Padma Purana · Chapter 6.17

nārada uvāca-
atha jālaṃdharo'paśyatkabaṃdhacayabhīṣaṇam /
raṇaṃ rudhiramāṃsaugha majjā medo'sthidurgamam

tatra jālaṃdharo daityaḥ priyāharaṇaduḥkhitaḥ /
raṇe vilokayāmāsa vṛṣasthaṃ pārvatīpatim

ghorāhibhogenavibhūṣitāṃgaṃ jaṭākalāpe śaśibhūṣaṇāṃkitam /
netrāgnikīlopariśobhitāṃgaṃ vinā raṇaṃ saṃpradadarśa siṃdhujaḥ

śīghraṃ svarathamāruhya samudratanayastadā /
saṃruṣṭaḥ prāha taṃ śuṃbhaṃ tāpaso na hatastvayā

prāha jālaṃdharaṃ śuṃbhastapastena mahatkṛtam /
haṃtuṃ na śakyate'smābhirharaḥ saṃgrāmadurjayaḥ

itiśuṃbhoktamākarṇyasiṃdhujaḥkrodhamūrcchitaḥ /
haraṃ padmasahasreṇa daityasainyena saṃvṛtam

gṛhītvā kālakedāraṃ dhanurjālaṃdharo yayau /
bāṇāṃstīkṣṇānatisthūlānlohastaṃbhāntathā bahūn

mumoca yudhi durdharṣo varṣanmegha ivāgame /
āyāṃtaṃ rurudhuḥ siṃdhusūnuṃ śaṃbhugaṇā yudhi

tato rudreṇa raudraiśca śaraughaistāḍito ruṣā /
rudrabāṇaistadā tasya kavacaṃ bhuvi pātitam

vivarmāpi babhau so'tha meghamukto yathācalaḥ /
punarjālaṃdharasyāṃgaṃ śaṃbhunā kīlitaṃ śaraiḥ

rudhiraṃ bahu susrāva jālaṃdharaśarīrataḥ /
tenāśu rudhiraugheṇa plāvitā sakalā mahī

tato devā bhayaṃ jagmurdānavāśca cakaṃpire /
tyaktvā te pramathā vīrā raṇabhūmiṃ pradudruvuḥ

nadyā iva parā mūrttiḥ prasṛtā sarvato'pi ca /
athāhārṇavajo rudraṃ dhanurdhara varo hyasi

idānīṃ tatkariṣyāmi yena gacchasi saṃkṣayam /
ityuktvā kālakedāraṃ saśaraṃ pratigṛhya tat

śīghraṃ saṃpūrayāmāsa śarairnānāvidhaiḥ śivam /
śivaḥ sahasrakoṭībhiḥ pūritāṃgo raṇe babhau

vihaṃgamairyathākāśaṃ vṛkṣairiva mahāgiriḥ /
daityamuktaistutairbāṇairdṛṣṭvā vyāptaṃ maheśvaram

vīrabhadrastathā kopājjālaṃdharamadhāvata /
apīḍayadameyātmā samudratanayaṃ balī

jālaṃdharo'tha saṃkruddho vidhyanbāṇaiḥ sahasraśaḥ /
dhanuḥ śarānrathaṃ chatraṃ sārathiṃ tilaśaḥ śaraiḥ

cakāra vīrabhadrasya siṃdhusūnuḥ pratāpavān /
vīrabhadro'tha viratho hatavāngadayābdhijam

tathaiva gadayā so'pi taṃ hatvāpātayadbhuvi /
gadāprahārapatitamālokyātivimūrcchitam

maṇibhadro'tha samare jālaṃdharamadhāvata /
atikruddhaṃ tamāyāṃtaṃ dṛṣṭvā daityo mahāraṇe

