પદ્મ પુરાણ · અધ્યાય 6.164

મહાદેવ ઉવાચ।
અત્ર તીર્થં મહચ્ચાન્યત્કશ્યપાખ્યં સુરેશ્વરિ ।
યત્ર હ્રદો મહાનાસીન્નગદેવ વિનિર્મિતઃ

તત્ર કુશેશ્વરો નામ દેવો યત્ર વિરાજતે ।
યત્ર કુંડં તથા રમ્યં કશ્યપેન વિનિર્મિતમ્

તત્ર સ્નાત્વા તુ ભો દેવિ ન નરો નિરયં વ્રજેત્ ।
અગ્નિહોત્રકરા વિપ્રા નિત્યં વેદપરાયણાઃ

નિવસંતિ મહદેવિ કાશ્યપાયાં બહુશ્રુતાઃ ।
યથા કાશી તથા ચેયં નગરી ઋષિનિર્મિતા

કાશ્યપેન યતશ્ચાત્ર તપ્તં બહુતરં તપઃ ।
ગંગા વૈ તપસા યેન આનીતેશજટોદ્ભવા

સા ગંગા કાશ્યપી દેવિ મહાપાતકનાશિની ।
યસ્યા દર્શનમાત્રેણ મુચ્યંતે દુષ્ટકિલ્બિષાત્

ગોદાનં ચ પ્રશંસંતિ રથદાનં તથૈવ ચ ।
શ્રાદ્ધં કૃત્વા તુ તત્રૈવ દાનં દેયં પ્રયત્નતઃ

કલૌ યુગે તથા ઘોરે મહાપાતકનાશનમ્ ।
કશ્યપાખ્યં સમં તીર્થં ન ભૂતં ન ભવિષ્યતિ

યત્ર વૈ દેવતાઃ સર્વા ઋષયો વીતકલ્મષાઃ ।
નિત્યં તિષ્ઠંતિ દેવેશિ તીર્થરાજપ્રસાદતઃ

ઇતિ શ્રીપાદ્મે મહાપુરાણે પંચપંચાશત્સાહસ્ર્યાં સંહિતાયામુત્તરખંડે સાભ્રમતીમાહાત્મ્યે કશ્યપહ્રદમાહાત્મ્યં નામ ચતુઃષષ્ટ્યધિકશતતમોઽધ્યાયઃ