Padma Purana · Chapter 6.180

śrībhagavānuvāca/
ṣaṣṭhādhyāyasya māhātmyaṃ pravakṣyāmi varānane /
yadākarṇayatāṃ nṝṇāṃ muktiḥ karatale sthitā

asti godāvarī tīre pratiṣṭhānaṃ puraṃ mahat /
pippaleśābhidhāno'haṃ yatrāsmi smeralocane

yatra godāvarī tīra śīkarairavaśītalaiḥ /
haṃsāḥ pakṣapuṭaiḥ kīrṇairharaṃti yamināṃ śramam

sphuratpadmāvalīkośaparāgasurabhīkṛtam /
ślāghyaṃ godāvarītoyaṃ yena te nirjarā narāḥ

dhiksudhāmauṣadhīśasya vikṛtkṣayavidhāyinīm /
mahārāṣṭravadhūkānāṃ majjaṃtīnāṃ munīśvarāḥ

spṛśaṃti yatra vaktrāṇi phullapaṃkajaśaṃkayā /
yatrakhelanmahārāṣṭrāḥ kvaṇatkaṃkaṇasuṃdarāḥ

haraṃti dhvanayo līnāṃ manāṃsyapi tapasvinām /
atyuccasaudhaśikharavihāri vanitāmukham

paśyannanudinaṃ yatra kṣīyate mṛgalāṃcchanaḥ /
atyuccasaudhavalabhī mahāmaṇimarīcibhiḥ

cuṃbyaṃte munigaṃdharvairdūrvācaṃdanacaṃcalaiḥ /
yasminnādhūyamānānāṃ patākānāṃ samīraṇaiḥ

gataśramā raveryāne bhavaṃti rathavājinaḥ /
rāśīkṛtairmalayajairasaṃkhyātairvaṇiggaṇaiḥ

yasminnupalaśeṣo'sau lakṣyate malayācalaḥ /
puṃjīkṛtāni dṛśyaṃte yatra muktāphalānyapi

nagarīdevatā hāsya stabakā iva sarvataḥ /
tatra jñānaśrutirnāmnā medinīvallabho'bhavat

yasminnuddharati kṣoṇīṃ śeṣo'yaṃ maṇisaṃnibhāṃ /
api pratāpamārtaṃḍamaṃḍalī tīvratejasi

nityamadhvaradhūmena śyāmalāḥ kalpaśākhinaḥ /
asādhāraṇadātṛtvaṃ paśyaṃta iva lajjayā

yadadhvarapuroḍāśa carvaṇāsvādalaṃpaṭāḥ /
na tatyajuḥ suparvāṇaḥ pratiṣṭhānapuraṃ manāk

yasyadānāṃbudhārābhiḥ pratāpajyotsnayāniśam /
makhadhūmaiśca saṃpuṣṭā vavṛṣuḥ samaye ghanāḥ

svalpamātramapi kvāpi na padaṃ prāpurītayaḥ /
nītayaḥ prasaraṃti sma yasminśāsati medinīm

vāpikūpataḍāgānāṃ cchadmanā yo'nuvāsaram /
hṛdayasthāni medinyā nidhānāni vyalokayat

pāṃḍurābhiḥ patākābhiḥ prāsādo yasya rājate /
viyadgaṃgātaraṃgoghairhimādririva sānumān

dānaistapobhiryajñaiśca prajānāṃ pālanena ca /
tuṣṭāḥ svargaukasastasmai varaṃ dātuṃ samāgaman

tatoṃtarikṣamārgeṇa dhunvānāḥ pakṣasaṃhatīḥ /
mṛṇāladhavalā devī devahaṃsā vinirgatāḥ

tvarayā gacchatāṃ teṣāmanyonyaṃ tatra bhāṣiṇām /
bhadrāśvapramukhā dvitrāḥ purastānniryayurjavāt

sarvairmiladbhirūcuste purastādgacchato javāt /
kathaṃ vegena niryātā bhavaṃtaḥ purataḥ sthitāḥ

sarvairmilitvā gaṃtavyamasminnadhvani durgame /
prakāśamānaṃ puratastejaḥpuṃjaṃ na paśyatha

jñānaśrutermahībhartuḥ puṇyamūrtteratisphuṭam /
niśamyeti vacaḥ samyakpāścātyānā puraḥ sthitāḥ

haṃsā hasitvā sāvajñamūcurvacanamuccakaiḥ /
raikyābhidhasya durddharṣa tejaso brahmavādinaḥ