śarairvyastopakaraṇaṃ sa cakāra nadīsutaḥ /
atha mūrcchāṃ parityajya uttasthau siṃhavannadan

vīrabhadrastataḥ kopānmaṇibhadraḥ pratāpavān /
jaghnatuḥ parvatābhyāṃ tau vyomasthaṃ taṭinīsutam

tadaṃge patitau dṛṣṭvā parvatau vininadya ca /
jaghāna muṣṭipātena vīrabhadro nadīsutam

maṇibhadraścaraṇayordhṛtvā sāgaranaṃdanam /
syaṃdanādbhrāmayāmāsa tadadbhutamivābhavat

maṇibhadra gṛhīto'pi daityarāṭsa mahābalaḥ /
hatvā caraṇaghātena maṇibhadramapātayat

jālaṃdharo mahābāhurvīrabhadraṃ ca muṣṭinā /
athāgataḥ parivṛto gaṇairvai naṃdikeśvaraḥ

śuṃbhastamāgataṃ dṛṣṭvā rurodha saha sainikaiḥ /
dvaṃdvayuddhairathājagmurgaṇā daityaiḥ parasparam

śuṃbhaḥ śilādajaṃ rāhurmahākālaṃ raṇe yayau /
kolāhalaṃ niśuṃbho'tha ketuḥ kālamadhāvata

śailodaro guhaṃ jaṃbho mālyavaṃtaṃ mahābalaḥ /
mahāpārśvo yayau caṃḍaṃ caṃḍīśo romakaṃṭakam

vikaṭāsyo'tha vai bhṛṃgimurunetro vināyakam /
evaṃ daityeśvaraiḥ sārddhaṃ gaṇānāmadhipā yayuḥ

atha śuṃbhāyudhairbāṇaiḥ prahataśca śilādajaḥ /
cūrṇīcakārādriśṛṃgaiḥ kapituṃḍo mahattaraiḥ

śuṃbhastenārditaḥ śaktyā śilādaṃ ca jaghāna tam /
mahākālo jaghānātha taṃ rāhuṃ raṇamūrddhani

śaktyātha tasya hatavānsyaṃdanaṃ sa mahādriṇā /
kolāhalo hataḥ śaktyā niśuṃbhena pratāpavān

śaktiṃ gṛhītvā hyahanadrathaṃ sārathinā saha /
virathenātha daityena bhṛśaṃ kruddhena saṃyuge

kolāhalo sureṃdreṇa sahasraphaṇinā hataḥ /
taṃ hatvā cātivegena rathaṃ cānyamupāgataḥ

phaṇicakrahataḥ saṃkhye kṣaṇānmūrcchāṃ vihāya ca /
svarathātśīghramuttīrya gṛhītvā khaḍgacarmaṇī

sarvaṃ cakre niśuṃbhasya sa rathādyasinā pṛthak /
punaḥ svarathamāruhya daityaṃ bāṇairatāḍayat

niśuṃbho'pyatiroṣācca tatparākramavismitaḥ /
śaktyā mahābalastasya rathaṃ sāśvaṃ nyaṣūdayat

kolāhalo raṇe dhāvanniśuṃbhaṃ viratho balī /
gataḥ sa sarathaṃ cakre virathaṃ bhujabaṃdhanāt

ketupucchaṃ gṛhītvā ca bhrāmayāmāsa cāṃbare /
kālaścikṣepa so'pyadriṃ sa ciccheda giriṃ javāt

taṃ nagaṃ cūrṇitaṃ dṛṣṭvā tāḍayāmāsa muṣṭinā /
kālaścūrṇitasarvāṃgaḥ ketunā prādravadbhayāt

śailodarastathā skaṃdaṃ jaghāna gadayorasi /
ṣaḍānano'pi taṃ śaktyā hatvā bhūmāvapātayat

