Padma Purana · Chapter 6.209

yudhiṣṭhira uvāca-
saubhare kasya tīrthasya māhātmyaṃ nārado muniḥ /
varṇayāmāsa śibaye śakratīrthagatasya ca

atastu mama śuśrūṣā jāyate munipuṃgavaḥ /
śivināradasaṃvādaṃ brūhi puṇyaṃ natāya me

saubhariruvāca-
dharmarāja śibīrājā śrutvā nāradavarṇitam /
dvārakāyāstu māhātmyaṃ tamevāpṛcchadādarāt

śibiruvāca-
brahmāṃgaja suraśreṣṭha śrutaṃ māhātmyamuttamam /
iṃdraprasthataṭasthāyā dvārakāyā mayādbhutam

ayodhyāyāṃ yadi mune kiṃcidasti pavitrakam /
caritaṃ mama tadbrūhi pipāsostvadvaco'mṛtam

nārada uvāca-
astyatra caritaṃ puṇyaṃ mahāpātakanāśanam /
nāpitasyādyayuktasya mukuṃdasya dvijasya ca

brahmahā nāpito rājannapamṛtyuṃ gato dvijaḥ /
prasādātkośalāyāstu dvāvapi svargatiṃ gatau

caṃdrabhāgā nadī tīre purī sā ca niveśitā /
tatrāsti nāpitaḥ pāpaścaṃḍakonāma garhitaḥ

cauryeṇa paravittānāmapahartā sa pāpakṛt /
ghātakaḥ śastrapāśādyaiḥ pāṃthānāmavaluṃṭhakaḥ

dyūtamadyarato nityaṃ parastrīlaṃpaṭeṃdriyaḥ /
bhitvā devālayaṃ bhittimiṣṭikā grāva vikrayī

sa tasyodvasitābhyāse brāhmaṇo vasati śriyā /
saṃyukto brahmakarmajño mukuṃdo nāmato nṛpa

sa ekadā samāliṃgya taruṇīmātmayoṣitam /
suṣvāpa suratāyāsa ślathāṃgo niśi nirbhayam

sa caṃḍako niśīthe'tha praviveśa tadālayam /
mukuṃdasya samāhartuṃ harmye bhūṣādi vastu yat

upakāryā bahisthaṃ yattadgṛhītvo'gamadgṛham /
svakīyaṃ ca punastasya brāhmaṇasyāviśadgṛham

kapāṭotpāṭanārthī tu yatnena mahatā'bhavat /
lohayaṃtrāvaruddhaśca sa noddhāṭayituṃ kṣamaḥ

āruroha tadā tasya brāhmaṇasyāviśadgṛham /
praviśya tadgṛhaṃ krūraḥ kṛpaṇaṃ pāṇinādadhat

aṭṭālikāṃ sa pāpiṣṭho nāpitastaskarakriyaḥ /
tatrāpaśyatprasuptau tau daṃpatīrativihvalau

jagāma ca tayoḥ pārśve hemabhūṣājighṛkṣayā /
śayyāyā ekadeśasthaṃ gṛhītvā bhūṣaṇaṃ bahu

hartuṃ tadaṃgato hastaṃ prasasāra sa nāpitaḥ /
taskarasparśato vipro jajāgāra bhayāturaḥ

na kiṃcidūce saṃmīlya netre tatraiva saṃsthitaḥ /
yadā sa taskaraḥ pāpo gṛhītvā dehabhūṣaṇam

calitaḥ sa tadā tena dorbhyāmātto dvijena hi /
paścādāgatya vittasyāsahamānena saṃkṣayam

tenāpi nṛpa caureṇa kṛpāṇena hato dvijaḥ /
vidīrṇodaramadhyastu tātamātaritīrayan

vadaṃtaḥ kiṃkimetyetatpārśvaṃ tasyā yayurjanāḥ /
dadṛśustaṃ niḥsṛtāṃtraṃ rudhirāliptavigraham

papracchuśca mukuṃdedaṃ karma kenedṛśaṃ kṛtam /
so'pi kṛcchreṇa mahatā provācedaṃ svabāṃdhavān

mukuṃda uvāca-/
mamaiva paripāko'yaṃ pūrvopārjitakarmaṇām /
na kaścitsukhaduḥkhasya dātā kasyāpi dehinaḥ

dharmo'dharmaśca tāveva teṣāṃ mūlaṃ purākṛtau /
nārada uvāca-
ityuktvā sa tu bhūyasyāpīḍayā gāḍhapīḍitaḥ

tatyāja bhūpate prāṇānpaśyatāṃ suhṛdāṃ tadā /
vilalāpa tadā tasya mātā dvijasatī nṛpa

nidhāya tacchiraḥ svāṃke kuṃḍalābhyāmalaṃkṛtam /
mātovāca-
hā hatāsmi tvayā vatsa daśāmaṃtyāṃ ca gacchatā

dinaśrīriva sūryeṇa paścimācalalaṃbinā /
yadaṃgaṃ caṃdanālepayogyaṃ tava mahāmate

māṃ majjayārtiśokābdhau tadidaṃ dhūlidhūsaram

tāṃbūlacarvaṇebhyāso yastvayā vihitastvasau /
sa eva rudhirodgāra miśreṇa kriyate dhruvam /
tava ye locane pūrvaṃ jigyatuḥ kamalaśriyam

