Padma Purana · Chapter 6.188

īśvara uvāca-
ataḥ paraṃ pravakṣyāmi bhavāni bhavamuktaye /
gītācaturdaśādhyāyamavadhāraya susmite

medinyāṃ yatkilasthūlamasti kāśmīramaṃḍalam /
rājadhānī sarasvatyā āste caiva manoharā

yāmadhiṣṭhāya vāgdevī brahmalokaṃ prayacchati /
haṃsamāruhyamānāpi sāvitrīprahatairapi

sarasvatīpadāṃbhoja sevāmāśritya kuṃkumaiḥ /
yatra gauravayaṃtyāśā haṃsapakṣapuṭodbhavaiḥ

niraṃtaraṃ tayā caiva nṛṇāṃ saṃskṛtabhāṣiṇām /
suparvāṇamayī bhāṣā nimeṣeṇopalabhyate

prātargṛhāṃgaṇodbhūtai ryatrakuṃkumapāṃsulaiḥ /
sarvatoruṇitacchāya śaśāṃkaravimaṃḍalam

tatrāsīttejasāṃ rāśiḥ śauryavarmā nareśvaraḥ /
udyadujjvalabāṇaugha khaṃḍitārātimaṃḍalaḥ

abhūcca siṃhaladvīpe rājā siṃhaparākramaḥ /
nāmnā vikramavetālaḥ kalānāmapi śevadhiḥ

ubhau parasparaṃ maitrīṃ varddhayāṃcakratuḥ kramāt /
tattaddeśasamutpannairapūrvaiḥ pracurotkaraiḥ

ekadā prahitaṃ premṇā prabhūtaṃ śauryavarmaṇā /
rājā vikramavetālo vilokya śunakīdvayam

mattamātaṃgaturaga maṇibhūṣaṇacāmaram /
preṣayāmāsa mitrāya prabhūtaṃ śauryavarmaṇe

ekadā śibikārūḍhaścāru cāmaravījitaḥ /
suvarṇaśṛṃkhalārūḍhaṃ vādyaḍiṃḍimaḍaṃbaram

śunīyugalamādāya mṛgayā kautukotsukaḥ /
rājā jagāma bāhyālīṃ samaṃ rājakumārakaiḥ

paṇabaṃdhavidhānena samupetaṃ śaśāmiṣam /
tatra rājakumārāṇāṃ mahānkolāhalo'bhavat

tataḥ samānavayasā kenacidrājasūnunā /
bahumūlyaṃ paṇaṃ kṛtvā rājācikrīḍakautukī

tatovatārya dolāyā virudāvaligarvitām /
dhāvataḥ śaśakasyoccaiḥ pṛṣṭhe muṃcannṛpaṃ śunīm

mumoca rājaputro'pi premapātraṃ mahābhujaḥ /
virarāma śunīmuccaiḥ saṃkīrtya virudāvalīm

alakṣyamāṇavege'sminśunīyugalakebhṛśam /
dhāvatyutthitamevāsītpaśyatāṃ sarvabhūbhṛtām

papāta garte mahati śaśako'tiśramādasau /
patito'pi śunī vaśyo nābhavacchaśaśāvakaḥ

tataḥ śanaiḥ samutthāya dhāvannākramyaroṣataḥ /
jagṛhe rājaśunyā'sau śaśakaḥ phenamudvaman

tataḥ kathaṃciduplutya gacchanviskhalayañchaśaḥ /
rājaputraśunakyāsau gṛhītaḥ kaṃdharātaṭe

jitamasmābhiratyarthamiti saṃjalpatāṃ nṛṇām /
kolāhale śaṃkitāyā śunyā nirgatavānmukhāt

tato daṃṣṭrāvraṇaśreṇī kṣaradrudhiradhārakaḥ /
kvāpi rmamarabhūbhāge nilīyasthitavāñchaśaḥ

jighraṃtyā rājaśunyā'sau bhūbhāgaṃ dhanaroṣayā /
dṛṣṭamātraḥ paritrasto hastamātraṃ tato'gamat

yatra karpūrakadalī kroḍavyāghradarītalaḥ /
colī kapolaphalakāncubanvāti samīraṇaḥ

udbhinna ketakīkośarajomukulitekṣaṇaḥ /
visrabdhāharaṇā yatracchāyāṃ tāṃ paritanvataḥ

nārikelaphalairyatra svayaṃ nipatitairadhaḥ /
api cūtaphalaistṛptāḥ pakvaiḥ śākhāmṛgā api

api kesariṇo yatra khelaṃti kalabhaiḥ samam /
phaṇinaḥ kekibarheṣu nirviśaṃkaṃ viśaṃti ca

yatrāśramāṃtare vipro vatsanāmā jiteṃdriyaḥ /
śāṃtaścaturdaśādhyāyaṃ japannāste niraṃtaram

tatra tacchiṣyapādābja prakṣālanajalaiḥ kṛte /
kardame nyapatadgatvā jīvaśeṣo muhuḥ śvasan

tataḥ kardamasaṃsparśamātranistīrṇa saṃsṛtiḥ /
divyaṃ vimānamāruhya niryayau śaśako divam

tataḥ śunyapi liptāṃgīstokaiḥ kardamabiṃdubhiḥ /
kṣutpipāsārtirahitā śunīrūpaṃ vihāya sā

tato divyāṃganāramyaṃ gaṃdharvairupaśobhitam /
divyaṃ vimānamāruhya śunyapi tridivaṃ yayau

tato jahāsa medhāvī śiṣyo nāmnā svakaṃdharaḥ /
vicārya vismitaḥ pūrvajanmavairasya kāraṇam

rājāpi paryapṛcchattaṃ vismayasmeralocanaḥ /
praṇamya parayā bhaktyā vinayaikapayonidhiḥ

kathāṃ kathaya me vipra hīnayoni niṣevitau /
ajñauyau jagmatuḥ svarge śunī śaśakaśāvakau

śiṣya uvāca/
vatsanāmā dvijanmāste vane'muṣminjiteṃdriyaḥ /
caturdaśaṃ tu hyadhyāyaṃ gītānāṃ sarvadā japan

śiṣyo'haṃ tasya bhūpāla brahmavidyāviśāradaḥ /
caturdaśa tu adhyāyaṃ japāmi pratyahaṃ nṛpa

madīyacaraṇāṃbhojaprakṣālanajale luṭhan /
śaśastridivamāpannaḥ śunakyā saha bhūpate

rājovāca/
hetunā kena kathaya hasitaṃ ca dvijottama /
ataḥ kimapi sākūtaṃ manyamānena sādaram

śiṣya uvāca/
mahārāṣṭreti nagaraṃ nāmnā pratyudakaṃ mahat /
tatrāsīdbrāhmaṇo nāmnā keśavaḥ kitavāgraṇīḥ

vilobhanābhavattasya jāyā svairavihāriṇī /
tena sā hanyate krodhādvairaṃ saṃciṃtya janmanaḥ

tataḥ strīvadhapāpena śaśako jāyate dvijaḥ /
kilbiṣācchunakī sāpi jātā vaṃcanajanmanaḥ

pūrveṇa janmanābhyastaṃ vairaṃ vismarato nahi /
āsedivadbhyāṃ bahudhā yonyaṃtaramapi kvacit

ityākalayya sakalaṃ bhūpālaḥ śraddhayānvitaḥ /
gītāmabhyasya sakalāmavāpa paramāṃ gatim

iti śrīpādmemahāpurāṇe paṃcapaṃcāśatsahasrasaṃhitāyāmuttarakhaṃḍe gītāmāhātmye aṣṭāśītyadhikaśatatamo'dhyāyaḥ