kiṃ nu jñānaśruterasya rājñastīvrataraṃ mahaḥ /
iti śuśrāva haṃsānāṃ giro jñānaśrutirnṛpaḥ

atyuccasaudhabhavanamāruhya ca sukhaṃ sthitaḥ /
tataḥ sārathimāhūya bhūpālo vismayānvitaḥ

saṃdideśa mahātmā'sau raikya ānīyatāmiti /
tato'vadhārya bhūpālavacaḥ pīyūṣagarbhitam

nirjagāmamaho nāmnā sārathiḥ prathayanmudam /
yatra vārāṇasīnāma nagarī muktidāyinī

yatra viśveśvaro nāma hyupadeṣṭā jagatpatiḥ /
tato gayābhidhe kṣetre yatra devo gadādharaḥ

uddhartumakhilānlokānvasatyutphullalocanaḥ /
tato gaurīguroḥ pārśve sarvaistīrthairanekadhā

paryaṭangatavānyatra kedāraḥ pāpadāraṇaḥ /
yamālokya sakṛnmartyā muktāḥ syurnātra saṃśayaḥ

mahāpāpavirnimuktā bhuktvā bhogānyathepsitān /
tato gauḍeṣu niryāto yatrāste puruṣottamaḥ

yasyāvalokanādeva narāḥ svarlokagāminaḥ /
tato dvārāvatīṃ prāgānnagarīṃ muktidāyinīm

yatrāste gomatī tīre rukmiṇīvallabho hariḥ /
snātvā ca gomatītīrthe paṃcakṛṣṇānvilokya ca

martyo muktimavāpnoti bhuktvā bhogānyathepsitān /
tataḥ samudramāsādya somanāthaṃ vilokya ca

bhuktimuktipradaṃ devaṃ tato niragamansudhīḥ /
avaṃtikāṃ purīṃ prāpto bhuktimuktipradāyinīm

yatromayā sukhaṃ krīḍanmahākālosti śaṃkaraḥ /
athoṃkāraṃ samāsādya śarmadaṃ narmadātaṭe /
bhuktimuktipradātāraṃ tvarayā nirgatastataḥ

aśvamedhakaraṃ nāmnā nagaraṃ paryaṭaṃstataḥ /
yatra śārṅgadharaḥ sākṣādāste lakṣmīpatiḥ svayam

tato viṣṇugayāṃ prāptaḥ kuṇḍaṃ loṇārasaṃjñitam /
yatra snātvā ca pītvā ca mucyate bandhanānnaraḥ

tataḥ kolhāpuraṃ nāma gato rudragayāṃ prati /
āste bhagavatī yatra lakṣmīrbhaktipradāyinī

pañcanadyāṃ naraḥ snātvā mahālakṣmīṃ vilokya ca /
bhuktvā bhogānyathākāmaṃ bhaktiṃ ca pratipadyate

tato'malagiriṃ nāma nagarīṃ pratipadya ca /
nandikeśvaramāruhya somanātho'sti yatra tu

dṛṣṭvā caturbhujaṃ devaṃ varadānodyataṃ śivam /
somanāthaṃ nṛṇāṃ muktirbhavatyeva na saṃśayaḥ

tuṅgabhadrānadī tīre dṛṣṭvā hariharaṃ tataḥ /
yugeyuge bhujā yasya patantyavanimaṇḍale

yadvilokya narāḥ sarve ramyaṃ hariharaṃ vapuḥ /
bhuktvā bhogānyathākāmaṃ mucyante bandhanānnarāḥ

svarge kalpaśataṃ sthitvā muktasaṃsārabandhanāḥ /
tataḥ svāminamālokya lokānāṃ svāminaṃ vibhum

yamālokya na paśyanti nirayaṃ jātucinnarāḥ /
svarge kalpaśataṃ sthitvā muktasaṃsāravāsanāḥ

muktiṃ ca pratidadyante nātra kāryā vicāraṇā /
tataḥ śrīśailamāsādya siddhagandharvasevitam

girijāvallabho yatra mallinātho'bhidhānataḥ /
uddhartumakhilām̐llokānsaṃsārāmbhodhimadhyataḥ

svarge kalpaśataṃ sthitvā muktasaṃsārabaṃdhanāḥ /
muktiṃ ca pratipadyaṃte nātra kāryā vicāraṇā