śaktiprahāreṇa mṛtaṃ dānavaṃ vīkṣya ṣaṇmukhaḥ /
jagarja tatra vaicitryaṃ yathā krauṃce vidārite

mālyavānatha bāṇaughairjaṃbhamabhyardayadraṇe /
jaṃbho'pi sāyakaistīkṣṇairbhittvā taṃ mūrcchitaṃ jahau

mahāpārśvo rathaṃ dhṛtvā bāṇaughairvājivarjitam /
līlayaiva ca khe nītvā vyaśvaṃ caṃḍamapātayat

vyaśvaṃ rathaṃ vilokyātha tataścaṃḍo'grahīdgajam /
āpataṃtaṃ mahāpārśvaṃ caṃḍastaṃ gadayāhanat

aciṃtyaiva gadāpātaṃ so'suro bhṛśadāruṇaḥ /
prahatya muṣṭinā caṃḍaṃ pātayāmāsa bhūtale

caṃḍīśaśastrābhihato romakaṃṭho mahāsuraḥ /
caṃḍīśaṃ pādayordhṛtvā rathamūrdhni nyapātayat

papāta sahasā bhūmau yayau taṃ bhīṣaṇekṣaṇaḥ /
urunetreṇa samare hato laṃbodaraḥ śaraiḥ

daṃtenorasi taṃ hatvā pātayāmāsa bhūtale /
ūrunetraḥ kṣaṇācchāṃtimāgatyāśu rathaṃ kṣaṇāt

jaghāna mudgareṇāsau mūrdhni siṃdūramaṃḍite /
gaṇeśvaraḥ paṭṭiśena jaghānorasi dānavam

tanmukhādatha niṣkrāṃto navaśīrṣo'suro mahān /
aṣṭādaśabhujo rājanso'pyadhāvata śāṃkarim

navaśīrṣorunetrābhyāṃ raṇe ruddho vināyakaḥ /
jarjarīkṛtadeho'pi jagrāha paraśuṃ ruṣā

tena ciccheda śastrāṇi tayorājau gaṇeśvaraḥ /
ruddhaṃ gaṇeśvaraṃ dṛṣṭvā tābhyāṃ saṃkhye'tha ṣaṇmukhaḥ

śīghramāgatya senānīrjaghāna navaśīrṣakam /
navaśīrṣaṃ raṇe hatvā urunetramadhāvata

skaṃdaḥ svaśaktighātena pātayāmāsa taṃ nṛpa /
paśyañjālaṃdharaḥ skaṃdaṃ yayau sainyena saṃvṛtaḥ

putraprītyāsurānhaṃtuṃ sagaṇaḥ śaṃkaro'pi ca /
tato ghorataraṃ yuddhamabhūdadbhutasainyayoḥ

harasiṃdhujayoryuddhe gataprāṇeva rodasī /
atha jālaṃdharaḥ kruddho bāṇaṃ saṃdhāya dāruṇam

sahasraśatasaṃkhyākaiḥ patraiḥ sarvatra bhūṣitam /
daityeṃdrastena bāṇena lalāṭetāḍayacchivam

mamajjāpuṃkhamaryādaṃ lalāṭe śaṃkarasya ca /
bhāle śaśāṃkavacchaṃbhoḥ sa rarāja mahāprabhaḥ

yathādityo hi gharmāṃte saṃdhyākāleṃbudāgame /
atha rudro mahābāṇaṃ jagrāha jvalanopamam

yasya vege tu pavanaḥ phale yasyāgnibhāskarau /
kālo graṃthiṣu sarveṣu śare devī dharā sthitā

harastena śareṇāśu vivyādha hṛdi siṃdhujam /
tena bāṇaprahāreṇa rudhiraughapariplutaḥ

papāta śarabhinnāṃgo vajrāhata ivācalaḥ /
tadā daityāḥ samākraṃdanjagarjuḥ pramathāstathā

siṃdhujaṃ mūrchitaṃ dṛṣṭvā rurudhurdānavāḥ śivam /
rakṣārthamudyatāḥ kecitkecittaṃ paritaḥ sthitāḥ

yāvajjālaṃdharo mūrchāṃ prāpto vāridhinaṃdanaḥ /
tāvadrudreṇa nārācairhatā jālaṃdharī camūḥ

cirājjālaṃdharastyaktvā mūrchāṃ sainyaṃ hataṃ nṛpa /
dṛṣṭvā bhayānvitaḥ senāṃ vikīrṇāṃ ca tathā raṇe

