Padma Purana · Chapter 6.155

mahādeva uvāca/
khaḍgadhārāddakṣiṇatastīrthaṃ paramapāvanam /
dugdheśvaramiti proktaṃ sarvapāpapraṇāśanam

yasmiṃstīrthe naraḥ snātvā dṛṣṭvā dugdheśvaraṃ haram /
pumānsadyo vimucyeta duḥkhātpāpasamudbhavāt

dadhīcinā tapastaptaṃ sābhramatyāstaṭe śubhe /
candrabhāgā mahatpuṇyaṃ gaṃgāyā saṃgatā yataḥ

tatra snānaṃ ca dānaṃ japaḥ pūjā tapastathā /
sarvamakṣayatāṃ yāti dugdhatīrthaprabhāvataḥ

pārvatyuvāca/
dugdheśvarasamutpattiṃ śrotumicchāmi vai prabho /
mahimā dugdhatīrthasya kathyatāṃ ca sureśvara

mahādeva uvāca/
purā devāsure yuddhe daityairdevāḥ parājitāḥ /
palāyanaparā bhūtvā dadhīcāśramamāgatāḥ

muktvā tatrāyudhānyeva gatā devā diśo daśa /
paścātkolāhalaṃ śrutvā dadhīco daityasaṃbhavam

pītavāṃstāni śastrāṇi jalenāplāyya bhārgavaḥ /
kālena te surāḥ sarve astrāṇyādātumutsukāḥ

guruṇā sahitāḥ sarve parasparamudānvitāḥ /
nakulaiḥ saha sarpāśca krīḍaṃte te parasparam

evaṃvidhānyanekāni sāścaryāṇi tadāśrame /
paśyaṃto vibudhāḥ sarve vismayaṃ paramaṃ gatāḥ

dadṛśuste munivaraṃ āsanoparisaṃsthitam /
yatra sābhramatī puṇyā militā caṃdrabhāgayā

varcasā parameṇaiva bhrājamānaṃ yathā ravim /
vibhāvasu dvitīyaṃ ca suvarcā bhāryayā saha

yathā brahmāhi sāvitryā tathā'sau munisattamaḥ /
dṛṣṭaḥ suravaraiḥ sarvaiḥ praṇipātapuraḥsaram

ūcire taṃ tadā devā bṛhaspatipurogamāḥ /
tvaṃ dātā triṣu lokeṣu viditaḥ pūrvameva ca

yācñārthaṃ ca vayaṃ sarve tvatsakāśaṃ samāgatāḥ /
bhayabhītā vayaṃ sarve'strāṇi nodātu marhasi

ityukto munivaryo'sau devānāha mahāmatiḥ /
pītāni tāni bho devā jalenāplāvya maṃtrataḥ

tato devābruvanvipraṃ daityānāṃ nidhanāya ca /
dehyasthīni tvarā vipra dattānīti dvijo'vadat

ityuktvā tānsvapatnīṃ sa preṣayāmāsa cāśramam /
tadovāca dvijo hṛṣṭo devānsmitvā mahāmatiḥ

pītāni tāni bho devā gṛhṇīdhvaṃ ca yathātatham /
ityuktvā ca dvijo devi yogamāsthāya yogavit

tatobruvansurā vipraṃ smayaṃ taṃ chalayā girā /
tvayi jīvati bho brahmankutosthīni labhāmahe

prahasyovāca viprarṣistiṣṭhadhvaṃ kṣaṇamekataḥ /
svayameva ca bho devāstyakṣyāmyadya kalevaram

ityuktvā sa dvijo devi yogamāsthāya yogavit /
brahmalokaṃ gataḥ sadyo yato nāvarttate punaḥ

tataḥ sarve surāstatra dṛṣṭvā taṃ vilayaṃ gatam /
ciṃtayaṃtaḥ suragaṇāḥ kathaṃ ca viśasāmahe

surabhiṃ cāhvayāmāsa tāmuvāca śacīpatiḥ /
kalevaraṃ dvijeṃdrasya liha tvaṃ vacasā mama

tatheti ca vaco matvā tatkṣaṇādeva lihya tat /
nirmāṃsaṃ ca kṛtaṃ sadyastayā dhenvā kalevaram

jagṛhustāni cāsthīni cakruḥ śastrāṇi vai surāḥ /
tasya vaṃśodbhavaṃ tvastramāsīdbrahmaśirastathā

śastrāṇyastrāṇi kṛtvā te mahābalaparākramāḥ /
yayurdevāstvarā yuktā vṛtraghātanatatparāḥ

tataḥ suvarcā tu dadhīcapatnī saṃpreṣitā yā surakāryasiddhaye /
vilokayāmāsa sametya tatra mṛtaṃ patiṃ dehamatho viśastam

jñātvā tu tatsarvamatho surāṇāṃ kṛtyaṃ tadānīṃ ca cukopa sādhvī /
dadau tadā śāpamatīva ruṣṭā tadā suvarcā ṛṣivaryapatnī

aho surā duṣṭatarāśca sarve hyanekaśaptāśca tathaiva lubdhāḥ /
tasmāttu sarve hyaprajā bhavaṃtu seṃdrā surādyaprabhṛtītyuvāca

evaṃ śāpaṃ dadau teṣāṃ surāṇāṃ sā tapasvinī /
upaviśyāśvatthamūle sābhramatyāstaṭe sthitā

sagarbhā sā satī sādhvī svodaraṃ vidadāra ha /
nirgato jaṭharādgarbho dadhīcasya mahātmanaḥ

sākṣādrudrāvatāro'sau pippalādo mahāprabhuḥ /
prahasya jananī garbhaṃ uvāca vacanaṃ mahat

suvarcā taṃ pippalādaṃ ciraṃ tiṣṭhāsya sannidhau /
aśvatthasya mahābhāga sarveṣāṃ śubhado bhava

tathaiva bhāṣamāṇā sā suvarcā tanayaṃ prati /
patiṃ pratyagamatsādhvī paramena samādhinā

evaṃ dadhīcapatnī sā patinā svargamāsthitā /
te devāḥ kṛtaśastrāstra daityānprati samutsukāḥ

ājagmuśceṃdramukhyāśca mahābalaparākramāḥ /
kāmadhenuḥ prasusrāva yayau yatra dvijaḥ kṣayam

muneḥ prabhāvato dugdhaṃ liṃgarūpaṃ vyajāyata /
dugdheśvaramiti khyātaṃ devi sābhramatī taṭe

tadā prabhṛti tīrthaṃ hi tannāmnā prathitaṃ bhuvi /
atulaṃ yasya māhātmyaṃ śravaṇātpātakāpaham

ye śṛṇvaṃti narā bhaktyā dugdheśvarasamudbhavam /
te'pi pāpavinirmuktā yāṃti rudrapadaṃ mahat

iti śrīpādme mahāpurāṇe paṃcapaṃcāśatsāhasryāṃ saṃhitāyāṃ uttarakhaṃḍe dugdheśvaramāhātmyaṃnāma paṃcapaṃcāśadadhika śatatamo'dhyāyaḥ