tataḥ śrīśailamāsādya siddhagaṃdharvasevitam /
girijāvallabho yatra mallinātho'bhidhānataḥ

uddhartumakhilām̐llokānsaṃsārāṃbudhimadhyataḥ /
kālekāle paraṃ jyotiryaḥ saṃdarśayate svayam

avalokayatāṃ nṝṇāṃ yamanusmaratāmapi /
dūre tiṣṭhaṃti saṃtrastā dūraṃ nirayayātanāḥ

svarge loke sukhaṃ bhuktvā muktasaṃsārabaṃdhanāḥ /
muktiṃ ca pratipadyaṃte mānavā nātra saṃśayaḥ

rāmosti sānujaḥ sārddhaṃ jānakyāpi tato gataḥ /
tatra snātvā ca pītvā ca mucyate narakāddhruvam

kalpakoṭiśataṃ bhuktvā svargalokasukhaṃ narāḥ /
muktasaṃsāravartmāno muktiṃ yāṃti na saṃśayaḥ

tato nivṛtya āyātaḥ paśyanbhīmarathī taṭe /
dvibhujaṃ viṭhṭhalaṃ devaṃ bhuktimuktipradāyakam

yatra godāvarījanmasthānaṃ brahmagirirmahān /
gautamālayamāsādya yatrāste tryaṃbako haraḥ

aruṇāvaruṇayormadhye yatra godāvarī nadī /
tatra snātvā ca pītvā ca brahmahatyā vilīyate

asaṃkhyatīrthasaṃpannaṃ dṛṣṭvā brahmagiriṃ narāḥ /
muktimeva prapadyaṃte muktāḥ saṃsāraduḥkhataḥ

gautamyubhayatīrastha tīrthānveṣaṇakautukī /
tato jagāma sūtastu mathurāṃ pāpanāśinīm

yatra svāyaṃbhuvaṃ devaṃ bhajaṃti suramānavāḥ /
ādyaṃ bhagavataḥ sthānaṃ mahanmuktipradāyakam

trailokyeśa janisthānaṃ vikhyātaṃ vedaśāstrayoḥ /
nānādevagaṇairjuṣṭaṃ dvijarṣigaṇasevitam

kāliṃdīkūlasaṃśobhi hyarddhacaṃdra prabhākṛti /
sarvatīrthanivāsaika pūrṇamānaṃdasuṃdaram

govarddhanagiriprakhyaṃ puṇyadrumalatāvṛtam /
dviṣaḍvanaṃ mahāpuṇyaṃ viśrāṃti śrutisārabhṛt

tataḥ kāśmīranagaramapaśyatpratyaguttaram /
dṛṣṭvā dharmadhuraṃ kṣetraṃ kurukṣetraṃ samaṃtataḥ

yatrābhraṃlihagehānāṃ paṃktayaḥ śaṃkhapāṇḍurāḥ /
tā jātā dhūrjaṭeḥ spaṣṭa aṭṭahāsadaśā iva

bhaktiprasādamālānāṃ suvarṇakalaśairvṛtam /
svaḥ siṃdhoḥ patitānīva hemapadmāni mārutaiḥ

yatra prāsādaśikhare nīlapaṭṭapatākikāḥ /
śaivālavalayābhāṃti svaḥ siṃdhorlatikā iva

yatra kāśmīramāśritya nityaṃ vasati bhāratī /
naucedyugapadevedaṃ kathaṃ likhati vāṅmayam

viśrāmaṃtyāḥ sarasvatyāściraṃ yatra madālasāḥ /
mṛṇālacaṃcavo haṃsā vāhanāni caraṃtyamī

kalāviśeṣaṃ prahitā yatra boddhuṃ viraṃcinā /
tārā iva virājaṃte haṃsā yātāḥ samaṃtataḥ

sthalapadmāni dṛśyaṃte karasparśasukhāni ca /
śayanāya nitaṃbinyā yasmindānavavairiṇā

upanyāsairdvijātīnāṃ yatra na śrūyate sphuṭam /
mūko'pi nirjaro vācā padakallolaḍaṃbaraḥ

yasminnadhvaradhūmena vyāptaṃ gaganamaṃḍalam /
api ca kṣālitaṃ meghaiḥ kālimānaṃ na muṃcati

galitāyāḥ sudhāyāstu yatrādhvaramahārciṣā /
lāṃchitaṃ chadmanāsthānaṃ dṛśyate tuhinatviṣi

