhāgā dākṣiṇātyā dvijātayaḥ /
tasyāmanaśanaṃ kṛtvā tatyajuḥ prākṛtaṃ vapuḥ

tadeva garuḍārūḍhaḥ śrīviṣṇuṃ samupāgataḥ /
vimānaiḥ svagaṇaiḥ sārddhaṃ tāvadbhirdīptibhāsvaraiḥ

te taṃ dṛṣṭvā samāyāṃtaṃ vimānaṃ gaṇasaṃyutam /
vapuṣā divyarūpeṇa daṃḍavatpatitā bhuvi

tuṣṭavuśca dvijāḥ sarve divyajñānavapurddharāḥ /
taṃ divyarūpiṇaṃ devadevavaṃdyapadāṃbujam

brāhmaṇā ūcuḥ -
namaste'tasīpuṣpasaṃkāśabhāsaṃ tanuṃ bibhrate pītavāso vṛtāya /
lasatkuṃḍalaprotanānopalāya śrutau caṃcalā vyāpinīlāṃbudāya

bhaktistvadīyā kila kalpavallī samāśritā yacchati cittavāṃcchitam /
yathā tathaiṣā tava kośalā vibho janairubhe te kṛpayā tavāpyate

vaṃdāmahe te caraṇāraviṃdaṃ vṛdāṃrakairvṛṃditamīśvarādyaiḥ /
viciṃtyamānaṃ hṛdi yogivṛṃdaiḥ kaṃdaṃ parānaṃdabhuvo vimukteḥ

prāptāḥ kāmaṃ śrīpatetvatsvarūpaṃ śrīvatsādyairlakṣitaṃ cārucihnaiḥ /
vāṃcchāmaste dāsabhāvaṃ tathāpi prāptaṃ sarvairādṛtaṃ nāradādyaiḥ

yatsaukhyaṃ te dāsabhāvaṃ gatānāṃ tanno lakṣmyā vakṣasoṃtarvasaṃtyāḥ /
tajjānāti śrīpate śrīmaheśo nānyo loke yena taccānubhūtam

madhye'smākaṃ śrīpate sevakānāṃ nīrāgāṇāmapyasau mānanīyaḥ /
asmāttaṃ te nāradādyā munīśāstvadbhaktāptairlokanāthaṃ bhajaṃte

kāmaṃ brahmānaṃdamāsoṃtarātmā tvaddāsye no tṛptimāyāti śaṃbhuḥ /
vāraṃvāraṃ tvadguṇānāgrahītuṃ nṛtyatyuccaistvatparo bhāvayuktaḥ

hetorasmāddehinaḥ svasya dāsyaṃ yatprāptānāṃ normayaḥ saṃbhavaṃti /
tvaccihnāṃgau dvārapālau tadīyau mohāddhāmaprāpya tau tatsvakīyam

lokādasmādaṃtareṇa tvadicchā tvallokānāṃ nodyate cāśupātaḥ /
ko jānīyāttāvakīmatra māyāṃ durvijñeyāṃ brahma śarvādidevaiḥ

nārada uvāca-
evaṃ taiḥ stūyamānaḥ sa prabhurnijapadonmukhaḥ /
uvāca tāndākṣiṇātyānmeghagaṃbhīrayā girā

śrībhagavānuvāca-
bhobho dvijā bhavaṃto'syā kośalāyāḥ prasādataḥ /
sārūpyamapi me prāptā dāsabhāvaṃ ca yāsyatha

adyaprabhṛti me viprāstīrthametadanuttamam /
dakṣiṇakośaletyuccairnāmnā khyātaṃ bhaviṣyati

yatra dāśarathī bhūtvā nihaniṣyaddaśānanam /
sā kathyate munivaraiḥ sarvairuttarakośalā

vipanno jñānavānyasyā vaikuṃṭhamadhirohati /
vināpi tadvasedyo'syāṃ so'pi svargaṃ ca gacchati

imāṃ tato daśaguṇāmāhurdakṣiṇakośalām /
ekādaśaguṇāmeke samyagāhurmunīśvarāḥ

iyāneva viśeṣo'sti tasyā asyā matirmama /
tasyāṃ mṛtaṃ nayaṃtyete vaikuṃṭhaṃ māmakā gaṇāḥ

asyāṃ mṛtaṃ svayamahamananyavadamānasam /
āropya garuḍaṃ dattvā sārūpyaṃ prāpayāmi tat

nārada uvāca-
ityuktvā tāndvijānviṣṇurnītvā vaikuṃṭhamabhyagāt /
mahimānaṃ stuvannasya svayaṃ tīrthasya bhūpate

etatte sarvamākhyātaṃ kāraṇaṃ jagatīpate /
yeneyaṃ kathyate vijñairiha dakṣiṇakośalā

kalimalakulahaṃtā śṛṇvatāṃ mānavānāṃ kamalanayanapādaprāptaye vāṃcchitaśca /
nṛpavara mahimā te varṇitaḥ kośalāyā madhuvanabhavavṛttaṃ śṛṇvataste vadāmi

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe kāliṃdīmāhātmye kośalāmahimāvarṇanaṃnāma dvādaśādhikadviśatatamo'dhyāyaḥ