ta eva sāṃprataṃ jāte timiraughā vṛte iva /
uttiṣṭhottiṣṭha vatsa tvaṃ śiṣyānadhyāpayātmanaḥ

yathāvadvaiśvadevāṃte pūjayātithimāgatam /
dvāri sthitā vayasyāste tvāhvayaṃti prayāhi tān

dātavyaṃ yaddadasvaibhyo gṛhītavyaṃ gṛhāṇa tat /
hāhā dehi prativacaḥ patāmi tava pādayoḥ

nocedahaṃ vimokṣyāmi prāṇāṃstava samīpataḥ /
nārada uvāca-
ityuktvā mūrchitā tasya mukuṃdasya prasūstadā

bhāryā tasya śiraḥ svāṃke vidhāya vyalapacca sā /
bhāryovāca-
nāmamārgeṇa pāthodhe madīyaṃ vacanaṃ śṛṇu

ruṣṭo'si cetsamaṃ mātrā kuto vada mamāgrataḥ /
na kadācittvayā sādho maunamīdṛkkṛtaṃ purā /
kenāpi laghunā bhrātrā hyapamānaḥ kṛtastava

śuko'yaṃ paṃjarasthaste nānnamatti tvayā vinā /
bhojayainaṃ susiddhānnaṃ kalavācaṃ ca sārikām

rāmarāma harekṛṣṇa viṣṇo nāmāvalīmiti /
pāṭhayottiṣṭha nipuṇau dvāvetau sārikāśukau

aparāddhaṃ mayā kiṃ te yatvaṃ māṃ nābhibhāṣase /
yattvayā me dhanaṃ dattaṃ tanmayā sādhurakṣiṇam

arpitaṃ yattvayā nātha nijatejo mamodare /
sūtikālamahaṃ tasya nopekṣe tvāmanuvraje

nārada uvāca-
evaṃ vilapya sā tasya mukuṃdasya priyā tadā /
na ruroda svabhartāramanugaṃtumanā satī

atha tasya mukuṃdasya gururvedāyanābhidhaḥ /
saṃnyāsī paryaṭanpṛthvīṃ tasya veśma yayau nṛpa

mukuṃdaḥ kva gato mātā bhāryā tasya ca dhīmataḥ /
na dṛśyate tadā tena pṛṣṭetyācaṣṭa ceṭikā

ceṭikovāca /
svāminkenāpi caureṇa mama svāmī hato niśi /
snuṣāyā bhūṣaṇaṃ nītaṃ dukūlāni ca sarvaśaḥ

sa mṛtaḥ patito bhūmau harmyasyopari tiṣṭhati /
tasya mātā vadhūścaiva bhrātaraśca tadaṃtike

vilapaṃti mahāśokasāgare patitā guro /
nārada uvāca-
ityākarṇya parivrāṭsa vacanaṃ ceṭikoditam

āruhya harmyamadrākṣīdātmāṃte vāsinaṃ mṛtam /
tadaṃtike samālokya baṃdhūnāṃ kraṃdato bhṛśam

uddhariṣyannidaṃ dhīraḥ śokābdhestānuvāca ha /
vedāyana uvāca-
dehamuddiśya vātmānaṃ śoko'yaṃ kriyate tvayā

mātaḥ kathaya satyaṃ me nobhayoryujyate hi saḥ /
deho'yaṃ bhūtasaṃghātaḥ prārabdheḥ samupārjitaḥ

teṣu kṣīṇeṣu bhūtānāṃ pṛthaktvamupajāyate /
yadekībhavanaṃ teṣāṃ karmabhirjanma tannṛṇām

tannāśe tatpṛthaktvaṃ ca tadeva maraṇaṃ smṛtam /
ekyaṃ pṛthaktvaṃ bhūtānāṃ karmārdhā neyato? budhaiḥ

ato dehe na kartavyaḥ śokaḥ paravaśe jaḍe /
anādyavidyayā jīve dṛṣṭe maraṇajanmanī

dehasyātmanyahaṃ buddhyā manyate nahi tatra te /
tannivṛttau sa tadbrahma yacchuddhaṃ rūpavarjitam

svaprakāśaṃ jagaddhetu hetvatītaṃ guṇorjitam /
nityaṃ vijñānamānaṃda svabhāsā bhāsayajjagat

na jihvā leḍhi taccakṣurna paśyati śṛṇoti na /
śrutirjighrati na ghrāṇaṃ na tvakspṛśati karhicit

atītamiṃdriyebhyastatsvaprakāśakamātmadṛk /
aviṣayaṃ manodūraṃ buddherapi na gocaram

tasyāvatārarūpāṇi śuddhasatvāni devatāḥ /
sevaṃte tanna jānaṃti rūpaṃ yatsadasatparam

evaṃ svarūpamātmā yastaṃ samuddiśya kaḥ kudhīḥ /
krodhaṃ kuryādyatastasya notpattirnaiva saṃkṣayaḥ

iti śrīpādmemahāpurāṇe pacaṃpaṃcāśatsāhasryāṃ saṃhitāyāmuttarakhaṃḍe kāliṃdīmāhātmye navādhikadviśatatamo'dhyāyaḥ