janmābhyāsavaśādeva paṭhaṃti baṭavaḥ svayam /
yatropādhyāyasānnidhyamāśritya sakalāḥ kalāḥ

yatra brāhmaṇapatnīnāṃ kaṃkaṇadhvani huṃkṛtiḥ /
luṃpatyanudinaṃ bhrāmyadbhramarāṇāṃ ca garjitam

yatra brāhmaṇapatnīnāṃ kapolaphalakaṃ muhuḥ /
spṛśansamīraṇo maṃdaṃ vāti śāpabhayādiva

māṇikyeśvaranāmāsau yatra śītāṃśuśekharaḥ /
vasatyanudinaṃ devo varadānāya dehinām

arcito bhūpatīnjitvā maṇikeśena cādṛtaḥ /
māṇikyeśvara ityākhyāṃ tadāprabhṛti yo dadhau

rājñā kāśmīradeveśa digjayotsavakāriṇā /
asau supūjito yasmānmāṇikyairbhūribhūtibhiḥ

saṃsevamānaṃ tadvāri chāyāṃ śakaṭikopari /
kaṃḍūyamānamaṃgāni yaṃtā raikyamapaśyata

rājñāpi kathitaistaistaiścihnaiḥ paricitaṃ javāt /
praṇataḥ sārathī raikyaṃ praṇamya tamabhāṣata

sārathiruvāca/
kasminbrahmankinnāmāsi svachaṃdo'si niraṃtaram /
kimarthamatra viśrāṃtaḥ kiṃ ca kartuṃ cikīrṣasi

ityākarṇya ca tadvākyaṃ paramānaṃdanirbharaḥ /
smṛtvā sārathimityūce vayaṃ pūrṇamanorathāḥ

paraṃ kenāpi bahunā paricaryāvidhāyinā /
bhavitavyaṃ manovṛttiṃ jānatāsmākameva hi

hṛdayasthitamādāya raikyābhiprāyamādarāt /
śanairniragamadyaṃtā yatrāste vasudhādhipaḥ

tataḥ praṇamya bhūpālaṃ yathāvṛttaṃ nyavedayat /
baddhāṃjalipuṭo hṛṣṭaḥ sārathiḥ svāmidarśanāt

tato niśamya tadvākyaṃ vismayasmeralocanaḥ /
śraddhālurabhavadbhūpo raikyasaṃbhāvanāvidhau

ādāyāśvatarīyugmayuktāṃ śakaṭikāmagāt /
muktāhāradukūlāni sahasraṃ ca gavāṃ nṛpaḥ

gato'sau tatra yatrāste yogī kāśmīramaṃḍale /
tannivedya puro rājā daṃḍavatpatito bhuvi

ānamya parayā bhaktyā raikyo rājñe cukopa ha /
re śūdra māmakaṃ vṛttaṃ na jānāsi durīśvara

gṛhāṇa śakaṭīmetāmutthāpyāśvatarī yutām /
vastrāṇi muktāhārāṃśca gāśca dogdhrīrapi svayam

itthamājñatavānbhūpo raikyasya bhayamādadhe /
tataḥ śāpabhayādrājā tatpadāṃbhoruhadvayam

gṛhṇanbhaktyā prasīdeti brahmannityūcivānsvayam

rājovāca/
bhagavaṃstava māhātmyametadatyudbhutaṃ kutaḥ /
prasannībhūya bhagavannākhyāhi mama tattvataḥ

raikya uvāca/
gītānāṃ ṣaṣṭhamadhyāyaṃ japāmi pratyahaṃ nṛpa /
tenaiva tejorāśirme surāṇāmapi duḥsahaḥ

gītānāṃ ṣaṣṭhamadhyāyaṃ raikyādabhyasya yatnataḥ /
jñānaśrutirmahīpālo muktimāpa tataḥ sudhīḥ

raikyo'pi sukhamālebhe māṇikyeśvarasannidhau /
gītānāṃ ṣaṣṭhamadhyāyaṃ japanmokṣapradāyakam

marālaveṣamāsthāya varadānārthamāgatāḥ /
divaukaso'pi nirjagmuḥ svairaṃ vismayakāritāḥ

imamadhyāyamapyekaṃ yo japetsatataṃ naraḥ /
so'pi tatpadavīmeti viṣṇoreva na saṃśayaḥ

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe gītā/
māhātmye aśītyadhikaśatatamo'dhyāyaḥ