tataḥ kāvyaṃ sa sasmāra manasā paramaṃ gurum /
smṛtastena tvaranprāptaḥ kavirjālaṃdharaṃ prati

svasti kṛtvā jagādātha bhārgavaḥ siṃdhunaṃdanam /
kiṃ karomi mahārāja tava kāryaṃ mahābala

nārada uvāca-
iti kāvyavacaḥ śrutvā bhārgavaṃ bahu mānayan /
natvā gurumuvācātha rājā jālaṃdharastathā

rājovāca-
jīvayaitānmṛtāñchukra daityānsarvānsamaṃtataḥ /
ityuktaḥ siṃdhujenājau sainyaṃ tatra vyalokayat

paṃcaviṃśatsahasrāṇi yojanānāṃ pramāṇataḥ /
daityāṃgarathasaṃkīrṇamuparyupari pārthiva

ucchraye paṃcanavatiyojanānāṃ mahīṃ citām /
yodhavāhanadehādyairiva pūrṇāṃ dharāṃ tataḥ

maṃtrodakena cābhyukṣya daityānutthāpayatkaviḥ /
yāvadrudro jaṭājūṭaṃ babaṃdha bhujagairdṛḍham

tāvatkāvyena tatsainyaṃ maṃtreṇotthāpitaṃ nṛpa /
vyāghrānyathā kesariṇo gajeṃdrāḥ śūkarānyathā

āgatāndānavāndṛṣṭvā ciṃtayāmāsa śaṃkaraḥ /
kimetadiha saṃjātaṃ mṛtānsṛjati kutracit

dadarśa ciṃtayankāvya iti tasminraṇe bhavaḥ /
jīvayaṃtaṃ raṇe daityāndhāvaṃtaṃ vegavattaram

tataḥ kruddho mahādevaḥ śukraṃ haṃtuṃ mano dadhe /
triśūlinamanujñāya rahaścovāca taṃ kaviḥ

brāhmaṇo'haṃ kathaṃ haṃsi sarvavidyāviśāradam /
brahmahatyā mayi hate tava rudra bhaviṣyati

iti śrutvā kavervākyaṃ śūlaṃ tatyāja śaṃkaraḥ /
smṛtvā tatpūrvavṛttāṃtaṃ yallagnaṃ brahmaṇaḥ śiraḥ

brāhmaṇo na hi haṃtavyo haranprāṇānapi priyān /
ayaṃ tu jīvayandaityānnigrāhyaḥ sarvathā mayā

tasmādenaṃ kṣipāmyāśu strīyonau daityajīvanam /
evamuktavataḥ śaṃbhostṛtīyanayanāddrutam

kṛtyā vivāsā cātyugrā muktakeśī mahodarā /
sthūlalaṃbastanī yonī daṃṣṭrālocanabhīṣaṇā

ājñāpayeti sa tayā proktastāmabravīcchivaḥ /
kṛtye tvaṃ dānavācāryaṃ svayonau kṣipa durmatim

yāvajjālaṃdharaṃ hanmi tāvadenaṃ bhage vaha /
hate jālaṃdhare daitye paścānnistīrya mocaya

hareṇokteti sā kṛtyā bhārgavaṃ samadhāvata /
papāta bhūmau tāṃ dṛṣṭvā kavirdaityāḥ pradudruvuḥ

keśeṣvākṛṣya dhunvānā nagnamāliṃgya bhārgavam /
yonau dadhāra sā kṛtyā hasaṃtī jayanaṃdana

bhage kṣiptaṃ guruṃ dṛṣṭvā yāvajjālaṃdharo'suraḥ /
saṃdadhe mārgaṇāṃstāvatsā kṛtyādṛśyatāṃ gatā

iti śrīpādme mahāpurāṇe paṃcapaṃcāśatasahasrasaṃhitāyāṃ yudhiṣṭhiranāradasamvāde jālaṃdharopākhyāne śukrayonipraveśonāma saptadaśo'dhyāyaḥ