Padma Purana · Chapter 6.20

śrīmahādevauvāca-
haridvāraṃ mahāpuṇyaṃ śṛṇu devarṣisattama /
yatra gaṃgā vahatyeva tatroktaṃ tīrthamuttamam

yatra devā vasaṃtīha ṛṣayo manavastathā /
yatra devaḥ svayaṃ sākṣātkeśavo nityamāśritaḥ

purā pūrvaṃ tu bho vatsa tīrthaṃ jātaṃ mahattadā /
yasya darśanamātreṇa dūrato yāti pātakam

yatra gaṃgā mahāramyā jātā puṇya viśeṣataḥ /
viṣṇupādodakī jātā taccaraṇasparśanāttataḥ

bhagīrathena bho vidvannānītā tatra mārgataḥ /
uddhāraḥ pūrvajānāṃ tu kṛtastena mahātmanā

nāradauvāca-
ko'yaṃ deva samākhyāto bhagīratha mahātapāḥ /
yena tīrthaṃ samānītaṃ lokānāṃ hitakāraṇāt

gaṃgātīrthaṃ mahatpuṇyaṃ sarvapāpapraṇāśanam /
lokāḥ sarve vadaṃtyevametattīrthottamottamam

gaṃgāgaṃgeti yo brūyādyojanānāṃ śatairapi /
mucyate sarvapāpebhyo viṣṇulokaṃ sa gacchati

kathaṃ tena samānītā kiṃ kāryaṃ vada suvrata /
mahādeva uvāca-
yena gaṃgā yathānītā gaṃgādvāre'tiśobhane

tatsarvaṃ saṃpravakṣyāmi kramānukramayogataḥ /
pūrvamāsīddhariścaṃdrastrailokye satyapālakaḥ

rohitastasyaputro'bhūdeko viṣṇuparāyaṇaḥ /
tasyāpi ca vṛkaḥ putro dharmiṣṭhaḥ satpathisthitaḥ

tasya putraḥ subāhuśca jātosminvai kule tadā /
tasya putro garo nāma nātyaṃtaṃ dhārmiko'bhavat

kadācitkālayogena duḥkhī jāto'tra kāraṇāt /
rājā tu tatra deśena tarjito dharmakāraṇāt

svakuṭuṃbaṃ gṛhītvā tu gato'sau bhārgavāśrame /
rakṣito bhārgaveṇātha kṛpayā tatra vai tadā

tatra putro hyabhūttasya sagaro nāma vai dvija /
vavṛdhe cāśrame puṇye bhārgaveṇābhirakṣitaḥ

upavītādikaṃ sarvaṃ kṣatriyasya tadā kṛtam /
śastrāṇāṃ ca tathābhyāso vedānāṃ tu tathaiva ca

āgneyāstraṃ tato labdhvā bhārgavātsagaro nṛpaḥ /
jaghāna pṛthivīṃ gatvā tālajaṃghānsahaihayān

saśakān pāradāṃścaiva jaghāna sa mahātapāḥ /
nārada uvāca-
māhātmyaṃ sagarasyātha vada śaṃkara vistarāt

mahādeva uvāca-
sūryavaṃśī mahārājo vikhyātaḥ sa mahābalī /
garasya vyasane tāta hṛtaṃ rājyamabhūtkila

haihayaistālajaṃghādyaiḥ śakaiḥ sārddhaṃ ca nārada /
yavanāḥ pāradāścaiva kāṃbojāḥ pahlavāstathā

ete paṃcagaṇā brahmanhaihayārthe parākramān /
hṛtarājyastato rājā sagaro'tha vanaṃ yayau

patnyācānugato duḥkhī sa vai prāṇānavāsṛjat /
tasya patnī tu kalyāṇī sagarbhā ca vratānvitā

sapatnyā bhārgavastasya vṛtaḥ pūrvaṃ sutepsayā /
sā tu bhartṛcitāṃ kṛtvā vane taṃ praruroda ha

aurvastāṃ vārayitvā ca garapatnīṃ tu nārada /
nyavedayata tatputraṃ dharmiṣṭhaṃ sātvikaṃ priyam

nivedite tato bāle maraṇātsā nyavarttata /
tato māsadvaye jāte vavarddhaurvasya cāśrame

jātakarmādiyogaśca aurveṇa ca tathā kṛtaḥ /
upavītādikaṃ sarvaṃ jātaṃ tatra mahāmuneḥ

tatra vedādikaṃ sarvaṃ paṭhitaṃ caurvayogataḥ /
adhyāpya vedaśāstrāṇi tato'straṃ pratyapādayat

āgneyaṃ taṃ mahābhāga amarairapi duḥsaham /
sa tenāsubalenājau balena ca samanvitaḥ

haihayānvai jaghānāśu saṃkruddhaḥ svabalena ca /
ājahāra ca lokeṣu sa ca kīrtimavāpa saḥ

tataḥ śakāḥ sayavanāḥ kāṃbojāḥ pallavāstathā /
hanyamānāstadā te tu vasiṣṭhaṃ śaraṇaṃ yayuḥ

vasiṣṭho'pi ca tānkṛtvā samayena mahādyutiḥ /
sagaraṃ vārayāmāsa teṣāṃ dattvā'bhayaṃ nṛpaḥ

sagaraḥ svāṃ pratijñāṃtu gurorvākyaṃ niśamya ca /
dharmairjaghāna tāṃścaiṣāṃ vikṛtatvaṃ cakāra ha

arddhaṃśakanāṃśiraso muṃḍaṃ kṛtvā visarjayat /
yavanānāṃ śiraḥ sarvaṃ kāṃbojānāṃ tathaiva ca

pāradā muṃḍakeśāśca pallvāḥ śmaśrurakṣakāḥ /
evaṃ vijitya sarvānvai kṛtavāndharmasaṃgraham

sarvadharmajayī rājā vijityemāṃ vasuṃdharām /
āśu saṃskārayāmāsa vājimedhāya pārthivaḥ

tasya cārayataḥso'śvaḥ samudre pūrvadakṣiṇe /
velā samīpe'pahṛto bhūmiṃ caiva praveśitaḥ

sa taṃ deśaṃ tadā putraiḥ khānayāmāsa sarvataḥ /
nāśvaṃ prāpustadātevai khanyamāne mahārṇave

tatraikamādipuruṣaṃ dadṛśuste tvarānvitāḥ /
tamādipuruṣaṃ devaṃ kapilaṃ jagatāṃ prabhum

tasya cakṣuḥ samutpanna vahninā pratibudhyataḥ /
dagdhāḥ ṣaṣṭi sahasrāṇi catvāraste'vaśeṣitāḥ

hṛṣīketuḥ suketuśca tathā dharmarathoparaḥ /
śūraḥ paṃcajanaścaiva tasya vaṃśakarā dvija

prādācca tasmai bhagavānhariḥ paṃcavarānsvayam /
vaṃśaṃ mokṣaṃ sukīrtiñca samudraṃ tanayaṃ vibhuḥ

sāgaratvaṃ ca lebhetha karmaṇā tena tasya vai /
tamāśvamedhikaṃ so'śvaṃ samudrādupalabdhavān /
ājahārāśvamedhānāṃ śataṃ sa ca mahāyaśāḥ

iti śrīpādmemahāpurāṇe paṃcapaṃcāśatsahasrasaṃhitāyāṃ uttarakhaṇḍe viṃśo'dhyāyaḥ